السبت، 19 يونيو، 2010

الحسرات تلاحق المصريين . اه يا عيني



السلام عليكم

وحشتوني وحشتوني وحشتوني . علي راي الصبوحة

معلش كنت مأنتخ اليومين اللي فاتوا دول وانا حاطط الام بي ثري في وداني وبسمع الاخبار المنيلة اللي في البلد
سواء قضاء ولا قتل الشباب ولا الاعتقال ولا الانتخابات

حاجة فعلا تخلي الواحد يقوم يشرب مية ساقعة علي الريق كده
يلا ما علينا . المواضيع الجاده ليها ناسها . مش كده ولا ايه يا حيزبون منك له ؟
فطبيعي سأتخذ قرارا واريدكم جميعا ان تساندوني عليه

انني ساتنحي عن كتابة اي موضوع يخص بالمشاكل ده ونسيب الزمن يداويها واحنا نقرا في الجرنان وخلاص
هفتح قلبي واطلع علي الشارع واتكلم علي حاجة عملالي حموضة بقالها تلت اربع دقايق كده

مستوي مونديال كاس العالم

والحسرة التي اصبحت تلاحق الشعب المصري في كل وقت وحين
نظرة البؤس وسوء التقدير في عيون المصريين وهما بيتفرجوا علي الجزائر في كاس العالم
او واحد تلاقيه حاطط الشيشة لمؤخذه في بقو وبيتفرج علي الدول الافريقية زي الكاميرون ونيجيريا

كما كتبت كثيرا علي الفيسبوك ان الحسرات اصبحت تلاحق الشعب المصري فمن حسرة الخروج من المونديال وارتفاع
اسعار االاشتراك في الباقة وتشويش القنوات اثناء الهجمة
واخيرا طبعا ً تعادل الجزائر مع الانجليز . حاجة تحرق الدم

وطبعا ده يحط احتمال ان الجزائر تصعد الدور التاني وان ربع الشعب ضعطه يعلي فوق ال 160 ولا حاجة
الناس اصبحت ماشية في الشارع تكلم نفسها وتقول كان زمان مصر في كاس العالم وشكلها بينور في التلفاز
او تلاقي واحد انأح منه بيقولك كان زماني دلوقتي في الكاس

هي فرق كاس العالم دلوقتي بقت 80 مليون لاعب ولا ايه ؟
كأس العالم فعلا كل دماغ الناس . رحمتك يا رب
وثانيا انتوا زعلانين ليه ما التليفزيون المصري ربنا يطول عمره وينصره علي مين يعاديه

اشترلكو عشرين ماتش تأزأوا فيهم وانتوا قاعدين فاضين

ما علينا وباختصار شديد عشان اقوم الحق اضرب زانتاك ضد الحموضة
انا بدعوا كل فئات الشعب الفاضي اللي قاعد علي القهوة واللي بيصحي علي ماتش الساعة 2 ونص
بقول لكل الشباب يا ريت تتقبلوا الهزيمة بصدر رحب ومحدش بياخد اكتر من نصيبه
والمفروض نشجع الجزائر لانها دولة عربية

اهو بدل الحزاينه الافارقة زي نيجيريا والكاميرون
اللي فعلا اثبتوا ان الغباء يتوارثه الاجيال و الابناء
وصدق اللي قال ان الافارقة وبتوع اسيا هم كومبارس كاس العالم

يلا يا جماعة كل واحد يقوم ينقي صدره من الحقد اتجاه الجزائر ويقوم يفتح القميص لحد بطنه
و يقف يشم هوا نضيف في البلكونة
واهو بالمرة نقف خمسين دقيقة حداد علي مصر اللي خسرت امام الجزائر

احم احم .. كله ينبسط ومش عايزين تعصب وعايزين تشجيع نضيف
مش هتبقي البلد والكورة علينا يعني . حرام عليكو احنا هنتحمل ايه ولا ايه ؟

