الخميس، 20 نوفمبر 2008

البورصة جرحتني .. والمجتمع بيتآمر عليا ... انا هموت نفسي


اهلا بالحلوين اللي منورين النت ليل نهار

معلش يا حلوين كنت مشغول اليومين اللي فاتوا دول وكنت مخنوق كيك من العالم القاسي اللي انا عايش فيه
في المجتمع المتوحش . خلاص الواحد مبقاش ليه قيمة في الحقبة الزمنيه السائدة الراهنه .

وبشكر كل اللي سالوا عليا علي الايميل واللي بعتولي جواب علي البوسطه وبقولهم بلاش البوسطه عشان انا متراقب

مبقتش عارف انام غير 12 ساعة بس . حاسس ان الناس كلها بدات تكرهني .
وبقيت اغني اغنيه " اانا مش عارفني " للانسان الحيزبون عبد الباسط تقريبا ً .

مش عارف دي مؤامرة وللا ده الطبيعي . المهم انا قولت ادخل اهيس شويه وافضفض لان فيه ناس عضتني علي الماسنجر وناس حدفتني بالطوب علي الايميل وكانوا جايين يوقعوا البيت
وقالتلي انت مبقتش بتكتب ليه . ومش هنسي طبعا الدكتور الكبير ملك التوفير رامي شهاب .. ذكرني في الموضوع بتاعه ..

وكان السبب الاساسي اني ادخل دلوقتي اوجع دماغوا . اهو برده احسن من المسلسلات العبيطة بتاعه اليومين دول ومين قتل مين وجاري البحث عن مين
.. دنا حتي من السقعة بقيت زي حمبوذوا لاوي بوزوا ابو ماخير حمره .
يللا مش مهم . كنت بتكلم مع واحد صحبي امبارح قعد يلعنلي في الخطوبه وايام الخطوبة زي ميكون خلاص هيتعدم يا عيني ..

الولد لسه عنده 21 سنه وبيقولي انا ايه اللي خلاني اتخبط في دماغي واخطب .. الفلوس مبقاش فيها بركة وكل يوم والتاني 4 كيلو برتقان
علي كام كيلو موز لحد مالواد يا عيني فلس .
وبعد كل ده كمان الواد لسه مخلصش الكليه وعنده جيش .. ده ليله اهله فحلقي . قال بيقولي انا كده هبقي خلاص شقيت نص الطريق ..
قلتله انا رايي تشوفلك ماطوة تشق النص التاني وتموت نفسك
اما بقي الجزء الخاص بحبيب هارتي رامي راجل مهندس الكترونيات بس ايه .. دماغه لاسعه خالص وكل يومين يصرف علي العربية لحد ما هتجيب اجله .
انا قولت بقي ابخ المحادثة هنا واحدفهالكوا وهي خير دليل . والاعتراف سيد الماديلية


KOLLOMASHY says:
انت يا عم

KOLLOMASHY says:
انا بائس وحزين

Romaryo says:
حبيبى وابن حبيبي

KOLLOMASHY says:
واستحق الرمي بالرصاص في موقع عبد المنعم رياض واول
مرة احس ان اسمي علي المدونة فعلا ليه معني " مخنوق كيك "
انا عايش في ظلمات الليل وحيدا يا رامي بسمع ليلي مراد ومش
عارف اعمل ايه ؟؟

Romaryo says:
لقيتك بيزى قلت اسيبه يعيش يومين .. ليه بس خير يا حبيب الجماهير!! قلقتني

KOLLOMASHY says:
انا مينفعش اعيش اكتر من كده يا رامي

Romaryo says:
مهو مرة انا .... مرة انت

KOLLOMASHY says:
خلاص اخر دقايق في حياتي

Romaryo says:
مين اللى هيموت دلوقتى .. انت وللا انا ؟

KOLLOMASHY says:
انا
KOLLOMASHY says:
انا مشيت في موضوع الاستثمار علي النت يا حجوج

