السبت، 20 ديسمبر، 2008

السمــكة .. أكـــلت كابل النت بين مصــر وإيـطـاليا



السلام عليكم

حبايبي الحلوين المستكنيسين . معلش انا حاسس بيكم وبالماساه اللي كنتوا بتمروا بيها
لاسيما ان النت اصبح في حياتنا زي العيش الفينو للاغنياء .. والعيش البلدي للفقراء .. والحشيش لاصحاب المزاج
طبعا كلنا مرينا بوقت عصيب جدا ً خالص كيك اليومين دول لاننا كلنا عرفنا الماساه اللي مصرنا الحبيبة مرت بيها . وطبعا كلنا عرفنا
السمكة اللي قطعت كابل النت . واللي حولوا يصوروها بالاشعه تحت الخضراء في 90 دقيقة

مش فاهم دي سمكة من نوعه ايه دي ؟؟ هي دي سمكة قرش وللا حوت . ؟ ولا يمكن تطلع سمكة البالون اللي بتاكل الناس وهي نايمة .

مرت مصر باسوأ 32 ساعة ونص في حياتها . اصعب من العدوان الثلاثي سنه 56 . واصعب من لحظة فك شفرة حجر رشيد ... لان الشباب كلهم افتقدوا الهواء والشات . والفيسبوك
بس بجد حاجة عظيمة جدا لما نلاقي ان النت قطع عن مصر كلها عشان الكابلات اتقطعت بين مصر وايطاليا .. وللا معرفش مصر وسنغافورا

بس برده مصر هي امي نيلها هو عمي . وشمسها السماري وشكل امها في ملامحي .. حتي لوني امحي وهيسود قريب بسبب عمايلك السوده يا مصر
وبرد علي كل المرتزقه عديمي النظر ان مصر دي امنا والنيل روانا والخير جوانا ولازم نقف معاها شويه
ايه المشكلة يعني لما النت يفصل يومين تلاته عشره ؟ والكهربا تفصل كمان اسبوعين وللا اتنين . وتصحي من نومك متلاقيش اكل ؟
ايه المشكلة ؟ مصر ياما ادتنا كتير . فيها ايه لما يوم نديها ؟

واحب اقول " ليا مين غيرك يا بلدي ليا مين .. يللي علمتيني ايه معني الحنين "
تقطعي عننا النت يوم ونص يا مفتريه ؟ وكل ده ليه !! عشان نطفش يعني ؟ طب مش طالعين منها برده
ويانا يا انتوا في البلد دي يا نجايحه . ومن النهارده مفيش حكومة .. احمد السقا هو الحكومة

متعرفوش يا جماعة الفتره دي عدت عليا ازاي . حقيقي لا ماسنجر لا تصفح ولا منتديات لا فيس بوك .. فظيع فظيع فظيع
بقي بسبب حته سمكه ينقطع اتصالنا بالعالم الخارجي ؟ والفالحين سايبيلنا المواقع المحليه زي مصراوي ودي لنك .
دول هنعمل بيهم ايه دول ؟ هنفتيهم في الشاي وناكلهم ؟
احنا الحمد لله الكيميا بتاعتنا بتتظبط في موقع طرب او الدي في دي او موقع من المواقع الثقافية ... زي كتاب ابله نظيره والكلام ده
دنا حتي كنت كاتب وصفه الملوخيه علي الفيس بوك وبسبب النت معملتش ملوخيه .. اضطريت اعمل مكرونه بالتونه
واتحرقت لان النور قطع كمان ومكونتش شايف .. حاجة تقرف

ربنا يسامحك يا مصر . عايزه تموتيني ؟ مش عارفين تحافظو علي شويه كابلات ماشية في المية ؟ اسفوخس عليكم
بس انا عارف مين اللي ورا الحركة دي . دي اكيد حركة ارهابيه عشان كلنا نهاجر بره البلد ونروح شبرا . بس ابدا
وحياه ابوهم لقاعد لهم فيها باللابتوب بتاعي وهشيت علي موقع نمرا كمان . وهستمر في كتابة التدوين لاخر قطرة في دم احمد صحبي

