السبت، 22 نوفمبر 2008

حوار فكـــري خاص .. علي قـــهوة الــــمدونين .. إهـــداء للجميع



حبايب هارتي . انا وعدت كتير منكم ومن اللي كلموني اني لازم اعمل بوست فريد من نوعه .. بوست هيجمع كل الحلوين وهجيب اسمهم واحد واحد .

وانا ماشي في مشوارى الفكري تعبت ودماغي وجعتني قولت ادخل استريح شويه في اي قهوة او كافيتريا مودرن .. زي ما بعمل لما بكون في التحرير بدخل كافيتريا زد - او اهبر هبره في كنتاكي واطلع اجري . كده يعني

او ادخل علي كافيتريا نصبايه اللي في جنب هيلتون رمسيس اضرب سحلب ومدفعش .

عنيا اتكعبلت في قهوة المدونين . اللي جنب وادي النيل وانت رايح عبد المنعم رياض

دخلت طلبت شاي سكر بره - ولمونة .. اصل انا كان عندي برد . اصل انا راجل صحي جوي جوي

قعدت وانتخت بس قبل ما الشاي يوصل بصيت جنبي الاقي مين .؟؟؟؟ مين ؟!!!!

حبيب هارتي ومعشوق الجماهير ومشهور الفضائيات المحلية . ابو علي

ابو علي : حبيب الروح . اتاخرت ليه عليا يا كيك

مخنوق كيك : معلش يا كبيرنا .. اصلي كنت جعان فريحت علي عربية كبده ضربتلي اتنين كبده وسجق وجيت

ابو علي : وايه اخبار الحياه معاك يابني ؟

مخنوق كيك : عايشين بفضله خيرك وتحت ضلك يا حانينا

ابو علي : عرفت انك مجروح وقولتلك اللي يروح يروح . دي الصحة اهم حاجة والدنيا مش محتاجة

مخنوق كيك : بس الدنيا قايمة عليا يا كبير والصحة علي الاد .. يللا بقي اللي حصل حصل . انت لسه عايش في التقارير بتاعتك دي والادوية ؟

ابو علي : اعمل ايه طيب مشغل تحت ايدي شويه نقاشين . محدش عارف يظبط الورق

مخنوق كيك : هو ورق حائط وللا ايه ؟

ابو علي : لا دي اوردرات ادوية وحاجات مطلوبة . يللا اقوم انا عشان مستعجل . يللا باي

بقيت قاعد لوحدي . هرشت في دماغي وقولت اتجول في المكان - ابص يميني اخبط في شيشة .. ابص لصاحبها الاقي مييييييييين ؟؟ اوببببس

مخنوق كيك : حبيبي . طويل العمر يطول عمره وينصره علي مين يعاديه هاي هيئ .. والسلام علي طول شارع السلام للدكتور رامي .

دوك رامي شهاب : ايه يا مخنوق فين الحلقات اللي قولتلي عليها .. يعني انا ضربتلي حجرين لحد دلوقتي ومفيش نتيجة ؟ كل ما اسال عليك الاقيك في البورصة .. انت متعرفش ان البورصة ضاره بالصحة ؟

مخنوق كيك : معلش يا برنس الليالي . الواحد لازم يدوس بقلب جامد . بس من الواضح ان الدنيا هي اللي داست عليا . يللاظروف وهتعدي .. محدش بياكلها بالساهل

دوك رامي شهاب : ايه ده انت كنت في الساحل ؟؟ ايه بتعمل ايه يا لئيم بتاكل سمك وللا ايه ؟

مخنوق كيك : ركز معايا وحياه الشيشة اللي في ايدك .

