الثلاثاء، 7 أبريل 2009

من أعمــاق التــنين . أعــــود اليكم من جديد / الجزء الاول




السلام عليكم .

ازيكم يا بشر . وحشتوني بجد ووحشني تعليقاتكم ووحشني الحواوشي .

معلش كنت مختفي الفتره اللي فاتت دي لاني كنت بنشئ مصنع رقم واحد في تصنيع احم احم البلاط اتوماتيكيا والسيراميك .
وكنت مطحون جدا في تظبيط الخلطة وتوجيه العمال لكي نحصل علي منتجات طيبة نبني بيها بيتنا .

الحاجة الجميلة في الموضوع اني قضيت الفتره اللي فاتت دي كلها في الجيش !
المصنع يا سادة . كان بيركب في الجيش . يعني انا اهرب من الجيش واخد تاجيل ومصر تديني استمارة سته وفي الاخر اروح تبع الشغل ؟ !!! دي مهزلة مينسكتش عليها ابدا ً .

المهم رحت هناك وشفت الحياه العسكرية وشفت الاكل الكتييييييييييييييير اللي في الجيش -اللهم لا حسد- لحسن انا لو حسدت احتمال الاطباق كمان تختفي . لانها اصلا بتيجي فاضيه . دا فرضا اذا كان فيه اطباق اساسا ً .
لو سمحت محدش يفهمني غلط . الحياه العسكرية كلها التزام . اينعم ممكن يكون مفيش مية ولا اكل بس فيه التتزام وجلد وصبر .

انا مش فاهم بس مين اللي دعا عليا اني ادخل الجيش . ربنا يسامح اللي كان السبب
اثناء تركيب المصنع كان عندنا اتنين خبراء من ايطاليا واحد اسمه ماريو . ودا متجوز ومراته عسولة خالص والتاني اسمه جان بييرو ودا واد صايع كده وعنده 30 سنه بس مثال للانحراف اخر حاجة . يعني زيي كده

بصراحة المصنع ده اتعلمت منه حاجات كتير اوي . عرفت اد ايه اننا متخلفين ميكانيكيا وعلميا ورياضيا وامكانياتيا . كل حاجة كل حاجة
تخيلوا مفيش عده عشان نظبط بيها المكنة ؟؟؟؟؟؟؟؟؟؟؟؟ الواحد بجد كان حاسس انه عايش في ظلمات البحر . او فوق فوهه بركان

كان نفسي اصرخ ونفسي اخبط ونفسي اضرب . بس للاسف الحبس العسكري كان جنبي بحوالي خمس دقايق فكنت شايل في قلبي وبشرب شاي واكل بسكويت .
الخواجة ماريو اتعلم عربي عشان يساعد العساكر في الشغل . كان عمال يقولي انتو مش بتشتغلوا خالص . خمس دقايق نشرب شاي وخمس دقايق نروح نصلي وخمس دقايق نتغدي وخمس دقايق ندخل الحمام .. وطبعا مادام طلعنا من الحمام يبقي نبتدي من الاول تاني .

ناكل ونشرب ونصلي ونستحمي . وهكذا دواليك . الشغل كان بيبتدي الساعة 8 صباحا والمفروض يخلص 5 مساءا . لكن ده طبعا ً نظريا فقط
لكن لو جينا نحسبها عمليا ً هنلاقي اننا بنشتغل من الساعة 1 ونص لاتنين ونص . لان مفيش اكل ولا صلاه ولا شاي لان الكانتين قافل في الفتره دي .
قعدنا علي الحال ده شهر ونص . وانا برجع البيت هلكان وطالع عيني بس اعمل اي كله في خدمة البلد واني ابلط البلد باحسن بلاط فيكي يا امبابه .
بس الحمد لله خلصنا التركيب والتشغيل والعساكر الحمد لله خلصت اكل وجت تشتغل بقي . وطلعنا البلاط والحمد لله .

طلع قائد الوحده قال لا . البلاط ده وحش انا عايز بلاط احلي من ده .
قولناله يا عم الحاج المكنة دي بتطلع البلاط ده . قال لا انا عايز البلاط ده ... واخونا ماريو كان جايب معاه بلاطة من بتوع ايطاليا . بلاطة كده اللهم صلي علي النبي احسن من السيراميك بتاعنا . بجد والله

اللواء وقف وقال مليش دعوة انا عايز زي بلاطة ماريو . قولناله مينفعش دي مكنه ودي مكنه والراجل ورهالك بس عشان يقولك انه رقم واحد في العالم في تصنيع البلاط . لكن مش معني كده ان الفرخة هتبيض بيضة نعامة .

" لكن مش معني كده ان الفرخة هتبيض بيضه نعامة " الضابط اللي قال الجملة دي في الحبس دلوقتي علي فكرة . طبعا لانه شتم الفرخة .
المهم يا عم يهديك يرضيك قال مليش دعوة خلاص نجيب الماكنة التانيه اللي بتطلع البلاط ده . طبعا انا بسمع الكلام ده ولاول مرة احس واتاكد من اعماقي وايقن بجميع جوارحي اننا اكيد اكيد اكيد في مصر .