يعني النت مش يفصل مثلا عن حته واحده ويسيبوا حته . لا دي مصر كلها اتقطع عنها النت ؟؟
طبعا اصحاب النفوس الضعيفه والشخصيات المهزوزه هيسالني ويقولي ليه ؟ ليه النت اتقطع عن مصر كلها ؟
االاجابه بسيطة . مصر دي عظيمة يا ولاد وكل حته في مصر ماسكة في الحته اللي جنبها . ولازم لما النت يقطع عن الهرم لازم ياخد في ديله الدقي لحد التحرير .. ويا نعيش عيشه فل يا نموت احنا الكل

بس برده ارجع اقول مصر هي امي ونيلها هو عمي
وبخاطب جميع المسؤولين القائمين علي التحقيق والتفحيص والتمحيص والجري وراء السمكة ... شكرا يا بشر علي النت وعودا حميدا ً والحمد لله انكوا لحقتونا بدري بدري .. قبل ما كان يحصلنا حاجة

ده احنا كنا ممكن ننقرض في الحركة الارهابية دي . بس الحمد لله جت سليمة
وعلي فكرة انا كمواطن مصري النيل رواه والخير جواه بيحب مصر انا ناوي اعمل عملية انتقامية الا وهي :
الوزير طلع وقال يا جماعة محدش يحمل حاجة - لا افلام ولا اغاني ولا .... - عشان النت بطئ وكله يساعد بعضه والاولوية للعواجيز والحوامل وذوي الاحتياجات الخاصة
فانا بحمد لله حصلت علي مجموعة مصطفي محمود كامله - 6 جيجا - وهحملها كلها من دلوقتي لحد ما الكابلات تتقطع تاني
مهو محدش ضامن عمره ولازم اامن مستقبل العيال بكام جيجا قبل ما اتنقط من البلد دي
وابقي قابلني يا وزيرنا لو حد عرف حتي يدخل علي موقع مصراوي .
وبناشد كل الشباب وكل البنات .. محدش يقرب من الكومبيوتر . لانه دلوقتي تحت سيطرة من لا يرحم .
وهطالب المحكمة بتعويض لما حدث لي من ضرر نفسي وجسدي ومعنوي . وهطالب مبلغ كبير مصحوبا بطبق من الملوخيه وكيلو خيار

وبالنسبة للعصابة بتاعي دكتور شهاب ومحاسن وابو علي وكل الناس الحلوة اللي مش فاكرها . بطمنكم وبقولكم مصر امانه في ايدينا . ولازم نحافظ علي السلك بتاع النت ويا ريت محدش يشرب سجاير جنب الكورنيش عشان ممكن السجارة تقع في المية فتلسع السلك اللي تحت المية ونمر بازمة عصبية تانيه . ومنقدرش نلم المشكلة . ومش كل مرة تسلم الجرة
ويا ريت نقف دقيقة حداد كلنا علي اللي حصل .. طبعا انتوا عارفين
علي المكرونة اللي اتحرقت !!!!!!!!!!!!

وفي نهاية الحلقة بهديلكم الاغنيه دي عشان كلنا اصلنا علي نياتنا .. ومش فاهمين ايه اللي بيحصل في البلد
وسلام حار لكل الناس الحلوة اللي منفضالي



الأربعاء، 17 ديسمبر، 2008

انا .. واعــــــــــوذ بــــــالله من كلــــــــــــمة انا


انا .. والنجوم وهواك .

موضوعنا النهارده عن جملة جميلة ومقولة رنانة وناس كتير اوي بتقدسها زي ميكون مثلا نزلت من السما او احتمال تطلع تعويذه لتحضير الجان . من ايام الهكسوس
وهي " انا واعوذ بالله من كلمة انا "

انا بصراحة اتخنقت اوي جدا كيك وكرهت الكيك والحلبسة . مهو مش معقول العالم كله يتقدم واحنا نفضل ماسكين في حاجات انا متاكد ان ابو جهل مكانش بيعملها

دخلت مناقشة مع واحد حول موضوع خاص بالموبايلات . يعني ممكن تقولوا كده حوار فني هندسي تكنولوجي . ساب الموضوع كله ومسك في كلمة " انا " اللي عمال اقولها

تقولشي مثلا ظهر قدامه عفريت عمره 5000 سنه او اتضح بالادلة القاطعة الساطعة اني قتلت ابوه !!! ساب الموضووع كله وقالي " انا واعوذ بالله من كلمة انا " مش مغرور زيك وهقعد اقولك انا ووانا

قولتله ليه بس قالي عشان حرام تقول كلمة انا دي كتير عشان دي غرور .!!!

