الاثنين، 25 مايو 2009

عــجبت لك يا زمـــن 1


السلام عليكم

احلي سلام لاصدقاء التدوين من اعرفه منكم ومن لا اعرفه

الحقيقة بقالي كام يوم كده بقلب في دفاتري القديمة . وبطلع اشعاري وقولت الزقها هنا يمكن تفضل ذكري بعد كده وللا حاجة
واهو برده بطلعها للناس . اهو واحد عايز يعيط شويه وللا واحد شايف كلمه عاجباه يقول .

بس كله بتمنه طبعا ً ... ما علينا
طبعا انا اسف كل الاسف لانقطاعي الفتره الاخيرة عنكم لاسباب امنيه تخص شركة دي لنك وضميري بيوجعني وعنيا بتحرقني من كل تقشير البصل من امبارح .. اصلي عامل عزومة بمناسبة بناء حيطة جديده في شقة اخويا .
بس فعلا انا حزين علي الاحداث المؤسفة اللي حصلت في الفتره الاخيرة . وتحديدا ً موضوع القطر اللي مشي لوحده .. اشتاتا اشتوت

نخش في الموضوع بقي ونشمر عشان نحكي
بيقولك كان يا مكان اسكندريه فيها ورشة تصليح قطورات ونفخ عجل وكده حيث كان يرقد القطر ( الجاني ) بدون حراك لانه عطلان . وفجاه بعد تصليحه القطر في يوم 17-5 مشي لوحده من منطقة القباري غرب الاسكندريه لحد ما وصل سموحه . لوحده انا بقول اهو

طبعا مادام القطر مشي لوحده يبقي اكيد زعلان وكانت النتيجة مصرع واصابه 12 بني ادم لانه اتشقلب وخبط عربيات وبتاع .
الملفت في الموضوع ان الاعلام كله بيكرر ويقول ان القطر مشي لوحده وخد طريقة طوالي لحد ما وصل المزلقان والمرور تدخل وفكه الخناقة وسيطروا علي الموقف .. ولم يتم تحديد الجناه وسيتم معاقبة المسؤلين والجميع سيأخذ جزاؤه .

بس صحيح هل الخبر ده منطقي او يمس للعقل الظاهر او حتي الباطن بصله
انا بقي هقول للاعلام اللولبي المتخشب بتاعنا ايه اللي حصل بالظبط من وجهه نظري .

هل تعلموا يا اصحابي ان فيه محرقة مخدرات جنب قباري علي طول . يبقي اكيد هذا القطر الاستيطاني عمل دماغ وخد في وشه وطلبت معاه هزار راح ماشي ومكسر كام عربية علي كام عمود لحد ما فاق واتمسك .

مش ده برده سبب اوقع .. اهو علي الاقل فيه سبب لان اصبحت حياتنا في مصر بين مجموعة من علامات التعجب والاستفهام سنظل نتعجب ونستفهم بدون أن نفهم لان دائما الاسباب اما مبهمة او غير مقنعة او غير موجوده اصلا ... بالظبط زي مدونتي كده .

الحقيقة مش عارف مين اللي غلطان . هل المرور اللي غلطان وللا القطر وللا الناس اللي صلحوه واحد اداله جوان شربه وللا احنا اللي غلطانين اننا مروحناش جرينا ورا القطر.. ايه اللي بيحصل ؟ ايه اللي بيحصل يا عالم في البلد . دا احنا بقينا في زمن المعجزات . فعلا دي ايه من ايات الله . قطر ماشي لوحده في ارض المحروسة بنت المحروسة .

طبعا قطر ماشي لوحده .. لاتقولي بالكهرباء ولا بالبنزين .. ولا حتى ريموت كنترول .. لاتقولي ياباني ولا صينيى .. دي ياجماعة احدث تقنية .. نظام الاستشعار عن بعد .. ايوة نظام الاستشعار يامحترم .. بمجرد مايشعر بالضحايا بتاعته يتحرك عشان يدوس عليهم علي طول .. واحب اسمع اغنية الفنان هاني شاكر، باااالدي يا بلدي إن كان ع القلب مفيش غيرك….. وان كان ع الحب مفيش غيرك….ده جناحى مرفرف فى سماكى….. والباقي مش حافظة …بلدي بلدي بلدي .