واختم كلامي بتوجيه كلمة لابناءنا وبناتنا في الثانوية العامة واقولهم

يا فاشل يا فاشل
يا فاشل يا فاشل

وادي حسرة كمان

وشكرا وابقوا قابلوني


الجمعة، 16 أبريل، 2010

اللعنة علي الكهرباء .. سلسلة الفقر نعمة


اللعنة علي الكهرباء .. الكهرباء تاخذ منا كل من نحبهم ..
ده مش فيلم صلاح الدين القليوبي

دا صوتي وانا بصرخ من الدور السابع لما النور قطع عندي وانا بكلم اخويا حديدي في قطر

الحقيقة ملقتش اي مبرر لحرقان الاعصاب اللي شركة الكهربا بتعملوا غير حاجة واحده بس
وهو الانتقام من الاغنياء اللي عندهم كمبيوترات وتكييفات وعايشين حياه نزيهه
وبالتالي تكملة لسياسة الوفاق اللي انا متبعها لتقليل الفارق بين الانسان المطحون والانسان المأنتخ زي حلاتي كده

انا بقالي مثلا اسبوعين تلاته شهرين كده النور بيقطع عندي كل يوم الساعة 12 بالليل وبقعد اصرخ بعلو الصوت لحد ما صوتي اتنبح

مرة يقطع وانا بتفرج علي الفيلم المفضل " حب فوق كنبة الهرم " او يقطع وانا بعمل الاكل الشهية بتاعتي وهي معكرونة بالتونة

وفي الحالتين طبعا مزاجي بيتعكر لان مفيش عندي شمع في الشقة وبضطر اطلع اقف بره في الروف زي اي فقير من الشعب
وساعات يقطع وانا بلبوس في الحمام باخد شاور مية سخنة بالسخان ابو 400 جنيه
منا غني بقي

وخلصت بهذا الاستنتاج المريح وهو حفاظا علي الروح المعنوية للفقراء

دلوقتي لو انت غني - لا قدر الله - وعند حضرتك تكييف وكومبيوتر واحتمال ورثت وجبت لابتوب توشيبا .. والكهربا قطعت وانت بتتفرج علي الدش ابو 700 جنيه اللي بيفتح قنوات الاوروبي

هتعمل ايه ؟ طبعا هيجيلك احتباس حراري في نفسويتك وتطلع تشرشح للناس الماشيين في الشارع
وتسب شركات الكهرباء زيي كده بالظبط مع اختلاف الالفاظ حسب لون التي شيرت اللي انت لابسه
وطبعا ده بالتبعيه هيأثر علي ادائك في العمل وخلافه . يبقي داويها بالتي هي الداء
ارجع للجاهلية وعيش عيش جدك اللي ذاكر علي ضوء شمعة او علي باب جامع . مش فاكر

يبقي اذن الحكومة بتحاول تنيم حضرتك بدري وبتنتقم منك لانك عندك تكييف بيبرد الجو الساخن وتلاجة بتبرد الماء الساخن
يبقي اذن لازم تدفع الضريبة وهو انك تعيش زي الفقراء بالظبط بعد الساعة 12 بالليل
تنام في الظلام وفي الحر واحتمال تتقلب وانت نايم تخبط دماغك في الحيط وتروح تتعالج وتحس بالالام اللي بيحس بيها الفقير

يبقي اذن المستفيد الوحيد في الموضوع والهارب الوحيد من الماساة الفسيولوجيه دي هو الفقير اللي قاعد تحت الكوبري مرتاح لا نور يقطع ولا اي حاجة
لانه اصلا معندوش نور

يبقي اذن بامانة واختصار شديدين الكهربا هي عنصر له صلة اساسية بالحالة المزاجية للشعب
والفقير يا عيني في حل من هذا العذاب لانه قاعد لا حامل هم الكهربا ولا حامل هم التنيوهات اللي مالية الجرايد عن قطع الكهرباء وقطع المية