ايه ده ؟؟ انا اينعم كان عندي برد وكحة اليومين اللي فاتو . بس مش معني كده اني رجعت عصر الجاهلية وانا نايم . او اني نمت حقبة زمنية تضاهي الخمسميت سنه يعني
قولتله ليه يا حموكشة ؟ قالي عشان الشيطان قالها في القران " انا خير منه " .. قولتله عشان كده ؟

طيب ايه رايك بقي يا ابن المعووجة اني هغير اسمي وهخليه انا انا انا . او اقلب بنت واسمي نفسي " آنا " عشان بس اغيظه
وطبعا اكيد فيه ناس منكم بتقرا دلوقتي وبرده سمعت من ببهاتها او جداهاتها ان كلمة انا كتير غلط . ده يمكن وانت بتقولها كتير لسانك يقع مثلا . لانها حرام قولا وفعلا . وملعونة في الاسلام والمسيحية والانجيل والزبور .. والبهائية كمان والحيزبونية .

مش كده وبس . ده مياده الحناوي عاملة اغنيه اسمها " انا بعشقك " وقالت فيها ييجي تلتميت انا . يا نهار ابيض . علي كده الست دي مطلوبة من المخابرات العامة وامن الدولة والجهات المعنية بالتكفير والهجرة . و خرجت من الملة الانسانية وواجب علي الاعلام المستنير بتاعنا انه يطلع بيان باباحه دماءها والرجم واجب عليها حتما ولا بد .

مهو احنا كده . شعب فالح ومتمسك اوي بالايه الكريمة . " وإذا قيل لهم اتبعوا ما أنزل الله قالوا بل نتبع ما ألفينا عليه آباءنا أولو كان آباؤهم لا يعقلون شيئا ولا يهتدون " صدق الله العظيم .. اهو انا متاكد دلوقتي ان الايه دي فعلا نزلت فينا والقران ده فعلا كله معجزات ومهما الزمان مشي واتحرك والعقول اتغيرت فسيبقي الشعب المصري هو الشعب الوحيد الذي يحتفظ بسر التخلف لنفسه .. والحمد لله انا متاكد ان السر ده مش هيتسرب لمئات والوف السنين

طيب يعني الرسول عليه الصلاه والسلام قال " انا النبي لا كذب .. انا ابن عبد المطلب " هل ده غرور ؟؟؟
الله عز وجل قال في القران " اللا الذين تابو واصلحوا وبينوا فاؤلئك اتوب عليهم وانا التواب الرحيم " هل هذا غرور . تعالي الله عز وجل .

فعلا يا جماعة اصبح المقولات المصرية والامئلة الافعوانية منتشرة بطريقة غريبة . تقولشي ملاريا وما صدقت تطلع !!! طب ليه منمشيش علي النهج السليم ؟ ونتعلم الصح من الغلط .

هو احنا ناقصين يعني ؟
الحمد لله الشعب المصري تغلب علي حاجتين طول فتره حياته .. الزمن . والمسخرة
الزمن تغلب عليه انه طلعه من احداثياته اصلا ومن دايره وجوده . لان الانسان المصري بقي همه علي بطنه وبس ويتجوز وبس ويروح بيته في اليوم المقرف في المواصلات الزفت وبس . بلا زمن بلا نيله . ده احنا حتي مش بنلبس ساعات . ولو اتكلمت يقولك " هو احنا هناخد زمانها وزمن غيرنا . لا مؤمن .. عليا الطلاق مؤمن

مش كده وبس . دا احنا حتي بنربي ولادنا علي كسر حاجز الزمن وبنعودهم علي ان الزمن ده اخر حاجة نفكر فيها . ولادنا ماشاء الله متعلمين جامد اوي . الواد عايد 4 ابتدائي خمس مرات . متعلم فعلا ً

والمسخرة . الشعب مش عايز توصيه . استخدم المثل اللي بيقول داويها بالتي هي الداء . فلازم كلنا نمشي مع الموجة عشان نتغلب عليها . لذلك لم تعد المسخرة ولا التقاليد الغربية تمثل لينا اي مشكلة . لان المسخرة اصبحت جزء مننا . حياتنا لبسنا اعلامنا كمبيوترنا .. حتي التلاجة كريازي فخري واعتزازي