دوك رامي شهاب : مهو انت اللي مش عايز تفهمني يا معلم

مخنوق كيك : الموضوع اني فاضي ومخنوق قولت ادخل البورصة والاستثمار بس كانت تجربه قاسية وخلاص خلصتها

دوك رامي شهاب : يعني افهم من كده ان موضوع البرصه انتهي خلاص واتحل ومش هيتقبض عليك في القريب المستعجل ؟

مخنوق كيك : طب من بقك يا دوك .. قصدي تف من بقك . دنا حتي بفكر ابني كنيسة وجامع وادخل الانتخابات . واكسب اصوات كتير وانصب علي الناس واهرب بره البلد

دوك رامي شهاب : بس كده الموضوع خلص من غير ما اخبط سؤال كالمعتاد .. هل هذه هي السعاده ؟؟

مخنوق كيك : يا عم دسوقي غيرله الحجر باين عليه دماغه ونونت .

طبعا قمت بسرعة قبل ما يدخلني في السياسة ويلبسني قضيه قبل ما ابني مستقبلي وانصب نصبايه حلوة اامن بيها مستقبل العيال .

وانا قايم طالع اجري لقيت واحد حط رجله قدامي كنت هقع جوه طبق الفول اللي قدامي . اصل كان فيه ناس بتتعشي

ابص لروحي فجاه . تعبت من المفاجاه . ونزلت دمعتي .. ايه ده انا قلبت مغني وللا ايه .؟ المهم بصيت لقيت احد عملاء البرجوازية المقعره والشيوعيه اللي دايما بيدخل المدونة بتاعتي بيحبطني ويغلبني في البنج

غير معروف : ايه يا مان ؟ انت علي طول بتتغلب وتتكعبل كده ؟ ما تفوق وانت ماشي

مخنوق كيك : بقولك ايه يا يللي متتسماش انت . انا مخنوق من ام الدنيا ومش ناقص حواديتك المحروقة دي

غير معروف : ليه يا اكسلانس ده كنت ناوي اكلك عيش غراب من المزرعة اللي انا شغال فيها بالليل . ده الكيلو باربعين جنيه يا واد

مخنوق كيك : مش عايز حاجة ووريني عرض قفاك من هنا ومشوفكش غير الجمعة اللي جايه امام صاله البنج عشان اعلم عليك

طبعا مشيت وانا زعلان . لقيت القلب الحنون بيطبطب عليا ويقولي متزعلش يا كعبول . ( كعبول ده اسمي الحركي لما كنت بطلع دهب وسفاري وكده ) تعالي هنا اقعد جنبي

مخنوق كيك : حبيب هارتي رامي اخيرا اتقابلنا . فينك يا عم وفين ايامك وعربيتك ولياليك الحلوة

روميو : هنا يا معلم بس معلش كنت مشغول في كود كان مطلع عيني . كنت محشور جوه الدي اس ال كنت بدور علي برنامج برمجه نضيف

الاقيش عندك واحد يا بوب ؟

مخنوق كيك : متلاقيش ومش هجيبلك , لما ابقي احوش فلوس النت هبقي ادخل ادورلك . لكن دلوقتي الحياه فحت وضنك وكيك . وبحاول اكمل علي القرشنات اللي معايا عشان اعيش للقرن اللي جاي .

روميو : يا عم متكبرش الموضوع انت بس عيش وخلي الناس تعيش

بصراحة انا اتخنقت من القعده دي انا هروح علي قسم الحريم احسن . اصل قهوة المدونين دي فيها قسم للرجاله وقسم للسيدات . فيه برده شيشه متخافوش

طبعا لازم عشان ادخل ادفع الرسوم . اطلع ايدي في جيبي واطلع جنيه وادفع الاقي مين ؟ يا للهول ؟ يا سماء امطري ملوخيه !!

مخنوق كيك : المدونة الكبيرة " عايزه اطلق و .... " يا محاسن الصدف . ايه اللي جابك هنا ؟

محاسن صابر : اهلا يا مخنوق . طب اعمل ايه طيب ؟ الكاميرات بتطاردني في كل مكان . اضطريت اجي امسك الكاشير هنا في القهوة يمكن اقدر اعيش حاله الامان اللي بدور عليها .

