وانا قاعد زي كل يوم بدور علي حاجة تخنقني او حاجة اطلع فيها غلي قولت اتفرج علي ماتش مانشستر والبايرن
اهو الواحد يتفرج علي حاجة حلوة احسن من الكورة بتاعتنا اللي اشبه بحرب مصارعة
او بمعني ادق حرب قطط بس جامد
ومبدأي دايما ونظرتي للكورة المصرية عموما هي انها لا تصلح للمشاهدة الادمية لان اللي شوفته امبارح في ماتش مانشستر والبايرن
بعيد تماما عن ماتش الزمالك والشرطة مثلا
وحظي الاسوح خلاني اقلب اقلب علي ماتش الزمالك اللي كان شغال في نفس التوقيت
لقيت الجماهير طبعا ً كالعادة ماسكين قزايز المية وهاتك يا شتيمة . بس الحقيقة الاخ شيكابولا كان قايم بالواجب
بس هل ده فعلا ً منظر لكورة قدم وامتي هنبقي زيهم ؟؟؟؟
كرهت نفسي والله ورجعت بسرعة علي ماتش دوري اوروبا عشان الجزء اللي ناقص في نفوخي ميطرش
الكورة اكيد ليها جماهيرها . بس انا نفسي اسال الجماهير اللي بتشجع الزمالك او الشرطة او الاهلي حتي
ايه المتعة اللي بتلاقيها وانت قاعد تتفرج بغض النظر عن تمن كيلو اللب اللي شارية من مقله هريدي او كباية الشاي اللي في ايدك ؟
هل فعلا انتوا راضيين عن مستوي الكورة في بلدنا الحبيبة ؟ وامتي هيبطلوا يلعبوا مصارعة في الملعب ويتشقلبوا في الهوا زي اللي بيلعبوا جمباز ؟
ليه مش قادرين نتصور ان الكورة حاجة ترفيهية مش لعبة حياه او موووز .. قصدي حياة او موت !!
لا ويرجعوا يقولوا ده فيه واحد من المشجعين مات اثر سكته قلبيه
جتك خيبة قويه ... بقي دور كورة تموت علشانها ؟
طب اتفرج علي برشلونه مثلا يمكن تموت موته شريفة . او اتفرج علي ميسي يمكن تسمي البيبي اللي جاي محمود ميسي
او يمكن ربنا ينفخ في صورتك وتجيب 11 عيل وتعمل بيهم فريق وتعلي بمستوي الكورة المصرية
بدل ما احنا شايفين ماتش مصارعة فراخ بيجروا ورا البيضة
بجد انا مش عارف اقول ايه تاني واعيد ايه . بس فعلا نفسي نتفرج علي ماتش كورة محترم
لذلك انا عايز اقتراحات للسمو بالكورة المصرية عندنا
مثلا :
1- هل نجيب لعيبة من بره ؟
2- ولا ندي اللعيبة اللي عندنا كورسات خارجية في كيفية الجري ورا الكورة ؟
3- ولا نجيب شاشة عملاقة في الاستاد ونذيع عليها الماتشات الوروبية ونخلص بقي !!
حاجة تخنق
والي لقاء في تحليل مباراة المصارعة الحرة بين الزمالك والشرطة
وشكرا لحسن استماعكم
امضاء
مخنوق كيك
هناك 6 تعليقات:
والله عندك حق إنك تتخنق من الكورة المصرية والدورى الممتاز المصرى .. مش عارف مسمينه ممتاز على إيه ياحسرة ، دا آخره ياخد مقبول إذا نجح اصلا
سيبك من دا كله وإبقى سلم لى على هريدى ، وقوله : ألف مبروك على المقلة ، ويارب تكون مقلة الخير وتكسب كدة وتلعلع وتعمل سلسلة محلات فول وطعمية هريدى
دمت بكل ود .. تحياتى بالكاتشب والفلفل الحار
ملياش ف الكوره اووي ..
هما الناس بيزودوها حبتين فعلا .. وده كلام من مجربه .. اصلا عندي قرايبي ممكن ينتحرو لو فاتهم ماتش للأهلي .. ممكن يولعو ف نفسهم لو الأهلي خسر ..
مش لاقيه في الكوره أي فايده بصراحه ..