ماريو اتجنن وقعد يشتم بالانجليزي والايطالي ووانا طبعا فاهم بيقول ايه لاني طالع معاه مترجم ومهندس في نفس الوقت . والقوات المسلحة لا تعرف الفرق بين حرف ال A و كلمة حاضر .
وانا اهدي فيه وهو يشتم . اقوله يا ماريو الحبس قريب . يقولي انا عايز ارجع ايطاليا
اكلم اللواء واقوله يا فندم مش المكنة دي اللي بتطلع البلاط ده . قالي جملة غريبة اوي " قالي انت صح واحنا غلط . بس احنا بقي عايزينك تعملنا الغط "

بصراحة انا عايز اروح اتحبس مع الضابط . ومسمعش كلام التعجيز ده . وقعدت اشتم وماريو يهديني وجانبيررو قاعد علي جنب بيحرق السجارة بدل ما يولع في نفسه من اللي بيسمعه ,

فعلا يا جماعة احنا في مصر . احنا اتكتب علينا خلاص يا رجاله اننا هنعيش في مصر .
بجد مش قادر اكتب اكتر من كده وبكره هبقي اكملكوا الحكايه ونشوف مع بعض ازاي وصلنا لحل يرضي جميع الاطراف .

هناك 7 تعليقات:

ABOALI يقول...

مخننننننننننننننننننوق
حمدا للسلامة
يااااااااااااه
كنت فاكرك فى اضراب 6 ابريل
طلعت لئيم وبقيت عميل للجيش الوطنى يا وطنى

مشكلة موضوع البلاط ده فعلا
وازى تزغللوا عين القائد بالبلاط الاصلى و بعدين عاوزين تتضحكوا عليه ببلاط مضروب

اتتتتتتتتتتتقوا الله
ومنتظر باقى الحكايه

عاشقه الرومانسيه يقول...

لولولولولولىىىىىىىىىىى
زغروته محترمه
وفرح كمان
انك رجعت تانى
والله والله والله وحشتنى وفرحتنى


وحياة ابوك ياشيخ تشيل تاكيد الكلمه دى علشان بيعملى حساسيه

هاروح اقرا البوست بقى وارجعلك اكمل باقى الفرح
هههههههههههههههههههه

مخنوق كيك يقول...

ايه ده ؟ ابو علي حته واحده يطل علي مدونتي !! هل هذا شئ يصدكه عكل . وان كذبه عقلي فكيف يكذبه قلبي ؟!!

احييك يا كبير علي دخولك واشراقك علي المدونة بعد غياب . معلش بقي كنت منقطع اليومين اللي فاتو عشان خدمة الشعب والوطن . واحتمال المانيا تبعتلي مندوب عشان اروح اركب عندهم المصنع ده بعد النجاح المبهر اللي وصلناله في مصر .

بخصوص القائد والزغللة انت فعلا ً عندك حق لان المفروض ماريو مكانش يوريه البلاط ده اساسا ً لكن معلش هو معزور ميعرفش طباع الشعب المصري .

ولا يعرف عقول الجيش عاملة ازاي . يللا الحمد لله احنا انقذناه من تحت ايد القائد وروحناه علي بلده واحنا دلوقتي هنتحاكم بتهمة الخيانة العظمي .

دعواتك معايا يا كبير

مخنوق كيك يقول...

عاشقة الرومانسية .
ازيك يا عسل . انتي فعلا ً اللي كان ليكي وحشه كبيرة . اهو معلش بقي هموم الحياه

وانتي صحيح لسه بتحبي الرومانسية .؟ اصل انا بتهيالي اخر موضوع كنت قريته قبل ما ادخل المعتقل انك كنتي زعلانه !

وعشان اخفف عنك همومك يا ستي وتعاطفا مع حالتك الرومانسية انا شلت الكلمة عشان خاطرك بس .

بس اعملك حسابك انك لو كتبتي في اليوم اكتر من 10 تعليقات عندي هرجع الكلمة تاني

اصل كان فيه واحده زمان بتتنطط كتير في المدونة وكل شويه تكتب تعليق ومكونتش بعرف اركز منها .

يللا بقي ربنا يسامحها مطرح ما راحت . احتمال تكون غيرت نشاطها زي ما عملت قبل كده

اهلا بيكي يا عاشقة الرومانسية من جديد وخلي بالك من نفسك عشان ممكن اعورك في بوست من بتوعي

عاشقه الرومانسيه يقول...

هى دى مصر
قمه فى كل حاجه
قمه فى العبط
قمه فى التخلف
قمه فى السذاجه
قمه فى العند
كلامك فكرنى بالمثل اللى بيقول

نقول ثور يقولوا احلبوه

بص بقى ياسيدى
انا مش من هواه كتابه التعليقات الكتير
يعنى مفيش منى قلق
ههههههههههههههههه
ده كان اولا
ثانيا بقى
حضرتك غايب من فتره كبيره وانا نزلت فى الفتره دى اكتر من 35 بوست
يعنى تنتشر عندى فى المدونه وتقرا البوستات كلها
هههههههههههههههه
دى حصلت حاجات كتيييييييييير
والمدونه قفلتها وبلاوى بعيد عنك

هتعورنى ازاى فى بوست؟ مش فهماها دى
المهم بقى انك بخير
نورت بلوجر

Kholios يقول...

عــــــــــــــــــــــودُ حمـــــــــــــيد يا برنس الليالى المشبرة...........

د/ رامي شهاب الدين يقول...

تعرف لو أنا مكانك .. كنت رحت دخلت الحبس الإنفرادى برجليا ، بلا خنقة ولا وجع دماغ ياعم الحاج

عمك الظابط باشا ده كان فاضل له شوية ويقول لك أنا عايز تمثال الحرية إللى فى أمريكا على مكتبى ، ومفيش مانع تجيب له سور الصين العظيم عشان يحوط بيه المعسكر

وختاما أنا بنصحك تشرب من نيلها وتجرب تغنى لها .. يمكن تفلح وتعدى الأيام الصعبة دى على خير

سلام بقى عشان أروح ألعب السلم والتعبان