مخنوق كيك : بس انتي كده مش هتعرفي تحاربي الرجاله ولا تشجعي الفلانتاين زي ما عودتينا

محاسن صابر : خلاص الوقت ازف ومحسن طلع كداب والنفاق بقي مالي حياتنا

مخنوق كيك : انا حاسس اني قاعد مع يوسف وهبي يا اخواتي . طب ممكن نغير الموضوع . قوليلي طيب انتي متوقعه الاهلي ياخد مركز كان في كاس العالم ؟

محاسن صابر : بقولك ايه الاهلي ده عملي استحبس في نفسويتي وعايزه فتره نقاهه من الدنيا . روح اضربك كوب قهوة بعيد عني ولما تخلص ابقي تعالي حاسب

مخنوق كيك : طب مش ممكن اشرب القهوة وامشي من غير محاسب لحسن انا معييش فلوس اليومين دول .

محاسن صابر : وماله . اتفضل اشرب وامشي . وانا هبلغ عنك قبل ما توصل بيتكو .

مخنوق كيك : طب انتي هتفضلي قاعده لحد ما اجي ؟

محاسن صابر : متقلقش " هفضل كده وابقي قابلني لو حاجة حصلت "

طبعا مشيت وانا زعلان وكنت لازم اضرب قهوة عشان انفع المكان باي حاجة . ولو كان فيه كشري كنت ضربت واحد . يللا اركن انا في اي جنب يمكن الاقي واحده حلوة تطري القاعده

وانا قاعد بتفرج علي المكان لقيت الويتر جاي ومعاه شوب مانجو مش عارف ليه نفسي راحت للمانجو .. مش البانجو .. لا المانجو

الغريبة ان الراجل حطه جنبي . افتكرته ليا قالي لا .. دي للانسه اللي جايه هناك دي

مخنوق كيك : انا مش مصدق . HABIBA قاعده جنبي وبتضرب مانجو . لا مش معقول ؟ ده شئ لا يسدكه عكل . !!

حبيبة : ازيك يا مخنوق . عامل ايه ؟

مخنوق كيك : تمام . بس كانت مفاجاه اني اشوفك هنا . انتي مش المفروض تكوني قاعده علي النت بتضربي علي الكيبورد وبتنشري الاخبار في كل مكان ؟

حبيبة : يا عم مفيش نت عندي وقاعده فاضيه قولت اجي هنا اشوف الحبايب . وبالمرة اخبط مانجه اصل عندي صداع . اصل الناس بقوا عاملين قلق جامد والحياه بقت مش ظريفة

مخنوق كيك : قولت في نفسي "اخيرا هلاقي حد حاسس بخنقتي .. هيشاركني احساسي واحتمال اشاركها المانجه اللي معاها . وابو بلاش كتر منه " ليه بس يا حبيبه ؟ هو انتي لسه زعلانه علي مديحة ؟

حبيبة : لا هو مش معني ان مدحت غدر بيها يبقي هو غلطان . هي غلطانه انها وثقت فيها اصلا من الاول . المفروض كانت تقرا قوانين الجاذبية كويس وتعرف ان الحب مش سهل كده . ده حتي المسافة بتتناسب طرديا مع الشاورمة .

مخنوق كيك : اهلا بيكي في عالم التهييس يا حبيبه . لا حقيقي باين الويتر ده حطلك حبيتين تهييس في المانجة . انا مش عايز مانجة انا هقوم اقعد بعيد

واهو بالمرة ادخل الحمام لحسن الجيل اللي علي شعري بدا يقع .

طبعا زي العبيط قمت داخل الحمام ونسيت اني في مكان تحكمه قبضه السيدات . طبعا اخدت علقة مخدهاش عبد اسود في عصر المماليك لما دخل عنبر الستات علي راي جعناوي .

وطبعا محاسن صابر كانت مبسوطة لانها من انصار الستات كالمعتاد

لم اتوقع بعدها ان ممكن فيه جنس واحده ممكن تتعاطف معايا في القعده الظريفه دي . لكن غريبة طلع صوت كده وقال " حرام عليكم " ده مكانش يقصد . طبعا افتكرت انها حبيبة . لكن اتضح ان حبيبة مشغولة في المانجة بتاعتها وكسلت تقوم تدافع عني

مخنوق كيك : ايه ده . دنا ناسي ان فيه واحده اسمها سومة كانت بتزور المدونة بتاعتي

سومة : معلش يا مخنوق مشغولة . معلش علي اللي حصلك ده بس انت غلطان ايه اللي دخلك كده من غير ما تعرف . تعالي اقعد وملكش دعوة بحد قصدي بحده .