ويقولك هنقطع المية من الساعة 1 صباحا لحد يوم الخميس اللي جاي واللي عايز يعيش لازم يملى كوز المية اللي راكنه تحت الحوض ... وطبعا يا ولداه دي ماساة محدش بيحس بيها غير الاغنياء

ومن هنا احب انوه تنويه مهم جدا زي اللي بتعمله شركة الكهربا

احب اوجه شكر ونداء لكل فقير واقوله انت عايش في نعمة لانك بعيد عن كل هذه المشاكل والترهات وعايش في حالك .. وفعلا سدق اللي قال " الفقر نعمة " وشكرا لحسن استماعكم

كان معكم من تحت كوبري قصر النيل
مخنوق كيك اخر حاجة .. يعني لحد اخر الشارع كده

وشكرا

لمن يريد المتابعة علي الفيسبوك
http://www.facebook.com/topic.php?uid=8896066997&topic=14526


الثلاثاء، 13 أبريل، 2010

فول ، بيض ، زيت ... احمدك يا رب


تم بحمد الله افتتاح سلسلة " الفقر نعمة " .. بقلم ( مخنوق كيك ) حصريا ً
فول ، بيض ، وزيت .. احمدك يا رب
مقولة مأثورة ومقتبسة من موقع شهير بجيب منه اخباري المنيلة دائما ً وابدا

الحقيقة جلست وحيدا في ظلام الليل اتفقد احوال الرعية من الشعب واقرا الاخبار اللي تسد النفس .. واللي تخنق طبعا

وتعقيبا علي الحيزبون حبيب قلبي اللي عامل موضوع خط الفقر
قعدت ادور ليه خط الفقر ده موجود ؟ وهل هو صحي ام لا ؟ وهل الحكومة فعلا همها علينا وعلي الشعب المصري ام لا ؟

انتهيت من القراءة وخلصت ببعض الافكار التي قد تكون فعلا نهج للحكومة الموقرة بتاعتنا

الناس اللي بتقبض 200 جنيه و 300 جنيه هل دول فعلا فقراء ام في الحقيقة اغنياء ؟
دلوقتي يا بشري انت وهو كيلو اللحمة وصل لستين جنيه وسبعين جنيه وحتي الكوارع اللي مش بعرف اكلها وصلت 38 جنيه للكارع الواحد

اللي بياكلو لحمة كتير بيجيلهم نقرص ومش بيعرفوا يمشوا مسافات طويلة . وده علي اساس ان الشعب بتاعنا داخل مسابقة ماراثون يعني
فبالتالي حفاظا من الحكومة علي رعيتها الموقرة غلت اللحمة عشان النقرص
طب ودلوقتي الراجل اللي بيقبض 200 جنيه هيجيب بيهم ايه ؟

يادوب مواصلات للشغل وده طبعا صحي جدا عشان الشغل بيزيح الهم
وهيجيب بيهم نص كيلو لبن للولاد وده طبعا صحي جدا عشان يكبروا ويبقوا حاجة كبيرة وتخينه في البلد
ويا دوب يفطر بخمسين قرش فول وده طبعا عشان نفسه تتسد طول اليوم ويؤدي المهمة الموكولة ليه في الشغل بدون ادني شكوي من الجوع

مش ياكل فينو ويبقي عيل فافي او يروح لجاد في وسط البلد وينحشر وسط الطبقات العليا وده طبعا هيعود عليه باكتئاب نفسي اثر وجوده وسط هذه العصابة الغنيه

ولو جاب كمان اربع بيضات يوميا او كل يومين عشان البروتين يبقي حلو اوي
يبقي بالتالي تقدروا تقولولي ايه لازمة اللحمة والكلام الفاضي ده ؟
مش هتجيب غير نقرص ووجع في البطن والناس كلها هيبقي عندها كرش ومحدش هيعرف يشتغل

ليه تقبض 2000 جنيه مادام تقدر تقبض 200 جنيه وتقدر تعيش بيهم ؟
هو افترا علي الفاضي وخلاص يعني ؟

