حبايب هارتي . انا وعدت كتير منكم ومن اللي كلموني اني لازم اعمل بوست فريد من نوعه .. بوست هيجمع كل الحلوين وهجيب اسمهم واحد واحد .
وانا ماشي في مشوارى الفكري تعبت ودماغي وجعتني قولت ادخل استريح شويه في اي قهوة او كافيتريا مودرن .. زي ما بعمل لما بكون في التحرير بدخل كافيتريا زد - او اهبر هبره في كنتاكي واطلع اجري . كده يعني
او ادخل علي كافيتريا نصبايه اللي في جنب هيلتون رمسيس اضرب سحلب ومدفعش .
عنيا اتكعبلت في قهوة المدونين . اللي جنب وادي النيل وانت رايح عبد المنعم رياض
دخلت طلبت شاي سكر بره - ولمونة .. اصل انا كان عندي برد . اصل انا راجل صحي جوي جوي
قعدت وانتخت بس قبل ما الشاي يوصل بصيت جنبي الاقي مين .؟؟؟؟ مين ؟!!!!
حبيب هارتي ومعشوق الجماهير ومشهور الفضائيات المحلية . ابو علي
ابو علي : حبيب الروح . اتاخرت ليه عليا يا كيك
مخنوق كيك : معلش يا كبيرنا .. اصلي كنت جعان فريحت علي عربية كبده ضربتلي اتنين كبده وسجق وجيت
ابو علي : وايه اخبار الحياه معاك يابني ؟
مخنوق كيك : عايشين بفضله خيرك وتحت ضلك يا حانينا
ابو علي : عرفت انك مجروح وقولتلك اللي يروح يروح . دي الصحة اهم حاجة والدنيا مش محتاجة
مخنوق كيك : بس الدنيا قايمة عليا يا كبير والصحة علي الاد .. يللا بقي اللي حصل حصل . انت لسه عايش في التقارير بتاعتك دي والادوية ؟
ابو علي : اعمل ايه طيب مشغل تحت ايدي شويه نقاشين . محدش عارف يظبط الورق
مخنوق كيك : هو ورق حائط وللا ايه ؟
ابو علي : لا دي اوردرات ادوية وحاجات مطلوبة . يللا اقوم انا عشان مستعجل . يللا باي
بقيت قاعد لوحدي . هرشت في دماغي وقولت اتجول في المكان - ابص يميني اخبط في شيشة .. ابص لصاحبها الاقي مييييييييين ؟؟ اوببببس
مخنوق كيك : حبيبي . طويل العمر يطول عمره وينصره علي مين يعاديه هاي هيئ .. والسلام علي طول شارع السلام للدكتور رامي .
دوك رامي شهاب : ايه يا مخنوق فين الحلقات اللي قولتلي عليها .. يعني انا ضربتلي حجرين لحد دلوقتي ومفيش نتيجة ؟ كل ما اسال عليك الاقيك في البورصة .. انت متعرفش ان البورصة ضاره بالصحة ؟
مخنوق كيك : معلش يا برنس الليالي . الواحد لازم يدوس بقلب جامد . بس من الواضح ان الدنيا هي اللي داست عليا . يللاظروف وهتعدي .. محدش بياكلها بالساهل
دوك رامي شهاب : ايه ده انت كنت في الساحل ؟؟ ايه بتعمل ايه يا لئيم بتاكل سمك وللا ايه ؟
مخنوق كيك : ركز معايا وحياه الشيشة اللي في ايدك .
دوك رامي شهاب : مهو انت اللي مش عايز تفهمني يا معلم
مخنوق كيك : الموضوع اني فاضي ومخنوق قولت ادخل البورصة والاستثمار بس كانت تجربه قاسية وخلاص خلصتها
دوك رامي شهاب : يعني افهم من كده ان موضوع البرصه انتهي خلاص واتحل ومش هيتقبض عليك في القريب المستعجل ؟
مخنوق كيك : طب من بقك يا دوك .. قصدي تف من بقك . دنا حتي بفكر ابني كنيسة وجامع وادخل الانتخابات . واكسب اصوات كتير وانصب علي الناس واهرب بره البلد
دوك رامي شهاب : بس كده الموضوع خلص من غير ما اخبط سؤال كالمعتاد .. هل هذه هي السعاده ؟؟
مخنوق كيك : يا عم دسوقي غيرله الحجر باين عليه دماغه ونونت .
طبعا قمت بسرعة قبل ما يدخلني في السياسة ويلبسني قضيه قبل ما ابني مستقبلي وانصب نصبايه حلوة اامن بيها مستقبل العيال .