مخنوق كيك : وانتي ايه مشاريعك اليومين دول يا سومة .

سومة : مفيش هتجوز واقعد جنب امي

قعدت بقي واللي حصل حصل . طبعا عنيا ورمت قولت اقعد اشرب شاي واخلع من القهوة دي خالص اروح بيتنا احسن

اخيرا ً . شفت واحده جايه وجايبالي تلج وكبايه شاي . انا كنت متوقع انها هربانه في الجبل او مستخبيه في اي حته لكن الحمد لله طلعت عايشه

مخنوق كيك : يخرب عقلك . ومش خايفه حد يشوفك يا مولان ؟

كيارا : اسكت انا مش عارفه ايه اللي بيحصلي ده يا مخنوق . المدونة اتعملها هاك والرساله بتاعتي مش عارفه اركز فيها ولا عارفه اعمل حاجة . دي مؤامرة عليا

مخنوق كيك : معلش بقي يا كوكي . هي دايما الشجره المثمرة الناس بتخبطها بالفاصوليا

كيارا : يا عم دول اخترقوا الموقع وبوظوا كل حاجة . انا حزينه خالص

مخنوق كيك : معلش معلش . هاتي بس التلج اللي في ايدك ده عشان وشي ورم ومش شايف حاجة . وانتي ازاي تغيري نشاطك من غير ما تقوليلي ؟

كيارا : يا عم مغيرتش حاجة دي زمبه ضربوها فيا بس الحمد لله مسحت المدونة

مخنوق كيك : وانتي بتعملي ايه دلوقتي بعد ما غيرتي نشاطك ؟

كيارا : بفكر اجيب ميكروباص واشغله علي خط الهرم .

مخنوق كيك : فرصه عظيمة وانا هكون زبون دايم عندك لاني راقد علي الخط

كيارا : بس متقولش لحد لان الموضوع لسه في اطار السر ولسه مقولتش لصحباتي في التدوين . وده سر لو حد عرفه احتمال كله يدخل في الكار ده وملاقيش عربية فاضيه اطلع بيها

مخنوق كيك : سرك كبير . وكده فيه سرين " انك مدونة و سواقة ميكروباص " .... وشكرا علي التلج


وهنا خلصت رحلتي في قهوة المدونين اللي كانت ممتعه فعلا ً وكان نفسي تستمر اكتر من كده بس للاسف كنت لازم اروح اشرب النسكافيه اليومي بتاعي واتغطي وانام عشان اروح تاني يوم التجنيد اخلص ورق سفر وكلام من ده

وبكده قصتنا انتهت والقاكم علي خير و اوعي حد من الابطال يزعل مني .

واهديلكم الاغنيه اللي شغاله دي " بطمنك " .. هي اكيد خلصت بس ابقوا رجعوها بقي









الخميس، 20 نوفمبر 2008

البورصة جرحتني .. والمجتمع بيتآمر عليا ... انا هموت نفسي


اهلا بالحلوين اللي منورين النت ليل نهار

معلش يا حلوين كنت مشغول اليومين اللي فاتوا دول وكنت مخنوق كيك من العالم القاسي اللي انا عايش فيه
في المجتمع المتوحش . خلاص الواحد مبقاش ليه قيمة في الحقبة الزمنيه السائدة الراهنه .

وبشكر كل اللي سالوا عليا علي الايميل واللي بعتولي جواب علي البوسطه وبقولهم بلاش البوسطه عشان انا متراقب

مبقتش عارف انام غير 12 ساعة بس . حاسس ان الناس كلها بدات تكرهني .
وبقيت اغني اغنيه " اانا مش عارفني " للانسان الحيزبون عبد الباسط تقريبا ً .

