الثلاثاء، 29 ديسمبر 2009

اتجوز رقم تلاته .. جواب نهائي



السلام عليكم

كالعادة كنت بتصل بزملائي الف عليهم كده واطمئن عليهم لان ربنا رازقني بشويه زملاء ربنا ما يوريكم فانا بعمل باصلي وبكلمهم
مهو برده دا احنا كلنا مع بعض في رمضان وعزومات وبتاع فلازم اطمئن عليهم

المهم ندخل في الموضوع . بعد ما اتصلت بعطعط صحبي وحبيب قلبي وقره عيني واطمئنيت عليه وعلي الكهربا اللي مسكت في ابوه الاسبوع اللي فات قالي افتح المحور واتفرج ....
فتحت واتفرجت وقعدت اضحك لحد ما اخويا دخلي الاوضة قالي وطي صوتك شويه عايز انام

القضية اللي كنت بتفرج عليها هي الحكم علي 3 متهمين في قضية اغتصاب .. الحكم عليهم بالاعدام . طبعا يستاهلوا عشان يكونوا عبره لمن لا يعتبر . وطبعا اكيد انتوا عارفين ان الضحية كانت فرحانه وهي بتثأر منهم وبيطبق عليهم العقوبة القاسية

مهو اللي يديك علي قفاك وانت ماشي في الشارع لازم تضربه واللي يسرق منك الفلوس لازم يتسجن واللي يقتل القطة بتاعتك احتمال برده جمعية الرفق بالحيوان تحكم عليه بالمؤبد
واكيد هتكون فرحان ولن تقبل باقل من هذا العقاب
اللي ضحكني بقي وموتني من الضحك هو انهم لما كلموا الضحية قالتلهم بعد التحية والسلام وبدون كلام ويحيي العدل واحلي من الشرف مفيش . قالتلهم انا عايزه اتجوز رقم تلاته
ههههههههههههههههههههههههههههههههههههه
جواب نهائي يا هانم ؟ اكيد طبعا
خلاص يا جماعة هاتولها المتهم رقم 3 من التلاجة تتجوزوا واعدموه . هههههههه
هو القضية قلبت ليه علي ميلودي تركس كده .؟؟

انا لما سمعت الخبر ده قعدت اضحك جدا كيك علي الاخر . تخيلوا !!! شفتوا الست الطيبة
علي فكرة دي ربه منزل . يعني مربية اجيال

علي كده بقي ده تحريض صريح للشباب ان اللي عايز يعمل حاجة يعملها . واهو يمكن الفتيات الطيبات يطلعوا حلوين زي ربه المنزل دي ويتجوزوهم . واهو برده يبقي تصحيح للخطأ ولم الفضيحة
انا مش عارف الحقيقة هي فكرت باي منطق وهي بتقول كده ؟؟؟ علي اساس مثلا انهم صعبوا عليها ؟ او احتمال يكون الواد التالت ده برئ ومجاش نحيتها . او احتمال برده يكون امور شويه ولا حاجة . ولا لما شافته افتكرت جوزها الله يرحمه .

انا بقي رايي يا جماعة تضامنا مع كلام الست .. مش ام كلثوم لا الست اللي هي الضحية يعني
رايي انهم يعدلوا المادة 300567 عقوبات الخاصة باعدام المغتصب ويخلوا العقاب انه يتجوزها . ولو كانت متجوزه تتطلق والمجرم يتجوزها لاسيما لو كانت ارمله زي الحالة اللي بين ايدينا

طب واحد مدقدق يطلع يقولي طب لو المغتصب مش واحد . زي برده القضية اللي معانا دي اقوله ساعتها نقلب القضية من سيربح المليون ونحط الضحية علي كرسي جورج قرداحي ونسالها تختار مين من العدد اللي انقض عليها في حقول الذرة .
ولو كانت الاجابه صعبه نحذفلها كام واحد ونسهل العملية وتختار وتخلصنا

والباقي بقي يتعدم او يروح في ستين داهيه او نخليه يتجوز ستات مش متجوزه . واهو بالمرة يبقي سترنا بناتنا .
وبكده يبقي قضينا علي الظاهرة من جزورها علي فكرة . لانهم مش هيخافوا من الاعدام وانما هيخافوا من الجواز . وبرده احقاقا للحق نخلي العصمة في ايد الست عشان ميطلقهاش ونطمئن علي مستقبلها زي الحاجة اللي في القضية اللي بين ايدينا .

بجد مش حلوة ؟ الله عليكي يا بلد لما تعملي في شعبك كده .. واحده بدل ما تاخد بتارها وتربي عيالها . عايزه تتجوز رقم تلاته .
الحياه بقت صعبه من غير راجل بصراحة . بس بجد الست دي رجعتلي الثقة في نفسي اني مرغوب في المجتمع
واهو لما اغلب يعني في الاخر اروح اغتصبلي واحده وللا اتنين يمكن البليه تلعب معايا والبت تطلب تتجوزني
واهو ابقي اتلميت بين اربع حيطان بدل ما احنا لايصين كده مش عارفين تجوز ولا يحزنون .

كفاية كده علي الموضووع الفكاهي ده واشوفكم في حلقة جديده وخبر كوميدي جديد .

هناك 6 تعليقات:

غير معرف يقول...

انت قليل الادب ومش متربى وغالبا صااااايع

مخنوق كيك يقول...

الله يسامحك يا غير معروف
وعلي فكرة انا مش همسح تعليقك لانك باين عليك متعرفنيش

وانا مش هرد عليك هسيب الزمن هو اللي يرد عليك ولما تدخل تاني وتعرفني هتعتذرلي

بس صحيح سؤال بيطرح نفسه
انت واحد وللا واحده ؟
باين عليك وراك موضوع مهم لازم نعرفه
تعالي وابقي فضفض معانا وانا هساعدك

اقصوصه يقول...

لاااااااااااااااا


تعليق!!!!!!!!!!

نـــــور يقول...

يانهار ابيض؟!!!!!!!!!!!!

بجد وربنا ده حصل؟
طيب فى برنامج ايه ده؟

بس بجد انا مستغربه الموقف ده جدا جدا
ربنا يعلم ايه الاسباب اللى خلت الست تقول كده!

بس على فكره
ازيــك:)

mostafa rayan يقول...

طب باعم مخنوق كيك .. ازاي هي ترغب في رقم تلاته وهي متجوزة وفين جوزها وفين عيالها واهلها والحاجات دي كلها
في نقطه غلط ومش مفهومه في الحوار ده
تحياتى لك

اقتصادي عاطل يقول...

يا باشا عادي
اللي يخلي احمد عز (مش الممثل) يقولك مصر من اكثر دول العالم خلوا من الواسطة (دا في البيت بيتك علي فكرة مع محمود سعد) لا و كمان يقولك فيه مشكلة اكبر ان ساعات بيتم توظيف ناس دون المستوي (من غير وسايط و لا حاجة) و لكن مراعاة للظروف و الابعاد الاجتماعية و هذه الظاهرة موجودة فقط في مصر و يجب القضاء عليها
ههههههههههههههه
الظاهر بيتكلم عن بلد تانية غير اللي احنا عايشين فيها
ههههههههههههههه
و بالنسبة للي اختارت رقم 3 دي طلعت بتفهم لعلمك لاني هي اعتمدت علي مبدأ التالتة تابتة