وانا قايم طالع اجري لقيت واحد حط رجله قدامي كنت هقع جوه طبق الفول اللي قدامي . اصل كان فيه ناس بتتعشي
ابص لروحي فجاه . تعبت من المفاجاه . ونزلت دمعتي .. ايه ده انا قلبت مغني وللا ايه .؟ المهم بصيت لقيت احد عملاء البرجوازية المقعره والشيوعيه اللي دايما بيدخل المدونة بتاعتي بيحبطني ويغلبني في البنج
غير معروف : ايه يا مان ؟ انت علي طول بتتغلب وتتكعبل كده ؟ ما تفوق وانت ماشي
مخنوق كيك : بقولك ايه يا يللي متتسماش انت . انا مخنوق من ام الدنيا ومش ناقص حواديتك المحروقة دي
غير معروف : ليه يا اكسلانس ده كنت ناوي اكلك عيش غراب من المزرعة اللي انا شغال فيها بالليل . ده الكيلو باربعين جنيه يا واد
مخنوق كيك : مش عايز حاجة ووريني عرض قفاك من هنا ومشوفكش غير الجمعة اللي جايه امام صاله البنج عشان اعلم عليك
طبعا مشيت وانا زعلان . لقيت القلب الحنون بيطبطب عليا ويقولي متزعلش يا كعبول . ( كعبول ده اسمي الحركي لما كنت بطلع دهب وسفاري وكده ) تعالي هنا اقعد جنبي
مخنوق كيك : حبيب هارتي رامي اخيرا اتقابلنا . فينك يا عم وفين ايامك وعربيتك ولياليك الحلوة
روميو : هنا يا معلم بس معلش كنت مشغول في كود كان مطلع عيني . كنت محشور جوه الدي اس ال كنت بدور علي برنامج برمجه نضيف
الاقيش عندك واحد يا بوب ؟
مخنوق كيك : متلاقيش ومش هجيبلك , لما ابقي احوش فلوس النت هبقي ادخل ادورلك . لكن دلوقتي الحياه فحت وضنك وكيك . وبحاول اكمل علي القرشنات اللي معايا عشان اعيش للقرن اللي جاي .
روميو : يا عم متكبرش الموضوع انت بس عيش وخلي الناس تعيش
بصراحة انا اتخنقت من القعده دي انا هروح علي قسم الحريم احسن . اصل قهوة المدونين دي فيها قسم للرجاله وقسم للسيدات . فيه برده شيشه متخافوش
طبعا لازم عشان ادخل ادفع الرسوم . اطلع ايدي في جيبي واطلع جنيه وادفع الاقي مين ؟ يا للهول ؟ يا سماء امطري ملوخيه !!
مخنوق كيك : المدونة الكبيرة " عايزه اطلق و .... " يا محاسن الصدف . ايه اللي جابك هنا ؟
محاسن صابر : اهلا يا مخنوق . طب اعمل ايه طيب ؟ الكاميرات بتطاردني في كل مكان . اضطريت اجي امسك الكاشير هنا في القهوة يمكن اقدر اعيش حاله الامان اللي بدور عليها .
مخنوق كيك : بس انتي كده مش هتعرفي تحاربي الرجاله ولا تشجعي الفلانتاين زي ما عودتينا
محاسن صابر : خلاص الوقت ازف ومحسن طلع كداب والنفاق بقي مالي حياتنا
مخنوق كيك : انا حاسس اني قاعد مع يوسف وهبي يا اخواتي . طب ممكن نغير الموضوع . قوليلي طيب انتي متوقعه الاهلي ياخد مركز كان في كاس العالم ؟
محاسن صابر : بقولك ايه الاهلي ده عملي استحبس في نفسويتي وعايزه فتره نقاهه من الدنيا . روح اضربك كوب قهوة بعيد عني ولما تخلص ابقي تعالي حاسب
مخنوق كيك : طب مش ممكن اشرب القهوة وامشي من غير محاسب لحسن انا معييش فلوس اليومين دول .
محاسن صابر : وماله . اتفضل اشرب وامشي . وانا هبلغ عنك قبل ما توصل بيتكو .
مخنوق كيك : طب انتي هتفضلي قاعده لحد ما اجي ؟
محاسن صابر : متقلقش " هفضل كده وابقي قابلني لو حاجة حصلت "
طبعا مشيت وانا زعلان وكنت لازم اضرب قهوة عشان انفع المكان باي حاجة . ولو كان فيه كشري كنت ضربت واحد . يللا اركن انا في اي جنب يمكن الاقي واحده حلوة تطري القاعده
وانا قاعد بتفرج علي المكان لقيت الويتر جاي ومعاه شوب مانجو مش عارف ليه نفسي راحت للمانجو .. مش البانجو .. لا المانجو
الغريبة ان الراجل حطه جنبي . افتكرته ليا قالي لا .. دي للانسه اللي جايه هناك دي
مخنوق كيك : انا مش مصدق . HABIBA قاعده جنبي وبتضرب مانجو . لا مش معقول ؟ ده شئ لا يسدكه عكل . !!