مش عارف دي مؤامرة وللا ده الطبيعي . المهم انا قولت ادخل اهيس شويه وافضفض لان فيه ناس عضتني علي الماسنجر وناس حدفتني بالطوب علي الايميل وكانوا جايين يوقعوا البيت
وقالتلي انت مبقتش بتكتب ليه . ومش هنسي طبعا الدكتور الكبير ملك التوفير رامي شهاب .. ذكرني في الموضوع بتاعه ..

وكان السبب الاساسي اني ادخل دلوقتي اوجع دماغوا . اهو برده احسن من المسلسلات العبيطة بتاعه اليومين دول ومين قتل مين وجاري البحث عن مين
.. دنا حتي من السقعة بقيت زي حمبوذوا لاوي بوزوا ابو ماخير حمره .
يللا مش مهم . كنت بتكلم مع واحد صحبي امبارح قعد يلعنلي في الخطوبه وايام الخطوبة زي ميكون خلاص هيتعدم يا عيني ..

الولد لسه عنده 21 سنه وبيقولي انا ايه اللي خلاني اتخبط في دماغي واخطب .. الفلوس مبقاش فيها بركة وكل يوم والتاني 4 كيلو برتقان
علي كام كيلو موز لحد مالواد يا عيني فلس .
وبعد كل ده كمان الواد لسه مخلصش الكليه وعنده جيش .. ده ليله اهله فحلقي . قال بيقولي انا كده هبقي خلاص شقيت نص الطريق ..
قلتله انا رايي تشوفلك ماطوة تشق النص التاني وتموت نفسك
اما بقي الجزء الخاص بحبيب هارتي رامي راجل مهندس الكترونيات بس ايه .. دماغه لاسعه خالص وكل يومين يصرف علي العربية لحد ما هتجيب اجله .
انا قولت بقي ابخ المحادثة هنا واحدفهالكوا وهي خير دليل . والاعتراف سيد الماديلية


KOLLOMASHY says:
انت يا عم

KOLLOMASHY says:
انا بائس وحزين

Romaryo says:
حبيبى وابن حبيبي

KOLLOMASHY says:
واستحق الرمي بالرصاص في موقع عبد المنعم رياض واول
مرة احس ان اسمي علي المدونة فعلا ليه معني " مخنوق كيك "
انا عايش في ظلمات الليل وحيدا يا رامي بسمع ليلي مراد ومش
عارف اعمل ايه ؟؟

Romaryo says:
لقيتك بيزى قلت اسيبه يعيش يومين .. ليه بس خير يا حبيب الجماهير!! قلقتني

KOLLOMASHY says:
انا مينفعش اعيش اكتر من كده يا رامي

Romaryo says:
مهو مرة انا .... مرة انت

KOLLOMASHY says:
خلاص اخر دقايق في حياتي

Romaryo says:
مين اللى هيموت دلوقتى .. انت وللا انا ؟

KOLLOMASHY says:
انا
KOLLOMASHY says:
انا مشيت في موضوع الاستثمار علي النت يا حجوج

