السبت، 10 يناير 2009

مــخنوق كيك .. واذاعة ( أم نعـــيمة ) حــصريا للـمجانين فقط



وحشتوني يا حبايب

معلش كنت غايب عنكم الفتره اللي فاتت

قاعد مخنوق كالعادة قولت انزل اشتري شورت ولا تي شيرت ب 300 جنيه من توكيل " المحتاس " اللي تحت كوبري 26 يوليو

نزلت اشتريت قميص علي تي شيرت بولو علي بنطلون .. اينعم طلع طويل شويه وديته لعم دكران بتاع القمصان عشان يقصره ويتنيه تانيه سحرية .

وقاعد كده مخنوق قولت افكر في حال الدنيا بعد سنتين تلاته ايه اللي هيحصل .
وطبعا ً بعد تفكير عميق سحيق لقيت دماغي بتوديني لاذاعة قوية جدا ً .

اذاعة مخنوق كيك 114 فاصلة 15 .. مجانين بلا قيود ( تاليف وحوار وسيناريو وبطولة واخراج وانتاج ) مخنوق كيك .
الساعة الثامنة والربع - عام 2030 ميلاديا ً .

1- تعرض الامن المركزي لبعض الاشتباكات والجراح نتيجة مظاهرة في وسط البلد اعتراضا علي اختفاء رغيف الفينو .
وصل عدد الجرحي في ميدان طلعت حرب لخمسين شخصا ً . اثر تعدي الامن المركزي عليهم بالقنابل الاسنفجية والتي تسبب الطرش والعمي والحمي بغرض احتواء الميدان . بعد تظاهر عدد 2000 شخص طلبا لرغيف الفينو بعد اختفاؤه من الافران والسوبر ماركتيات

2- قرار جمهوري برفع مرتبات جميع الموظفين من جميع الفئات .
قرر رئيس البلدة رفع رواتب الموظفين من الدرجة الاولي للعاشرة وحتي الناس اللي علي المعاش . لكي تصل مرتباتهم الي 1000 جنيه لكي يستطيعوا العيش في خضم ارتفاع الاسعار العالمية وضرب البورصة وارتفاع اسعار الاخشاب

3- اضراب عن العمل في كل من الجهات الزراعية والصناعية والطبية نتيجة فرض ضريبة علي الحياه تصل الي 1000 جنيه
بعد فرض الضرائب التجاريه علي المواطنين والتهرب منها قرر مجلس المدينة فرض ضريبة علي كل المواطنين بهدف المساواه واستحاله عدم التهرب . لانها سوف تفرض علي الحياه . فكل دابة تمشي علي الارض علي اثنين او اربع سوف تدفع ضريبة . لذلك سوف يتم التخلص من المتهربين وذوي الاحتياجات الخاصة . الي الابد

4- الغاء الكوبري الدائري خط شبرا و هدم المحور . بعد وصول عدد السكان ل 30 مليون شخص
بعد حدوث ركود في وسائل المواصلات وقلة حركة المرور في البلدة . قرر المسؤلين الغاء الدائري والمحور لكي يستطيعوا السيطرة علي الاحياء بقدر المستطاع باقل التكاليف وفي لقاء مع مسئول المواصلات قال " نحن نعدكم ان نعيد اليكم الدائري والمحور بعد الانتهاء من الاجراءات االامنيه وعد المواطنين واحد واحد "

5- تهريب الدقيق من المخازن ( سريا ً ) علي ظهر 46 باخرة متجهه الي كندا .. وللاسف لم يصل منها ولا واحده .
مع تكرار حوادث الباخرات . لم يتوقع اكثر المتشائمين غرق 46 باخرة في يوم واحد متجهة الي كندا تحمل قوتا وعتادا . وبعض النقاد الصحفيين قال ان هذه الحوادث بسبب دعاء الشعب المصري الذي لا يجد الدقيق .. لذلك سوف يمثل كل الشعب امام القضاء في جلسة مغلقة ويصدر الحكم في خلال دقائق قبل بدا الجلسة .