KOLLOMASHY says:
والحمد لله حطيت اكتر من 400 دولار علي موقع استثمار

KOLLOMASHY says:
موثوق فيه

KOLLOMASHY says:
النهارده بنك الليبرتي نصب علي الشركات دي

KOLLOMASHY says:
والدفع اتوقف

KOLLOMASHY says:
وانا كده هخسر حوالي 400 دولار

KOLLOMASHY says:
وفيه شبه انقلاب علي النت ومظاهرات زي ميكون اذاعو خبر العبور

KOLLOMASHY says:
والناس زعلانة

KOLLOMASHY says:
وانا اولهم طبعا

Romaryo says:
400 دولار . يا خسارتك يا دياسطي

KOLLOMASHY says:
بلاش ام الوش البائس ده كفايه عليا

Romaryo says:
بائس وبس

Romaryo says:
انت تستحق الرمى بارصاص فعلا

Romaryo says:
بالرصاص *

KOLLOMASHY says:
فعلا

KOLLOMASHY says:
انا هنتحر يا رامي

KOLLOMASHY says:
هشرب النسكافيه باللبن واقوم انتحر

Romaryo says:
لا لا
Romaryo says:
انتحر الاول

KOLLOMASHY says:
انت بتهرج صح ؟

Romaryo says:
النسكافيه كتير عليك

KOLLOMASHY says:
انا خسران اكتر من 2000 جنيه

KOLLOMASHY says:
وانت بتهرج

KOLLOMASHY says:
انا مش عارف لو عرفوا صحابي في البلياردو عرفنوا هيعملوا فيا ايه

Romaryo says:
ياعم انت عبيط ولا ايه

Romaryo says:
مش عارف اللى حصل فى البورصة

KOLLOMASHY says:
ما هو ده اللي مهون عليا يا حبي

Romaryo says:
واحد صاحبى خسر فى كام يوم اكتر من 60 الف جنيه
Romaryo says:
والتانى مش فاكر كام

Romaryo says:
والتانى الشركة بتطاردة وهربان

KOLLOMASHY says:
ده اللي مخليني ماسك اعصابي ومتمركز في الشقة

Romaryo says:
وانت جاى 2000 وهتموت نفسك

Romaryo says:
امال الناس دى تعمل ايه

KOLLOMASHY says:
دي اول لسعه ليا

KOLLOMASHY says:
ولسه ما اخدتش علي الوضع يا ابو رامي

KOLLOMASHY says:
انا جالي كابوس النهارده وانا نايم

KOLLOMASHY says:
ان في عربية راكب فيها موزه جامده بنت جزمة خبطتني

KOLLOMASHY says:
ومت

KOLLOMASHY says:
تخيل

KOLLOMASHY says:
العربيات بتتامر عليا في الحلم يا رامي

KOLLOMASHY says:
محدش بيرحم حد في الزمان ده

Romaryo says:
هههههههههههههههههههه

Romaryo says:
ياعم كبر دماغك

Romaryo says:
ماهو برده انت استعبطت

Romaryo says:
انا من الاول قولتلك ان الحوارات دى فاشلة

Romaryo says:
وانت لانك عربى اصريت على الغلط

Romaryo says:
اعمل فيك انا ايه دلوقتى
Romaryo says:
اودى وشى من الناس فين
Romaryo says:
اقوللهم ايه
Romaryo says:
اقوللهم مديحة جابت بنت
Romaryo says:
ياعم عادى المفروض بقى تجيب باقى فلوسك معايا
Romaryo says:
علشان مابعزقهومش
Romaryo says:
وانا هحطهملك فى الحفظ والصون
Romaryo says:
هاتهم انت بس

KOLLOMASHY says:
خلاص يا عم لو رجعوا بعد عمر طويل يعني هبقي ادهملك
KOLLOMASHY says:
بس انا بحاول اهرب من نظرات الناس ليا يا مان
KOLLOMASHY says:
حتي بتاع البلح الزغلول النهارده اديتوا 20 جنيه واخدت كيلو اداني باقي عشره جنيه بس
KOLLOMASHY says:
شفت المهزلة ؟
KOLLOMASHY says:
انا مكنتش اعرف ان الاستثمار بيقلل من قيمة الواحد للدرجة المخيفة دي
KOLLOMASHY says:
انا مذهوووووووووووول
KOLLOMASHY says:
انا لو جرالي حاجة يا روميو مش هسامح نفسي ابدا