حبيبة : ازيك يا مخنوق . عامل ايه ؟
مخنوق كيك : تمام . بس كانت مفاجاه اني اشوفك هنا . انتي مش المفروض تكوني قاعده علي النت بتضربي علي الكيبورد وبتنشري الاخبار في كل مكان ؟
حبيبة : يا عم مفيش نت عندي وقاعده فاضيه قولت اجي هنا اشوف الحبايب . وبالمرة اخبط مانجه اصل عندي صداع . اصل الناس بقوا عاملين قلق جامد والحياه بقت مش ظريفة
مخنوق كيك : قولت في نفسي "اخيرا هلاقي حد حاسس بخنقتي .. هيشاركني احساسي واحتمال اشاركها المانجه اللي معاها . وابو بلاش كتر منه " ليه بس يا حبيبه ؟ هو انتي لسه زعلانه علي مديحة ؟
حبيبة : لا هو مش معني ان مدحت غدر بيها يبقي هو غلطان . هي غلطانه انها وثقت فيها اصلا من الاول . المفروض كانت تقرا قوانين الجاذبية كويس وتعرف ان الحب مش سهل كده . ده حتي المسافة بتتناسب طرديا مع الشاورمة .
مخنوق كيك : اهلا بيكي في عالم التهييس يا حبيبه . لا حقيقي باين الويتر ده حطلك حبيتين تهييس في المانجة . انا مش عايز مانجة انا هقوم اقعد بعيد
واهو بالمرة ادخل الحمام لحسن الجيل اللي علي شعري بدا يقع .
طبعا زي العبيط قمت داخل الحمام ونسيت اني في مكان تحكمه قبضه السيدات . طبعا اخدت علقة مخدهاش عبد اسود في عصر المماليك لما دخل عنبر الستات علي راي جعناوي .
وطبعا محاسن صابر كانت مبسوطة لانها من انصار الستات كالمعتاد
لم اتوقع بعدها ان ممكن فيه جنس واحده ممكن تتعاطف معايا في القعده الظريفه دي . لكن غريبة طلع صوت كده وقال " حرام عليكم " ده مكانش يقصد . طبعا افتكرت انها حبيبة . لكن اتضح ان حبيبة مشغولة في المانجة بتاعتها وكسلت تقوم تدافع عني
مخنوق كيك : ايه ده . دنا ناسي ان فيه واحده اسمها سومة كانت بتزور المدونة بتاعتي
سومة : معلش يا مخنوق مشغولة . معلش علي اللي حصلك ده بس انت غلطان ايه اللي دخلك كده من غير ما تعرف . تعالي اقعد وملكش دعوة بحد قصدي بحده .
مخنوق كيك : وانتي ايه مشاريعك اليومين دول يا سومة .
سومة : مفيش هتجوز واقعد جنب امي
قعدت بقي واللي حصل حصل . طبعا عنيا ورمت قولت اقعد اشرب شاي واخلع من القهوة دي خالص اروح بيتنا احسن
اخيرا ً . شفت واحده جايه وجايبالي تلج وكبايه شاي . انا كنت متوقع انها هربانه في الجبل او مستخبيه في اي حته لكن الحمد لله طلعت عايشه
مخنوق كيك : يخرب عقلك . ومش خايفه حد يشوفك يا مولان ؟
كيارا : اسكت انا مش عارفه ايه اللي بيحصلي ده يا مخنوق . المدونة اتعملها هاك والرساله بتاعتي مش عارفه اركز فيها ولا عارفه اعمل حاجة . دي مؤامرة عليا
مخنوق كيك : معلش بقي يا كوكي . هي دايما الشجره المثمرة الناس بتخبطها بالفاصوليا
كيارا : يا عم دول اخترقوا الموقع وبوظوا كل حاجة . انا حزينه خالص
مخنوق كيك : معلش معلش . هاتي بس التلج اللي في ايدك ده عشان وشي ورم ومش شايف حاجة . وانتي ازاي تغيري نشاطك من غير ما تقوليلي ؟
كيارا : يا عم مغيرتش حاجة دي زمبه ضربوها فيا بس الحمد لله مسحت المدونة
مخنوق كيك : وانتي بتعملي ايه دلوقتي بعد ما غيرتي نشاطك ؟
كيارا : بفكر اجيب ميكروباص واشغله علي خط الهرم .
مخنوق كيك : فرصه عظيمة وانا هكون زبون دايم عندك لاني راقد علي الخط
كيارا : بس متقولش لحد لان الموضوع لسه في اطار السر ولسه مقولتش لصحباتي في التدوين . وده سر لو حد عرفه احتمال كله يدخل في الكار ده وملاقيش عربية فاضيه اطلع بيها
مخنوق كيك : سرك كبير . وكده فيه سرين " انك مدونة و سواقة ميكروباص " .... وشكرا علي التلج
وهنا خلصت رحلتي في قهوة المدونين اللي كانت ممتعه فعلا ً وكان نفسي تستمر اكتر من كده بس للاسف كنت لازم اروح اشرب النسكافيه اليومي بتاعي واتغطي وانام عشان اروح تاني يوم التجنيد اخلص ورق سفر وكلام من ده
وبكده قصتنا انتهت والقاكم علي خير و اوعي حد من الابطال يزعل مني .
واهديلكم الاغنيه اللي شغاله دي " بطمنك " .. هي اكيد خلصت بس ابقوا رجعوها بقي