6- حسين الجاسمي يغني لمصر اغنيه جديده باسم " وبحبك خنقتيني " وفي مطلعها يقول

بحبك خنقتيني .. بحبك وانتي نور عيني
ده وانتي مطلعه عيني .. بحبك موت

مليت اد ايه مليت... ملاقيت فيكي نقطة زيت
وبقولك انا خـسيت ..... من اكل البيت
وكأن الرز في بعدك غالي .. ما بيرخصش
وكأن القمح في ارضنــــا... ما بيطلعش

وعلي صعيد دولي اخر


1- تهديدات جديده من اوباما للرئيس المريخي " كيكاوا ويوي " لاشتباه وجود اسلحة نووية في كوكب المريخ
فتح اوباما الملف المريخي من جديد في البيت الاخضر بعد اعتراض الرئيس ( ويوي ) علي التفتيش . معللا بذلك ان كوكبه نظيف ولا يحمل اي اسلحة نووية ولا حتي شمسية

2- غلق المعابر والمخارج والمداخل المؤدية لاي حته .. لحين انتهاء التحقيقات الامريكية من واقعة اغتصاب فتاه كازينو الليل .
قرر مجلس الامم حبس المواطنين داخل بيوتهم لحين التحقيق والتحقق من واقعة اغتصاب فتاه ( ش ع 25 سنه ) علي كوبري قصر النيل . متخذا استنجادات الاسرائيلين المقيمين في الشيراتون تبريرا لذلك . وان الكوبري لم يعد امنا بعد الان لسير الاجانب والمحتلين .

3- ابو الغيط يصرح لجريدة " تحشيش ياما " انه سوف يتم عقد مجلس امن في خلال 2756 ساعة لتناول الاوضاع في شبرا .
كانت المفاجاة مدهشة لاهالي شبرا حين صدور قرار عقد جلسة بهذه السرعة مستنجدين بالقوي العظمي بعد دخول اسرائيل سيناء والعريش والغردقة وروكسي ورمسيس ومحطة مترو روض الفرج

4- احمد محمد ابو تريكه اللاعب المصري يتم شطبه من قائمة الفيفا لارتداءه فانيله " تضامنا مع شبرا " .
تم شطب اللاعب المصري احمد محمد ابو تريكة نجل محمد ابو تريكة صاحب الاخلاق والقيم من قائمة الفيفا وقائمة لاعب القرن عقب انتهاء مباراة فريقي ( الاهلي و حديد عز ) لانه كان يرتدي فانلة داخليه تحمل معنا ً سياسيا ً وواضحا ً وربما تحريضا ً وهذا ما اقره الاتحاد . وانه سوف يتم تغريم اللاعب غرامة قد تصل الي 20 طن حديد . علي السعر القديم

5- ارتفاع سعر اللاعب المنغولي " بنطالوني فانيلي " الي 500 مليار دولار . ليصل بذلك الي الشماعة الاولي ضمن المصنفين دوليا ً .
في تصريح فريد من نوعه . ارتفاع سعر اللاعب بنطالوني فانيلي الي 500 مليار دولار . اثر احرازه 5 اهداف نظيفه لصالح فريقه ( بلوفر بول ) في مرمي خصمة العنيد ( ويجان استيك ) الذي احتل المركز السابع في الدوري الانجليزي . وبذلك تغلب علي اللاعب المصري عمرو زكي الذي احرز 7 اهداف في الدوري .

