الثلاثاء، 13 أبريل 2010

فول ، بيض ، زيت ... احمدك يا رب


تم بحمد الله افتتاح سلسلة " الفقر نعمة " .. بقلم ( مخنوق كيك ) حصريا ً
فول ، بيض ، وزيت .. احمدك يا رب
مقولة مأثورة ومقتبسة من موقع شهير بجيب منه اخباري المنيلة دائما ً وابدا

الحقيقة جلست وحيدا في ظلام الليل اتفقد احوال الرعية من الشعب واقرا الاخبار اللي تسد النفس .. واللي تخنق طبعا

وتعقيبا علي الحيزبون حبيب قلبي اللي عامل موضوع خط الفقر
قعدت ادور ليه خط الفقر ده موجود ؟ وهل هو صحي ام لا ؟ وهل الحكومة فعلا همها علينا وعلي الشعب المصري ام لا ؟

انتهيت من القراءة وخلصت ببعض الافكار التي قد تكون فعلا نهج للحكومة الموقرة بتاعتنا

الناس اللي بتقبض 200 جنيه و 300 جنيه هل دول فعلا فقراء ام في الحقيقة اغنياء ؟
دلوقتي يا بشري انت وهو كيلو اللحمة وصل لستين جنيه وسبعين جنيه وحتي الكوارع اللي مش بعرف اكلها وصلت 38 جنيه للكارع الواحد

اللي بياكلو لحمة كتير بيجيلهم نقرص ومش بيعرفوا يمشوا مسافات طويلة . وده علي اساس ان الشعب بتاعنا داخل مسابقة ماراثون يعني
فبالتالي حفاظا من الحكومة علي رعيتها الموقرة غلت اللحمة عشان النقرص
طب ودلوقتي الراجل اللي بيقبض 200 جنيه هيجيب بيهم ايه ؟

يادوب مواصلات للشغل وده طبعا صحي جدا عشان الشغل بيزيح الهم
وهيجيب بيهم نص كيلو لبن للولاد وده طبعا صحي جدا عشان يكبروا ويبقوا حاجة كبيرة وتخينه في البلد
ويا دوب يفطر بخمسين قرش فول وده طبعا عشان نفسه تتسد طول اليوم ويؤدي المهمة الموكولة ليه في الشغل بدون ادني شكوي من الجوع

مش ياكل فينو ويبقي عيل فافي او يروح لجاد في وسط البلد وينحشر وسط الطبقات العليا وده طبعا هيعود عليه باكتئاب نفسي اثر وجوده وسط هذه العصابة الغنيه

ولو جاب كمان اربع بيضات يوميا او كل يومين عشان البروتين يبقي حلو اوي
يبقي بالتالي تقدروا تقولولي ايه لازمة اللحمة والكلام الفاضي ده ؟
مش هتجيب غير نقرص ووجع في البطن والناس كلها هيبقي عندها كرش ومحدش هيعرف يشتغل

ليه تقبض 2000 جنيه مادام تقدر تقبض 200 جنيه وتقدر تعيش بيهم ؟
هو افترا علي الفاضي وخلاص يعني ؟

عايز تجيب تكييف في الحر مثلا ؟ ايه الغنا الفاحش ده ؟ ده حتي التكييف هيجيبلك برد . بما اننا من هواه لبس الشورت والخروج بيه في البلكونه
عايز تجيب هديه للموزه بتاعتك مثلا ؟ صدقني حتي لو جبت هتسيبك في الاخر وتطمع في الدبدوب وهيروح لواحد غيرك والدائرة تدور ولن ينالك غير الحسرة والالم والبكاء زي فيلم صايع بحر

اوعي تتجنن في دماغك وتقول افتح دفتر توفير اوفر فيه عشان عيالي . لانك كده بتقضي عليهم . لان مفيش دلوقتي اكتر من الشباب المحششين اللي صارفين كل فلوس ابوهم الغني

يبقي بالتالي الاغنياء هم اساس كل الفساد اللي في البلد .. يبقي طز
وعلي راي المثل " يا باني في غير ملكك يا ساكن في حته تانيه "

تقدر تقولي ايه الفرق بين زيت كريستال وزيت قليه ابو 5جنيه ؟ مفيش فرق
حتي الكوليسترول ليه مميزاته !! هيخلي دكاتره الباطنة والقلب يشتغلوا
احنا كنا بنشغل بعض

لان لو كل الناس صحتها بقت حلوة مفيش دكاتره هيشتغلوا والامور كلها هتبقي عال العال وده هيفتح علينا حاجات وحشة كتير زي ايه مثلا ؟؟؟

1- الناس هتبتدي تفكر في حاجات تضيع فيها صحتها الحلوة وكله هيروح يتمشي علي الكورنيش عشان يحرق الطاقة اللي جواه بغض النظر عن كيفية الحرق

2- الناس هتفتضل تتخانق مع بعضيها لان ربنا اداها كتلة عضلية في جسمها وده هيعود علينا بخناق ودماء

3- النقطة التالتة ودي اهم نقطة ان الناس لو كلت كويس اكل نضيف دماغه
ا هتشتغل وطبعا سر شقاء الانسان هو عقله . فباتالي عطل دماغك وحطه في التلاجة عشان متفكرش كتير وحياتك تبقي زي اللوز