KOLLOMASHY says:
والحمد لله حطيت اكتر من 400 دولار علي موقع استثمار

KOLLOMASHY says:
موثوق فيه

KOLLOMASHY says:
النهارده بنك الليبرتي نصب علي الشركات دي

KOLLOMASHY says:
والدفع اتوقف

KOLLOMASHY says:
وانا كده هخسر حوالي 400 دولار

KOLLOMASHY says:
وفيه شبه انقلاب علي النت ومظاهرات زي ميكون اذاعو خبر العبور

KOLLOMASHY says:
والناس زعلانة

KOLLOMASHY says:
وانا اولهم طبعا

Romaryo says:
400 دولار . يا خسارتك يا دياسطي

KOLLOMASHY says:
بلاش ام الوش البائس ده كفايه عليا

Romaryo says:
بائس وبس

Romaryo says:
انت تستحق الرمى بارصاص فعلا

Romaryo says:
بالرصاص *

KOLLOMASHY says:
فعلا

KOLLOMASHY says:
انا هنتحر يا رامي

KOLLOMASHY says:
هشرب النسكافيه باللبن واقوم انتحر

Romaryo says:
لا لا
Romaryo says:
انتحر الاول

KOLLOMASHY says:
انت بتهرج صح ؟

Romaryo says:
النسكافيه كتير عليك

KOLLOMASHY says:
انا خسران اكتر من 2000 جنيه

KOLLOMASHY says:
وانت بتهرج

KOLLOMASHY says:
انا مش عارف لو عرفوا صحابي في البلياردو عرفنوا هيعملوا فيا ايه

Romaryo says:
ياعم انت عبيط ولا ايه

Romaryo says:
مش عارف اللى حصل فى البورصة

KOLLOMASHY says:
ما هو ده اللي مهون عليا يا حبي

Romaryo says:
واحد صاحبى خسر فى كام يوم اكتر من 60 الف جنيه
Romaryo says:
والتانى مش فاكر كام

Romaryo says:
والتانى الشركة بتطاردة وهربان

KOLLOMASHY says:
ده اللي مخليني ماسك اعصابي ومتمركز في الشقة

Romaryo says:
وانت جاى 2000 وهتموت نفسك

Romaryo says:
امال الناس دى تعمل ايه

KOLLOMASHY says:
دي اول لسعه ليا

KOLLOMASHY says:
ولسه ما اخدتش علي الوضع يا ابو رامي

KOLLOMASHY says:
انا جالي كابوس النهارده وانا نايم

KOLLOMASHY says:
ان في عربية راكب فيها موزه جامده بنت جزمة خبطتني

KOLLOMASHY says:
ومت

KOLLOMASHY says:
تخيل

KOLLOMASHY says:
العربيات بتتامر عليا في الحلم يا رامي

KOLLOMASHY says:
محدش بيرحم حد في الزمان ده

Romaryo says:
هههههههههههههههههههه

Romaryo says:
ياعم كبر دماغك

Romaryo says:
ماهو برده انت استعبطت

Romaryo says:
انا من الاول قولتلك ان الحوارات دى فاشلة

Romaryo says:
وانت لانك عربى اصريت على الغلط

Romaryo says:
اعمل فيك انا ايه دلوقتى
Romaryo says:
اودى وشى من الناس فين
Romaryo says:
اقوللهم ايه
Romaryo says:
اقوللهم مديحة جابت بنت
Romaryo says:
ياعم عادى المفروض بقى تجيب باقى فلوسك معايا
Romaryo says:
علشان مابعزقهومش
Romaryo says:
وانا هحطهملك فى الحفظ والصون
Romaryo says:
هاتهم انت بس

KOLLOMASHY says:
خلاص يا عم لو رجعوا بعد عمر طويل يعني هبقي ادهملك
KOLLOMASHY says:
بس انا بحاول اهرب من نظرات الناس ليا يا مان
KOLLOMASHY says:
حتي بتاع البلح الزغلول النهارده اديتوا 20 جنيه واخدت كيلو اداني باقي عشره جنيه بس
KOLLOMASHY says:
شفت المهزلة ؟
KOLLOMASHY says:
انا مكنتش اعرف ان الاستثمار بيقلل من قيمة الواحد للدرجة المخيفة دي
KOLLOMASHY says:
انا مذهوووووووووووول
KOLLOMASHY says:
انا لو جرالي حاجة يا روميو مش هسامح نفسي ابدا

Romaryo says:
ولا انا هسامحك
Romaryo says:
مصر كانت امانة فى ايدك
Romaryo says:
وانت ضيعتها
Romaryo says:
وسبتها تروح لامها

KOLLOMASHY says:
ههههههه ههههههه .. متقلبش المواجع الجرح لسه واجع
والقلب اللي انت بعته رايح ومش راجع

KOLLOMASHY says:
يا عم خليها تروح في ستين داهيه انا مالي
KOLLOMASHY says:
يعني مصر جرحتني في التجنيد .. وجرحتني في فلوسي كمان !!