6- وفاه جميع ابطال مسلسل " نور " " وسنوات الضياع ".. والجماهير تطالب باستمراره اذاعيا ً .
اثنااء عوده ابطال المسلسل نور وسنوات الضياع من مهرجان ( الهيافة كيافه ) سقطت الطائرة المقله لهم في المحيط الهندي . وقامت الحيتان بالتجمع حول مهند ونور لاخذ سور معهم وبعد ذلك لم يتركو منهم غير العمود الفقري وهو يوجود الان في متحف سوليد برج بلندن . سعر التذكرة خمسين دولارا للساعة !
وقد هاجت الجماهير علي الامن القومي الوطني . لانهم - حسب قولهم - كانو كنزا وطنيا ً ويستحق الحمايه والتقدير . وطالبت الجماهير النسائية باستمرار المسلسل اذاعيا علي نجوم اف ام لكي يظل نور ومهند في اذهان المصريين . وعشان يعرفوا كمان نور لما هتولد هتسمي البامبينو ايه !
وقد تم ترشيح كريمة مختار لهذا الدور بعد نجاحها في مسلسل " حماده عزو " وحمدي غيث بعد نجاحه في ذئاب الجبل .

6- الصبوحة تبحث عن ابن الحلال االمناسب . بعد فشل 157 محاولة زواج . والحسابة بتحسب
نختم اخبارنا بخبر حمضان وليس له اي قيمة . وهو بحث الفنانه العظمية الصبوحة عن شاب ابن حلال لكي تنعم معه الايام المتبقية من عمرها الذي انقضي من وجهه نظري منذ عقود .

كان معكم . مخنوق كيك من اذاعة ام نعيمة الدور الارضي . عمارة النجاريين في السيدة


هناك 14 تعليقًا:

adel يقول...

هههههههه

و الله عشرة علي عشرة ..... ايه الاخبار دي كلها


رنا يعيشنا لح 2030 و نبقي ساعاتها نشوف

عاشقه الرومانسيه يقول...

بصراحه الله ينور عليك
ما هو اللى احنا فيه ده حاجه تخنق يا مخنوق يا اخويا
واجمل حاجه بقى مسلسل نور اللى انا حاسه انه هيفضل يتذاع للابد ده

الصبوحة تبحث عن ابن الحلال االمناسب . بعد فشل 157 محاولة زواج . والحسابة بتحسب

والصبوحه دى اللى واخده زمنها وزمن غيرها
وانا اقول عدد الرجاله فى نقص مستمر ليه؟
عموما ربنا يديك ويدينا طول العمر

مـجـنـووون يقول...

بجد أنت أثبت أنك مجنون رسمي زي حلاتي بالظبط

يا ريت لو تديني ايميلك علشان كنت عايز اكلمك في حاجه

تقبل مروري
مجنووون

كيــــــــــــارا يقول...

ههههههههههههههههههههههه

لالالا دي ام نعيمه حقيقي حقيقي مش اي كلام

واختفاء الفينو كمان يعني مش العيش

والتردد 114 الا اشمعني 114 ليه مش رقم تاني

mahasen saber يقول...

dيا ربى عليك وعلى لذاعة دماغك بجد عسسسسسسسسسسسسسسسل

ازيك يا مخنوق افندى
والله انا شكلى هسحب منك الاسم شكلى كده طمعت فيه انا

المهم انتا كويس
طالما لسه مخنوق تبقى كويس وزى الفل

م/ الحسيني لزومي يقول...

حمله المقاطعه
لا تستطيع ان تجاهد
لاتستطيع ان تتظاهر
لا تستطيع ان تتبرع بالمال
اذن قاطع وادعو غيرك للمقاطعه
منتجات كل من يدعم العدو
**** هل تعلم أن:-
1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

*** قائمة المقاطعة
ستار بوكس
ماكدونالدز
برجر كينج
كنتاكي
بيترا كينج
كوكاكولا
بيبسي
فردركرز
شيليز

لنوقف شراء البضائع الأمريكية والبريطانية لشهر واحد فقط

سوف تكون تكلفة هذا الشهر عليهم خسائر مقدارها
37 بليون دولار

مخنوق كيك يقول...

Adel

دولة حبيبي ازيك يا مان
ومتقلقش هتعيش لحد 2030 ان شاء الله وهتشوف اللي هيحصل

مخنوق كيك يقول...