الحقيقة هي ان الابعاد التلاته اللي العلم قال عليها . احنا مش بنخضع لحاجة منهم . واصبح الشعب هايم في فضاءه الخاص . ودماغه الخاصة . معلش بوجع دماغكو . اصلي جعان والاكل علي النار . وانا معاكو لحد ما يخلص

اصبح العقل المصري . لا يخضع لقانون الجاذبية ولا قانون الفكر الدولي . والمعجم بتاعنا مش المعجم الوسيط . ولكن المعجم البسيط . اللي من فئة اديني في الهايف وانا احبك يا ننس وبرده اقول . هو ده اللي انا عارفه واللي ابويا رباني عليه

نفسي بجد يا جماعة نتغير . وميبقاش افعالنا ناتجة من عصر تخلف .. ماضي عقيم .
عايزين فكرنا يكون متجدد ومستقيم

ايه المانع ان يطلع جدك كان غلط . والافعال اللي كان بيعملها غلط ؟ هو اينعم احتمال تتحرم من الميراث واهلك يطردوك بره البيت ويسحبوا منك المحمول ومتتغداش النهارده لحمة وفراخ . بس علي الاقل هتكون حطيت اول حجر من حجر الاساس . في تكوين شخصية جديده في عالم يخلو من الجهل . يخلو من الغبار الفكري .. يخلو من القولقاس ... اصلي بكرهه اوي

وشكرا ونتقابل عند مقوله جديده . لان باين ان الاكل شاط

كان معكم : انا كعبوووول


الاثنين، 8 ديسمبر، 2008

العـــيد فــــرحة ... مااااااااااااااااااء



السلام عليكم

كل سنه وانتوا طيبين يا حبايبي . والله وحشتوني
وقولت لازم انزل بوست عشان الخرفان والجديان والجمال .. وما زاد وزنه وغلا ثمنه

طبعا النهارده اول عيد الاضحي اعاده الله علينا وعليكم باليمن والبركات ويا رب دايما يبقي حياتنا كلها سعاده وانبساط ولحمة وبسكويت وفطير واي حاجة حلوة بتحبوها ... وطبعا مش هننسي البلح الزغلول عشان اليومين دول غلي بقي باربعة جنيه .. معرفش ليه كده !!!

الحمد لله ااتحدت الاراء السنه دي اننا نجيب جاموسة - اعزنا الله واياكم - وقولنا بقي نضحي بيها وناكل وناكل لحد ما نفقد الوعي . اهو برده يوم في السنه ولازم كله ينبسط

نزلت صليت ورجعنا عشان ندبح . طبعا وقفنا في الطابور عشان كان الجزار كان مشغول . كان فيه في ايده جمل بيخلص عليه

طبعا انا فرحت . ووقفت عشان هييييييه اول مرة اشوف جمل وهو بيندبح . ويا سلام لو كان فيه شويه اكشن والجمل يجري في الشارع ويموتله اتنين تلاته ويكسر العربية الجيب اللي كانت واقفة قدام البيت عندنا .. اصلها كانت موديل 2008 !!

وحبذا لو في حبه دراما والجمل يدوس علي واحده عجوزه عندها 83 سنه وييجي بنتها تعيط ونحوش ونمسك الجمل .. يللا اهو كله عيد
طبعا الجمل كان واقف بياكل لا ليه ولا عليه . المهم الجزار دبحه خلاص وتناثرت الدماء والصيحات والتصفيقات . زي ميكون خدنا كاس اليابان مثلا او ان خير اللهم ااجعله خير الريس ساب الحكم

طبعا دي حاجات مستحيله انا عارف بس يللا اهو عيد واللي عايز يحلم يحلم
جه دورنا وطلعت الجاموسة بتاعتنا علي المنصة عشان تقابل المصير المحتوم المظلم .. بس يللا كلهم لها

وتم الذيح والتسليخ وكله يروح البيت يللا واتقسمت وانتهي الموقف .
وانا ماشي لقيت فيه جدي هيتدبح . قولت اقف اتفرج اشوف المسكين ده وهو بيقابل نهايته المهببه . بس بجد حسيت بجوع جامد اوي .. احتمال عشان مفطرتش . احتمال

المهم بصيت في عيون الجدي .. مش حبا فيه .. اصلي كنت شاكك ان عيونه خضرا . بس طلعت عسلية .. زي عنيا .. مش عايز معاكسة
حسيت ان الجدي عايز ينطق ويتكلم .. قولت اكتبله بيتين واهديهملكوا
ده حوار بين صاحب الجدي والجدي نفسه وهو واقف علي الميزان بيتوزن الوزنه الاخيره