يا رب ميطلعشي علينا بكره طيارة تضرب العمرانية ويقولوا طيارة طارت لوحديها بعد ما خدت شاور ببنزين بفاريا .

واخيرا احب اوجه سؤال الحلقة لكل المجانين اللي مصدقين القصة .

مين السبب وراء غضب هذا القطر عديد الاجرام ...... ؟؟؟؟

1- عزيز نفخو .. صاحب محل الكاوتش اللي كان بينفخ كاوتش القطر
2- برشامة السواق ... اللي كان سايق القطر اليوم اللي قبليه . لانه متورط في جريمة تحشيش .
3- حسنات التخينه .... اللي شاورت للقطر فطلع يجري وراها عشان يبوسها ... قصدي يدوسها .
4- شنكاح حاسب يا اسطي .. الكومسري لانه ساب القطر ماشي ونط منه ؟

لو عرفت الحل خليه لنفسك وموت بغيظك واللي هيتكلم هياخد علي بقو .

كان معكم ... كعبووووووول من امام السكة الحديد
والي جريمة جديدة حيث ظهور مولان . في احد الجرائد البرجوازية .. اللي عدي عدي









هناك 7 تعليقات:

Kiara يقول...

عاااااااااااااااادي

قطر بيمشي لوحده ههههههههههههههه

ايه الموشكله

دا التجديد

السبب في الناس هما اللي وقفوا في طريقه

ادي نتيجة الاهمال بجد

موش هقول غير حسبي الله ونعم الوكييييييييييييل

لنا الله

عاشقه الرومانسيه يقول...

هو الموضوع ده حقيقى؟
ماانا عندى استعداد اصدق
ماانا من اصدقاء المدونه اللى مقطعين بطايقهم
هههههههههههههههههه
هو البوست قلب فى الاخر على كرومبو كده ليه؟

عايزه الجوايز علشان تشجعنى افكر ومش هاخلى الاجابه لنفسى
(وش بيطلع لسانه)

هههههههههه

mahasen saber يقول...

هههههههههههههههههههه

اهه انا يئه ضحكت من قلبى لما الدموع غسبت عنييه

نورت البلوجر والعالم التدوينى كله كله كله مش حته منه

يا ربى على جنانك كنت مفتقده تدويناتك ومواضيعك اليى تجنن دى جدا جدا

نرجو عدم الغياب مره اخرى

مخنوق كيك يقول...

كيارا

طبعا لازم يمشي لوحده .. مهو مش صغير
وفعلا انا زعلان من الناس اللي وقفوا في طريقة . لانه كبير وعارف طريقة كويس

وتعقيما ً علي حسباناتك

لكي الله يا مصر

مخنوق كيك يقول...

عاشقة الرومانسية

الموضوع حكيكي طبعا ً هو انا هجيب حاجة من دماغي يعني !!
وبخصوص بطاقتك انا لقيتها علي اول الشارع امبارح . تعالي خديها

بخصوص الجوايز اللي هيعرف الاجابه الصحيحه هيكسب رحله نفرين لابو زعبل . حبس انفرادي يعني

وابقي وريني بقي هطلعي لسانك ازاي ؟

( وش مخنوق كيك )

مخنوق كيك يقول...

محاسن صابر

اللي مصيطانا في الوسط العربي كله
انتي من ساعة ما الواد ابنك جاله اخ وانتي خلاص نسيته خاله الصغنن

ماشي ماشي , علي كل انا مش هجيب هدايا
هي ناقصة مصاريف ؟

مخنوق كيك

mahasen saber يقول...

ههههههههههه يا ساتر شايلوك ..شايلوك..شايلوك..يعنى من الاخر بخيل جلده

طب طايب خاطر ابن اختك بكوره شراب حتى

انما تقلها فى وشى كدا مش هجيب هديه