عاشقة الرومانسية

ده نورك يا جميل
هو احنا اللي فيه ده حاجة تخنق ؟؟ ابدا َ دي حاجة تموت حاجة تجيب السكر والضغط والزهايمر . وبالذات المسلسلات التركية اللي بتحسس الواحد انه هيموت بسرعة

طبعا مسلسل شغال من قبل ما نتولد ولسه شغال . هتحسي بايه ؟

وبخصوص الصبوحة ربنا يطول في عمرها وهتفضل عايشه . واحتمال تمثل فيلم الرجل الثالث مع ابن كريم عبد العزيز

مخنوق كيك يقول...

مجنوووووووون

يا حبيبي انا مخنوق ومجنون من زمان . انت تلاقيك لسه جديد في الكار

اما بخصوص ايميلي فدي حاجة شبيسيال كده ممنوعة يعني

من الاخر للكبار فقط . لكن اوعدك اني لما احس انك قطعت بطاقتك هديك ايميلي علي طول .

واهو يمكن نتقابل صدفة علي السطح عندي . مين عارف !!

مخنوق كيك يقول...

كيارا

شوف والنبي البنت . سايبة الموضوع كله وماسكه في رقم 114 .!!

انا طول عمري بقول عليكي محششه وانتي مش مصدقاني

علي كل رقم 114 بيفكرني بثورة سعد زغلول . ليكي حاجة عندي ؟

روحي اجري شمي كولا وللا ادهني الحيطة بتاعتكو . ولو خلصت قوليلي

مخنوق كيك يقول...

محاسن صابر

طبعا ست الكل واللي مسيطاني علي المحيط التدويني وعلي الحجم الانساني

شكرا علي مداخلتك ولو انك كنتي مختفية اليومين اللي فاتو . انا الحقيقة خفت لحسن يكون معتز بتاع 90 دقيقة عمل فيكي حاجة او انهم يكونوا مضوا معاكي عقد من ورايا !

كنت ساعتها هزعل منك اوي ومش هدخلك معانا في الجمل اللي هنجيبه العيد اللي جاي

عايزين نشوفك كتير واوعدك اني هفضل مخننوق

ABOALI يقول...

اعلنت اذاعة ام نعيمه
عن وفاة مؤسسها ورعايها الاول والاخير

بعد تعرضه لحادث اثيم جيث انزلقت رجله الشمال والتفت حول اليمين
ممن ادى الى انبعاج بؤرته الرئيسه
فهوى الى التراب وحطم مطاعم شخلع وشخلعنى للبرسيم المدمس
واذ ننعى هذا الاخ
يجب ان نتذكر انه كان علما" من اعلام
الذرة التى يشار اليه بالبنان
خصوصا الذرة المشوى والمضاف الى العيش لتحسين وضعه الاجتماعى

وبنهاية المؤسس
نقوله نعيما"

ولا اراكم الله مكروه فى مجنون لديكم

مـجـنـووون يقول...

يا باشااا تشرفنا بمعرفتك

وبعدين انت محسسني أنا بطلب أيميل موزة مش أيميل راجل

وعلي العموم ولا يهمك يا جميل أنا بس كانت عندي فكرة بس الظاهر انك لسه موصلتش لمرحلة الجنون

تقبل مروري يا باشاااا

مجنووون

مخنوق كيك يقول...

مجنووووووون

يا حبي انت تشرف في اي وقت

اهم حاجة تجيب معاك نص كيلو شوكالاته وانت جاي .

ثانيا هو ايه ده اللي ايميل موزه ؟ مش عيب عليك تقول كده في وكر تدويني محترم ؟!!!

علي فكرة انا مكنتش اعرف انك بتاع بنات . قال وانا اقول معرفه الرجاله بميت ست .

اخص عليك اخص . بس علي كل انا ممكن اسامحك لو جبتلي ايميل خمس بنات او 3 بس وواحده حامل

تصبح علي خير