Romaryo says:
خدها من عمك مجدى بتاع الكهرباء
Romaryo says:
او عمك ثبرى
Romaryo says:
صبرى *
Romaryo says:
هو اانا اللى عضيت لسانى ولا الكمبيوتر اللى بيهيس
Romaryo says:
او يمكن من الجوع :

KOLLOMASHY says:
ههههههههههههههههههههههههههه
KOLLOMASHY says:
انت باين عليك دماغك فاضية ورايقة وعربيتك مووووز
KOLLOMASHY says:
دي دماغك اللي اتلسعت من الزعل عليا

Romaryo says:
لا لا .. انا لما اجوع كود برمجة دماغى بيرمى ارور
KOLLOMASHY says:
لا يا عم قوم خلاص كل

Romaryo says:
هنزل لامى الاقيها دلوقتى مضيعالى رجيم شهر

Romaryo says:
بتظبطنى ماما دى والله

KOLLOMASHY says:
وانا هقوم اضربلي جوفاياه.. يمكن تصبرني علي الازمة النفساوية اللي انافيها
مع ان البزر بتاعها بيقف في درسي اللي لسه حاشيه .. دي ليلة مش معديه

Romaryo says:
قوللى ياعم صحيح
KOLLOMASHY says:
لا مش هقول
Romaryo says:
احنا مش هنتقابل بقى ولا ايه

KOLLOMASHY says:
وماله نتقابل
KOLLOMASHY says:
حتي عشان اطلع غلي فيك
KOLLOMASHY says:
وفي العربية بتاعتك
Romaryo says:
وانا ياعم هريحك فى اقرب شجرى
Romaryo says:
لالا
Romaryo says:
اتوبيس
Romaryo says:
علشان يكون اسرع

KOLLOMASHY says:
يا عم ما انط دلوقتي في الدور السابع واخلص نفسي
KOLLOMASHY says:
بدل العذاب اللي انا حطيتك فيه ده
KOLLOMASHY says:
خلاص بص روح كل
KOLLOMASHY says:
وانا هروح اضرب برتقانايه
KOLLOMASHY says:
ونتقابل علي الشاي
KOLLOMASHY says:
اشطه ؟

Romaryo says:
ان شاء الله
Romaryo says:
سلام ياقمر

KOLLOMASHY says:
وابقي كبر ام خطك شويه

KOLLOMASHY says:
عشان اشوفه

Romaryo says:
حلوة قمر دى

KOLLOMASHY says
مش ناقصة
Romaryo says:
اى خدمة
Romaryo says:
مشوار اكبره .. لسه هروح اغير حجمه ؟
Romaryo says:
محسسنى ان الزرار جنبى
KOLLOMASHY says:
ههههه
Romaryo says:
ده انا بروح بالماوس اخر الدنيا

KOLLOMASHY says:
معلش لما تاكل ابقي كبره
KOLLOMASHY says:
يللا سلامووز بالموز

Romaryo says:
سلام

افتكر كده خلاص ماسأواتي ظهرت للجميع . واحتمال اليومين اللي جايين دول يبقوا يومين تهييس علي الاخر . عشان اطلع من الغيبوبة اللي انا فيها دي .. واحتمال اخطف زياره مفاجاه لشارع العريش او اقطع تذكرة في الخباسة لكازينو الليل .

واحب اصبح وامسي علي ملوك النت وعفاريت المدونات مدام محاسن - يهديلك الاغنيه اللي شغاله دي - والدكتور شهاب حبيب هارتي - هديك اغنيه بعد بكره - و الدكتور حسن ابو علي يعني قصر النيل والدقي وما يجاورها واختم كلامي لكلمات من الشاعر الفضفاض هريدي .

انت عشان ابن مصر ... لازم تشوف الويل
مهو لو كنت راجل جدع ... كنت ردمت النيل

وشكرا ليكو ونتقابل علي اول فيصل يللا باي

صحيح : اللي عايز اغنيه معينه يرزع طلبه هنا وبعد المناقشة والتمحيص والتنقيب والتعقيب احتمال ابقي اجبهالو