عايز تجيب تكييف في الحر مثلا ؟ ايه الغنا الفاحش ده ؟ ده حتي التكييف هيجيبلك برد . بما اننا من هواه لبس الشورت والخروج بيه في البلكونه
عايز تجيب هديه للموزه بتاعتك مثلا ؟ صدقني حتي لو جبت هتسيبك في الاخر وتطمع في الدبدوب وهيروح لواحد غيرك والدائرة تدور ولن ينالك غير الحسرة والالم والبكاء زي فيلم صايع بحر

اوعي تتجنن في دماغك وتقول افتح دفتر توفير اوفر فيه عشان عيالي . لانك كده بتقضي عليهم . لان مفيش دلوقتي اكتر من الشباب المحششين اللي صارفين كل فلوس ابوهم الغني

يبقي بالتالي الاغنياء هم اساس كل الفساد اللي في البلد .. يبقي طز
وعلي راي المثل " يا باني في غير ملكك يا ساكن في حته تانيه "

تقدر تقولي ايه الفرق بين زيت كريستال وزيت قليه ابو 5جنيه ؟ مفيش فرق
حتي الكوليسترول ليه مميزاته !! هيخلي دكاتره الباطنة والقلب يشتغلوا
احنا كنا بنشغل بعض

لان لو كل الناس صحتها بقت حلوة مفيش دكاتره هيشتغلوا والامور كلها هتبقي عال العال وده هيفتح علينا حاجات وحشة كتير زي ايه مثلا ؟؟؟

1- الناس هتبتدي تفكر في حاجات تضيع فيها صحتها الحلوة وكله هيروح يتمشي علي الكورنيش عشان يحرق الطاقة اللي جواه بغض النظر عن كيفية الحرق

2- الناس هتفتضل تتخانق مع بعضيها لان ربنا اداها كتلة عضلية في جسمها وده هيعود علينا بخناق ودماء

3- النقطة التالتة ودي اهم نقطة ان الناس لو كلت كويس اكل نضيف دماغه
ا هتشتغل وطبعا سر شقاء الانسان هو عقله . فباتالي عطل دماغك وحطه في التلاجة عشان متفكرش كتير وحياتك تبقي زي اللوز

يبقي اكيد بعد سرد هذه النقط عليكو عرفتو ليه المرتبات محدودة والاكل محدود وكل حاجة بقت محدوده
عشان تفكيرنا في الاخر ........... يبقي محدود

وطبعا احب اوجه الشكر لكل المسؤلين وكل الناس الطيبة اللي بتضيع صحتنا عشان النقط المذكورة اعلاه
واحب اقول لعملاء البرجوازيه الحمراء اللي خايفين علي صحتنا . موتوا بحسرتكم
لانكم مش هتعرفوا اكتر من الحكومة

وشكرا لحسن استماعكم ومستني مداخلاتكم علي الخط الساخن .. او البارد

مش فارقة
واحب اذكركم برابط المدونة علي الفيستوك

http://www.facebook.com/group.php?gid=8896066997&ref=ts


الجمعة، 9 أبريل، 2010

دي مصارعة قطط مصرية .فين الماتشات الاوربية


وانا قاعد زي كل يوم بدور علي حاجة تخنقني او حاجة اطلع فيها غلي قولت اتفرج علي ماتش مانشستر والبايرن
اهو الواحد يتفرج علي حاجة حلوة احسن من الكورة بتاعتنا اللي اشبه بحرب مصارعة
او بمعني ادق حرب قطط بس جامد

ومبدأي دايما ونظرتي للكورة المصرية عموما هي انها لا تصلح للمشاهدة الادمية لان اللي شوفته امبارح في ماتش مانشستر والبايرن
بعيد تماما عن ماتش الزمالك والشرطة مثلا

وحظي الاسوح خلاني اقلب اقلب علي ماتش الزمالك اللي كان شغال في نفس التوقيت
لقيت الجماهير طبعا ً كالعادة ماسكين قزايز المية وهاتك يا شتيمة . بس الحقيقة الاخ شيكابولا كان قايم بالواجب
بس هل ده فعلا ً منظر لكورة قدم وامتي هنبقي زيهم ؟؟؟؟