عـالم رايقه .. واهي حاجه بتنسى الناس همومهـا .. واحوالهـا ..^_^
يا خبر ابيض
دوك رامي بحاله هنا مرة واحده
يا نهار مدوحس زي صباع الكفتة
ازيك يا حبوب واخباراتك ايه ؟ دنا قولت انك دخلت في دوامة الماضي وتهت ومعرفتش تطلع منها !
بجد وحشني كيك اخر حاجة وكان نفسي اشوفك واسمع عنك .
ايه اخبار الدنيا الوحشة معاك والتدوين والحياه ؟ وصحيح هريدي بيقولك خلاص هيتجوز اهو البت اللي حبها من اسيوط
بيتقابلوا كل يوم تحت الكوبري بتاع رمسيس
سلامي حار ملتهب بدرجة جرارة خمسمية درجة فهرنهايت لحضرتك وكل الناس اللي بتفكرني بالماضي
سلاموز يا جميل وعايز اشوفك علي طول
نيجي بقي لحبايه البنادول اللي عامله صداع في المدونة دي اللي عماله تتنطط زي الكورة الجلد
باين عليكي فعلا ً ملكيش في الكورة خالص
ناس ايه اللي بتفك عن نفسها بالكورة ؟ هو اصلا احنا عندنا كورة ؟
لو عايزين ينسوا هموهم فعلا يروحوا يلعبوا كورة شراب في نادي ام رحاب في شبرا . وبلاش تتفرج علي الماتشات اللي تجيب جلطة متأخرة دي اللي تفكرني بالمحقق كونان
فل يا برنس
انا مش متفق معاك كومبليتلي
كلامك فيه كتير من عقدة الخواجه...شعرهم اصفر و عنيهم زرق..بس..دول اكيد على حق..
مين قال ان مفيش بره خبط و رزع ف الماتشات..يا سيدي الفاضل كارثه ستاد هيسل أو مأساة ملعب الملك بودوان سابقا شهدت مصرع 39 طلياني.. كان ليفربوا طرف ف المباراة و الهوليجانز الانجليز زروطوا الدنيا... ملعب ماركانا الشهير حصل فيه حاجات مشابهه...الشغب مش هنا بس يا برنس
ثانيا..مصر فيها كوره و كويسه إلى حد ما..و متنساش هناك الناس بتصرف بجد ع الكوره...ما معنى ان اشتري لعيب ب100مليون دولار ولا يورو..مستحيل طبعا يحصل في مصر..احنا بلد فقير ولازم نعيش بالامكانيات اللي عندنا..و الوضع الاقتصادي يفرض علينا ده...قد نكون تحولنا إلى انصاف ادميين و بنرضى بأي حاجه لكن صدقني نحن على الحافة بعد لم نسقط..
تقبل مروري و سورري ع الازعاج
د/رامي سعيد
بجد يا دوك رامي احييك علي مداخلتك
وصدقني انا مصري وابويا مصري
بس النقطة اللي اقصدها واضحة تماما الا وهي اننا عايزين نشوف كورة نضيفة
بمعني ان المشاكل انا متفق معاك انها في العالم كله . بس علي الاقل فيه كورة
احنا عندنا جماهير الزمالك الحيزبونيين مثلا بيولعوا في بعض ويشتموا وفي الاخر برده مفيش كورة
شفت بقي الفرق بسيط ازاي ؟؟
سابعا المشاكل اللي هناك اللي تفضلت وقولتها مثلا في هيسل . الكلام ده كان من كام سنه ؟؟؟ مش ايام ما اتعادلنا مع ايرلندا وهولندا ؟ وايام ما خسرنا بالعافيه قصاد انجلترا ؟؟
هههههههههههه ده من زمان جوي يا عم
من ايام انشاء الكورة علي المستوي العالمي
تاسعا . الشعب الانجليزي او الطالياني طول عمره عصبي وبيسلخ . بس في الاخر الكورة كورة ونضيفة وممتعة
احنا عندنا شتيمة وعصبية وغباء كروي وفي الاخر مفيش كورة برده . والاستاد بيكون حلبة مصارعة
النقطة الخماشر بقي اللي معرفش نطيت ليها مرة واحده ليه كده . ان عقدة الخواجة دي في التدريب بس مش في التشجيع
ههههههههههه
احييك علي مداخلتك واتمني اشوفك كتير ويا ريت متطلعش زملكاوي
إرسال تعليق