فالجدي كان زعلان فالراجل بدا الكلام وقال :

الا يسرك ان تكون اضحيتي .. فتحل في لحمي وفي اعصابي
وتكون عزما في دمي .. ووجبه غداء لي ولكل احبابي
فاجابه الجدي بكل اسي .. والموت يخنقه اليك جوابي
ماذا جنيت انا ؟؟ ............ فحق عقابي ؟
افعلت فيكم اي جريمة ؟ ... اين العدالة يا رفاق شبابي

فتبسم الرجل بسمة هازئ ... واجاب من خلف كل الاسوار
لا اين . فالشرع المقدس هنا .. ذبح الجديان بايدي الجزار

وهنا الجزار انهي القصيدة الماساوية دي وسال الدماء في الشارع .. لدرجة ان فيه عربية جت بسرعة ترطشت علي هدوم اللي واقف جنبي .. يللا مش مهم هو كان طويل اصلا ومش شايف منه حاجة

اهئ اهئ اهئ .. انا حزين عليا الجدي الغلبان اللي راح فطيس ده .. بس زمانه بيتوحوح علي الشواية دلوقتي . واكيد انا هشترك في اكله كمان يعني صوابعي ستلوث بدماء الجريمة دي

اوصيكم واوصي نفسي يا جماعة .. الشواية ثم الشواية ثم الشواية ... لازم تنوعوا في الاكل . حته مسلوقة علي حته مشوية علي حته لاخوكوا الغلبان اللي عمال يكتب ده .

اللي عايز يبعتلي لحمة يبعتلي علي ص.ب 14 حارة الجديان .. ميدان ابوالعلا شارع ابو الفدا متفرع شارع الجامعة امام بتاع العصير اللي قفل وحول سمكري سيارات

وطبعا بالنسبة للناس اللي لسه مدبحتش ولسه هتضحي اليومين اللي جايين دول . الاضحيه لازم تكون سليمة مفهاش مشكلة يعني متكونش لاعبه دور بوكس ورجليها اتكسرت او لسه راجعه سباق وعنيها طارت

او واحد مثلا حط الخروف علي السطح فالخروف حس بالوحده فعمل اسبرنت في الشارع والراجل نزل جابه وضحي بيه .. لا طبعا مينفعش . هي سلطة ؟
واللي هيجيب حاجة اكبر من الخروف ( زي دكتور شهاب مثلا او محاسن صابر ) يا ريت يجبها فوق ال 400 كيلو لانها مش هتحدف لحم كتير .. صدقوني انا شفت بعنيا محدش قالي

وبالنسبة للفشا والكلية والكرشة والحاجات الغريبة دي .. مليش دعوة بيها لاني مش بحبها اصلا ً
ومحدش يسيب راسة لحد .. قصدي يعني راس الاضحيه . اهو برده تاخدها تخلي الواد يلعب بيها في الشقة او يخبط بيها اخوه او الست الوالدة تاكلكوا لحمة راس . فاهم يا ابو رامي ؟

واخيرا ً . اقول من كل قلبي قلبا وقالبا ومقلوبا ً .. لا تنسوا اخوانكم المساكين والفقراء والمدونين . وكلوا بثوابه
احنا برده كاتبن واكلين شاربين نايمين مع بعض .. ولا بنصون اللقمة الحرام . ومتنسوش الريجيم

اخوكم . مخنوق .. بس مش اوي لاني رايح اكل
القاكم بعد العيد بقي

وتحياتي لمحاسن صابر وابو علي ( ladies first ) والدكتور شهاب وكل الحبايب الحلوين وكل سنه وانتوا طيبين

كن دائماً بين الخراف مع الجميعْ
طأطيء و سر في درب اسرتك الوضيع
أطع الذئاب يعيش منا من يطيع
إياك يا ولدي مفارقة القطـيع
ن أنت أتقنت الهروب من النزالْ
تحيا خروفاً سالماً في كل حال
تحيا سليماً من سؤال و اعتقال
من غضبة السلطان من قيل و قال
ما العز ما هذا الكلام الأجوفُ
من قال أن الذل أمر مقرف
إن الخروف يعيش لا يتأفف
ما دام يُسقى في الحياة و يُعلف