كرهت نفسي والله ورجعت بسرعة علي ماتش دوري اوروبا عشان الجزء اللي ناقص في نفوخي ميطرش
الكورة اكيد ليها جماهيرها . بس انا نفسي اسال الجماهير اللي بتشجع الزمالك او الشرطة او الاهلي حتي
ايه المتعة اللي بتلاقيها وانت قاعد تتفرج بغض النظر عن تمن كيلو اللب اللي شارية من مقله هريدي او كباية الشاي اللي في ايدك ؟

هل فعلا انتوا راضيين عن مستوي الكورة في بلدنا الحبيبة ؟ وامتي هيبطلوا يلعبوا مصارعة في الملعب ويتشقلبوا في الهوا زي اللي بيلعبوا جمباز ؟

ليه مش قادرين نتصور ان الكورة حاجة ترفيهية مش لعبة حياه او موووز .. قصدي حياة او موت !!

لا ويرجعوا يقولوا ده فيه واحد من المشجعين مات اثر سكته قلبيه
جتك خيبة قويه ... بقي دور كورة تموت علشانها ؟
طب اتفرج علي برشلونه مثلا يمكن تموت موته شريفة . او اتفرج علي ميسي يمكن تسمي البيبي اللي جاي محمود ميسي

او يمكن ربنا ينفخ في صورتك وتجيب 11 عيل وتعمل بيهم فريق وتعلي بمستوي الكورة المصرية
بدل ما احنا شايفين ماتش مصارعة فراخ بيجروا ورا البيضة

بجد انا مش عارف اقول ايه تاني واعيد ايه . بس فعلا نفسي نتفرج علي ماتش كورة محترم
لذلك انا عايز اقتراحات للسمو بالكورة المصرية عندنا
مثلا :
1- هل نجيب لعيبة من بره ؟
2- ولا ندي اللعيبة اللي عندنا كورسات خارجية في كيفية الجري ورا الكورة ؟
3- ولا نجيب شاشة عملاقة في الاستاد ونذيع عليها الماتشات الوروبية ونخلص بقي !!

حاجة تخنق

والي لقاء في تحليل مباراة المصارعة الحرة بين الزمالك والشرطة

وشكرا لحسن استماعكم

امضاء
مخنوق كيك

الخميس، 8 أبريل، 2010

وحشتوني يا حبايبي يا جيراني

السلام عليكم

وحشتوني كتير كتير يا كماحة وبجد كنت مفتقدكوا تماما الفترة اللي فاتت وزي ما المثل بيقول لكل جواد كبوة

والزمن بيتغير لكن الواحد بيرجع يبص علي الماضي الاليم احيانا ً
ويشوف الناس اللي بدا معاهم

وبما ان التطور والتطوير اصبح من شيم المستقبل المنظور فانا قررت اني اساير المستقبل واكون انسان متحضر وملم بجميع انواع الثقافة الغربية وطبعا ده بعد اذنكو
قررت اني انقل المدونة بتاعتي علي الفيسبوك وذلك لعده اسباب مش فاكر منها اي حاجة

ربما لاتساع القاعدة الجماهيرية علي الفيسبوك والواحد محتاج يتعرف علي ناس اكتر

وهو ده رابط الجروب ولازم طبعا تشرفوني هناك لانكو عزوتي واهلي واحبالي ولازم كل اصحابي ييجو هناك يمضو حضور

فاهم يا ابو رامي انت ومحاسن وابو علي وكيارا وحبيبة وكفايه كده لحسن تعبت من كتر العد

http://www.facebook.com/group.php?gid=8896066997

وشكرا لحسن استماعكم

اللي مش هييجي هزعل منه اخر حاجة .. يعني بعد الموقف كده يا سطي
سلاموز لان عندى شغل كتير ولازم اعمله وقضايا كتير لازم احضرها واكل كتير لازم اكله