يبقي اكيد بعد سرد هذه النقط عليكو عرفتو ليه المرتبات محدودة والاكل محدود وكل حاجة بقت محدوده
عشان تفكيرنا في الاخر ........... يبقي محدود

وطبعا احب اوجه الشكر لكل المسؤلين وكل الناس الطيبة اللي بتضيع صحتنا عشان النقط المذكورة اعلاه
واحب اقول لعملاء البرجوازيه الحمراء اللي خايفين علي صحتنا . موتوا بحسرتكم
لانكم مش هتعرفوا اكتر من الحكومة

وشكرا لحسن استماعكم ومستني مداخلاتكم علي الخط الساخن .. او البارد

مش فارقة
واحب اذكركم برابط المدونة علي الفيستوك

http://www.facebook.com/group.php?gid=8896066997&ref=ts


هناك 7 تعليقات:

Kiara يقول...

هههههههههههههههههههههههه


لالالالا معاك حق جداا طيب حضرتك مش عملت حوساب اللبس هيتظبط ازاااااااااي بئا ؟؟

Kiara يقول...

سؤال يطرح نفسه

just dream يقول...

ههههههههه اولا عجبنى اوى اسم المدونه وع رايك ان اللى بره العباسيه بقوا هما اللى مجانين وفعلا المجانين ف نعيم
اما موضوعك ده حلو اوى ووجهة نظر فعلا وانت وضحتنلنا اد ايه الحكومه ياعينى بتتعب وزعلانه ع حال الشعب واهم حاجه عندها صحة الشعب وراحة باله المهم انت مقلتش الفول بتاع الصبح ده بالسوس بتاعه ولا مخلى هههههههه
دام قلمك المجنون ودمنا نحن زوارك المجانين

د/ رامي شهاب الدين يقول...

أنا لو رئيس جمهورية كنت عينتك وزير التموين يابرنس .. أينعم الشعب كان زمانه مات من الجوع ، بس برضو ممكن نقول إحنا كدة بتحل مشكلة الزيادة السكانية ، ولا سيما إن إللى هيفضل عايش مش هياخد حيز كبير من فضاء الله الواسع نظرا لحالة الرجيم القاسى إللى حضرتك كتر خيرك فرضته عليه


حتة كدة على جنب بما إنى دلوقتى موظف و دكتور إمتياز أد الدنيا وبقيت بمضى حضور وإنصراف وبزوغ أحيانا كمان .. أقدر أقولك إن الفول برضو بيعمل نقرص زيه زى اللحمه لأن سبب النقرص هو زيادة اليوريك أسيد إللى هو موجود فى كل البروتينات زى اللحمة والبقوليات إللى منها الفول طبعا

على فكرة أنا ضفتك ع الفيس بوء .. وبعلن نفسى الفريند المئوى ليك ع الفيس بوء .. دى أكيد ليها جايزة

دمت بكل ود .. تحياتى

مخنوق كيك يقول...

كوكي كل الناس بيحبوكي

اهلا بكيارا الوحشة اللي مش بتعدي ولا حتي تسلم
فالحة بس عمالة تتخطب وتتجوز من ورانا

المهم سيبينا من كل ده وخلينا في المهم
بالنسبة للبس فاكيد هيكون باقي السلسلة علي كل حاجة تمس الفقير . لان اللبس ده اهم حاجة بالنسبة للفقير لان معندوش غيره

فاكيد هيكون فيه موضوع في السلسلة وطبعا هنتظر مداخلتك في الموضوع وتقوليلنا رايك

يلا تصبحي علي خير عشان احتمال يقطعوا النور عني دلوقتي
سلاموز وشكرا لمداخلتك مع انك المفروض كنتي تخشي باتنين كيلو برتقان او حتي ايميلين لحمة

مخنوق كيك يقول...

قول ياااااارب

بجد رفعتي من معنوياتي بكلامك الجميل لاننا دلوقتي في امس الحاجة للكلام الحلو ده

بما ان حياتنا كلها اصبحت مرة خالية من اللحمة والتفاح ابو سبعة جنيه ونص

فبجد شكرا ليكي واللي يقدم شئ بيداه هيلتقاه

وهنيالك يا فاعل الخير والثواب

علي فكرة اي حد بيرد عندي بضيفة للمدونات المخربشة اللي بتابعها فخلي بالك عشان ممكن اخش اخربشك في اي لحظة

تقبلي تحياتي

مخنوق كيك يقول...

دكتور رامي امتياز

ازيك يا برنس الليالي الحمراء والزرقاء والكلاوي والقلوب

بما انك بقيت الفريند بتاعي رقم مية فاكيد مش هرد عليك هنا ولكن لازم اضيعك بموضوع منفرد علي الجروب وهعملك احلي سمعة

وعلي راي المثل . العيار اللي ميصبش يدوش

مع اني مش فاهم ايه علاقته بالموضوع بس جه علي بالي والسلام
احتمال من قله اكل اللحمة الواحد بقي بيهيس

شكرا وتقبل تحياتي وانتظر مفاجاتي