Romaryo says:
ولا انا هسامحك
Romaryo says:
مصر كانت امانة فى ايدك
Romaryo says:
وانت ضيعتها
Romaryo says:
وسبتها تروح لامها

KOLLOMASHY says:
ههههههه ههههههه .. متقلبش المواجع الجرح لسه واجع
والقلب اللي انت بعته رايح ومش راجع

KOLLOMASHY says:
يا عم خليها تروح في ستين داهيه انا مالي
KOLLOMASHY says:
يعني مصر جرحتني في التجنيد .. وجرحتني في فلوسي كمان !!


Romaryo says:
خدها من عمك مجدى بتاع الكهرباء
Romaryo says:
او عمك ثبرى
Romaryo says:
صبرى *
Romaryo says:
هو اانا اللى عضيت لسانى ولا الكمبيوتر اللى بيهيس
Romaryo says:
او يمكن من الجوع :

KOLLOMASHY says:
ههههههههههههههههههههههههههه
KOLLOMASHY says:
انت باين عليك دماغك فاضية ورايقة وعربيتك مووووز
KOLLOMASHY says:
دي دماغك اللي اتلسعت من الزعل عليا

Romaryo says:
لا لا .. انا لما اجوع كود برمجة دماغى بيرمى ارور
KOLLOMASHY says:
لا يا عم قوم خلاص كل

Romaryo says:
هنزل لامى الاقيها دلوقتى مضيعالى رجيم شهر

Romaryo says:
بتظبطنى ماما دى والله

KOLLOMASHY says:
وانا هقوم اضربلي جوفاياه.. يمكن تصبرني علي الازمة النفساوية اللي انافيها
مع ان البزر بتاعها بيقف في درسي اللي لسه حاشيه .. دي ليلة مش معديه

Romaryo says:
قوللى ياعم صحيح
KOLLOMASHY says:
لا مش هقول
Romaryo says:
احنا مش هنتقابل بقى ولا ايه

KOLLOMASHY says:
وماله نتقابل
KOLLOMASHY says:
حتي عشان اطلع غلي فيك
KOLLOMASHY says:
وفي العربية بتاعتك
Romaryo says:
وانا ياعم هريحك فى اقرب شجرى
Romaryo says:
لالا
Romaryo says:
اتوبيس
Romaryo says:
علشان يكون اسرع

KOLLOMASHY says:
يا عم ما انط دلوقتي في الدور السابع واخلص نفسي
KOLLOMASHY says:
بدل العذاب اللي انا حطيتك فيه ده
KOLLOMASHY says:
خلاص بص روح كل
KOLLOMASHY says:
وانا هروح اضرب برتقانايه
KOLLOMASHY says:
ونتقابل علي الشاي
KOLLOMASHY says:
اشطه ؟

Romaryo says:
ان شاء الله
Romaryo says:
سلام ياقمر

KOLLOMASHY says:
وابقي كبر ام خطك شويه

KOLLOMASHY says:
عشان اشوفه

Romaryo says:
حلوة قمر دى

KOLLOMASHY says
مش ناقصة
Romaryo says:
اى خدمة
Romaryo says:
مشوار اكبره .. لسه هروح اغير حجمه ؟
Romaryo says:
محسسنى ان الزرار جنبى
KOLLOMASHY says:
ههههه
Romaryo says:
ده انا بروح بالماوس اخر الدنيا

KOLLOMASHY says:
معلش لما تاكل ابقي كبره
KOLLOMASHY says:
يللا سلامووز بالموز

Romaryo says:
سلام

افتكر كده خلاص ماسأواتي ظهرت للجميع . واحتمال اليومين اللي جايين دول يبقوا يومين تهييس علي الاخر . عشان اطلع من الغيبوبة اللي انا فيها دي .. واحتمال اخطف زياره مفاجاه لشارع العريش او اقطع تذكرة في الخباسة لكازينو الليل .

واحب اصبح وامسي علي ملوك النت وعفاريت المدونات مدام محاسن - يهديلك الاغنيه اللي شغاله دي - والدكتور شهاب حبيب هارتي - هديك اغنيه بعد بكره - و الدكتور حسن ابو علي يعني قصر النيل والدقي وما يجاورها واختم كلامي لكلمات من الشاعر الفضفاض هريدي .

انت عشان ابن مصر ... لازم تشوف الويل
مهو لو كنت راجل جدع ... كنت ردمت النيل

وشكرا ليكو ونتقابل علي اول فيصل يللا باي

صحيح : اللي عايز اغنيه معينه يرزع طلبه هنا وبعد المناقشة والتمحيص والتنقيب والتعقيب احتمال ابقي اجبهالو

هناك 13 تعليقًا:

ABOALI يقول...

حبيب الروح
اللى بات مجروح
ليه كده يا قلبى
ما نا قولته مايروح
اه واه عليك يا روحى
اتجرحت والبورصه داست عليك
يااااااااااااااا عيونى
اللى نزلت عليك دموع العذارى
السمر البدارى

على العموم اللى انجرح يتصلح يا جميل
والعمليات باقت سهلة
بس الدم غالى زاى عود الكبريت


مبروووووووووووووووك العوده
الى زمن الربابه
مرحب
مرحب
مرحب بيك على الارض الطااااااااااااهرة

habiba يقول...

ازيك
فاكراك طبعا اوعى ترمى نفسك انت لسه صغير :))
واله دورت على اللينك بتاعك واستغربت انك عملت مقاطعه معايا كده مره واحده
ومعلش لانى مقصره فى الكل وفى مدونتى نفسها واول مر ارد على التعليقات المرادى
المهم انت اخبارك؟؟؟؟؟؟؟؟

يلاى سى يو ......باى
علشان الحق اعمل الريبورت اللى عندى :(((((

مولان يقول...

ممممممممممممم

خاطب وهو لسه مش خلص جامعه طب ازاي اهو اللي قاله صاحبك بابا قاله لاخويا وفعلا اخويا سمع كلام بابا واقتنع بيه

اما لموضوع ال2000 فقوله ربنا يعوض عليه

في ناس خسرت بالميات وهربانين من الديووووووووووون والناس اللي هتاكله عشان فلوسها

مخنوق كيك يقول...

اهلا بيكي مولان
بالنسبة لصحبي اللي عايز يتجوز هو عايز يخطب بس وهيتجوز لما يتخرج .. ده اذا لم يصبه دور الجيش ودخل واصبح عمود من اعمده مصر

ثانيا الالفين جنيه دول بتوعي انا . انا اللي خسرتهم . هو انتي كنتي بتقري في انهي موضوع ؟؟؟ امال انا هموت نفسي ليه ؟

هو يعني ايه مولان صحيح

انا اعرف يعني ايه موران .. بس مولان معرفهاش دي

غير معرف يقول...

http://nawafco.blogspot.com/

غير معرف يقول...

المنتدى الليبرالي الكويتي

www.liberal-kuwait.com

الآن

بادر بتسجيل معرفك (النيك نيم) وعبر عن رأيك بكل حرية

وإلى حياة بلا ظلام

مخنوق كيك يقول...

يا حلاوة يا ولاد

البنك الكويتي الليبرالي بعتولي عشان اسجل

فيها اكل ؟؟

لو فيها اجي . مفهاش يبقي خلاص اروح اتغدي بره

مولان يقول...

هههههههههههههههههه اصلا انا تهت

وعشان كده كنت بقول

الله العنوان بيقول هو

امال مين

يالهوي انا دماغي ضربت بدري بدري


عامه سيبها لله وهو اللي هيعوضك

اه انا مولان حاليا لكن كيارا سابقا

اسكت مش ضي القمر اتعملها هاك وبقيت عالم مولان

مولان ده كارتون ابقي اتفرج عليه هيعجبك اوي

انا بحبه جدا ومن زماااااااااان

مخنوق كيك يقول...

اهلا اهلا بكيارا اللي اتعلم عليها بدري بدري واتهاك عليها .

اه يا وحشه وانا لما ادخل الاقي الموقع بقي مش تمام . اقول في قراره نفسي " الله هي كيارا غيرت النشاط وللا ايه ؟ هي مش كانت تاريخ .. اللي دخلها في الفلسفة "

وفي الاخر اقول اهو كله اداب .

بس مبروك اني خلعتي من الموضوع وعملتي مدونة تانيه .

انا بحب جدا كرتون المحقق كونان . لاني مش بعرف احل ولا حلقة اصلا . دي كرتون غبي .

وكنت بحب كابتن ماجد بس كنت داخل علي دور جلطة دماغيه لما اتفرجت عليه وكنت هتشل فالاطباء نصحوني بالابتعاد عنه .

احتمال ابقي اشوف مولان ده يمكن يجيلي شيخوخة مبكره . كل برامج الاطفال بقت واحده

اهلا بيكي من جديد يا كوكي .

تصدقي حلوة " كوكي كل الناس بيحبوكي "

ويا ريت متغيريش تاني نشاط الموقع ولو هتغيري . ابقي قوليلي . هههههه

مولان يقول...

ههههههههههههههههههههههههههههه


لا مفيش تغير نشاط

مولان دي بنت وحيده لابوها وحصل ان في اعتداء حصل علي الصين وبقوا ياخدو كل الرجاله عشان تحارب وابوها كان تعبان لانه كبر فراحت لبست لبس ولد وراحت مكانه من غير مايعرف وبقت تتعلم فنون الحرب وكان ده ضدد طبيعتها كانثي وتعبت كتير اوي وببقت افضل واحده في الجيش ومحدش عرف انها بنت الا في الاخر وحبت القائد بتاعها وانقذت الحاكم
بجد مولان لو شفته هيعجبك اوي انا اول مره اشوفه كان من كام سنه كده لكن عمري ما نسيته

اما عن ضي القمر بجد محدش يتخيل زعلي عليها ازاي

الحمد لله
وربنا يعوض عليك في ال 2000 جنيه

د/ رامي شهاب الدين يقول...

معلش بقى يابرنس

تعيش وتاخد غيرها وربنا يعوض عليك

ياريت بقى تشيل أغنية هانى شاكر دى ، وتحط مكانها أغنية محسوبكو إنداس لسيد درويش..هتلاقيها معبرة عن حالتك النفساوية تمام

هو صحيح فين حلقة بوس الواوا إللى وعدتنا بيها ، ولا إنت هتخلف معانا ولا إيه يامان؟

منتظر إجاباتك المفتكسة عن تاج السعادة ياصاحب السعادة.. وربنا يستر

وشكرااااااااااا

مخنوق كيك يقول...

علي فكرة عيب اوي يا جدعان نقعد نتكلم كده ونسيت اسلم علي ابو علي .. يا نهار مش طالعله شمس

حبيب الملايين ناسف علي التاخير والقاك في الجمعية القادمة لاني عايز اعوض الخسارة

والي دكتور رامي شهاب

اولا بقي مش هشيل الاغنيه . لان الاغنيه دي بتفكرني بالوكسه بتاعتي وبخبتي التقيلة جوي

ثانيا .. مش هغير الاغنيه

ثالثا .. حلقة بوس الواوا احتمال اغيرها واحط بدل منها " ليك الواوا " انا شايف ان معناها اقوي واوقع وبيخدم الواقع اللي احنا متقوعين فيه

رابعا بقي وهو الاهم . البوست اللي جاي هيكون مفاجاه من نوعه باذن الله

adel يقول...

عليا النعمة انت راجل مسخرة
هههههههه

لو كل 2000 جنية تضيع هتضحكني كده ...ان شاء الله ...... ولا بلاش
ربنا يعوض عليك
و قول لجوز مديحة البنت مش وحشة اهي حتة مش بتقعد تدور علي شقة

هههههه جامد موتتتتت

عادل
http://elbald-dy.blogspot.com/