الجمعة، 16 أبريل 2010

اللعنة علي الكهرباء .. سلسلة الفقر نعمة


اللعنة علي الكهرباء .. الكهرباء تاخذ منا كل من نحبهم ..
ده مش فيلم صلاح الدين القليوبي

دا صوتي وانا بصرخ من الدور السابع لما النور قطع عندي وانا بكلم اخويا حديدي في قطر

الحقيقة ملقتش اي مبرر لحرقان الاعصاب اللي شركة الكهربا بتعملوا غير حاجة واحده بس
وهو الانتقام من الاغنياء اللي عندهم كمبيوترات وتكييفات وعايشين حياه نزيهه
وبالتالي تكملة لسياسة الوفاق اللي انا متبعها لتقليل الفارق بين الانسان المطحون والانسان المأنتخ زي حلاتي كده

انا بقالي مثلا اسبوعين تلاته شهرين كده النور بيقطع عندي كل يوم الساعة 12 بالليل وبقعد اصرخ بعلو الصوت لحد ما صوتي اتنبح

مرة يقطع وانا بتفرج علي الفيلم المفضل " حب فوق كنبة الهرم " او يقطع وانا بعمل الاكل الشهية بتاعتي وهي معكرونة بالتونة

وفي الحالتين طبعا مزاجي بيتعكر لان مفيش عندي شمع في الشقة وبضطر اطلع اقف بره في الروف زي اي فقير من الشعب
وساعات يقطع وانا بلبوس في الحمام باخد شاور مية سخنة بالسخان ابو 400 جنيه
منا غني بقي

وخلصت بهذا الاستنتاج المريح وهو حفاظا علي الروح المعنوية للفقراء

دلوقتي لو انت غني - لا قدر الله - وعند حضرتك تكييف وكومبيوتر واحتمال ورثت وجبت لابتوب توشيبا .. والكهربا قطعت وانت بتتفرج علي الدش ابو 700 جنيه اللي بيفتح قنوات الاوروبي

هتعمل ايه ؟ طبعا هيجيلك احتباس حراري في نفسويتك وتطلع تشرشح للناس الماشيين في الشارع
وتسب شركات الكهرباء زيي كده بالظبط مع اختلاف الالفاظ حسب لون التي شيرت اللي انت لابسه
وطبعا ده بالتبعيه هيأثر علي ادائك في العمل وخلافه . يبقي داويها بالتي هي الداء
ارجع للجاهلية وعيش عيش جدك اللي ذاكر علي ضوء شمعة او علي باب جامع . مش فاكر

يبقي اذن الحكومة بتحاول تنيم حضرتك بدري وبتنتقم منك لانك عندك تكييف بيبرد الجو الساخن وتلاجة بتبرد الماء الساخن
يبقي اذن لازم تدفع الضريبة وهو انك تعيش زي الفقراء بالظبط بعد الساعة 12 بالليل
تنام في الظلام وفي الحر واحتمال تتقلب وانت نايم تخبط دماغك في الحيط وتروح تتعالج وتحس بالالام اللي بيحس بيها الفقير

يبقي اذن المستفيد الوحيد في الموضوع والهارب الوحيد من الماساة الفسيولوجيه دي هو الفقير اللي قاعد تحت الكوبري مرتاح لا نور يقطع ولا اي حاجة
لانه اصلا معندوش نور

يبقي اذن بامانة واختصار شديدين الكهربا هي عنصر له صلة اساسية بالحالة المزاجية للشعب
والفقير يا عيني في حل من هذا العذاب لانه قاعد لا حامل هم الكهربا ولا حامل هم التنيوهات اللي مالية الجرايد عن قطع الكهرباء وقطع المية

ويقولك هنقطع المية من الساعة 1 صباحا لحد يوم الخميس اللي جاي واللي عايز يعيش لازم يملى كوز المية اللي راكنه تحت الحوض ... وطبعا يا ولداه دي ماساة محدش بيحس بيها غير الاغنياء

ومن هنا احب انوه تنويه مهم جدا زي اللي بتعمله شركة الكهربا

احب اوجه شكر ونداء لكل فقير واقوله انت عايش في نعمة لانك بعيد عن كل هذه المشاكل والترهات وعايش في حالك .. وفعلا سدق اللي قال " الفقر نعمة " وشكرا لحسن استماعكم

كان معكم من تحت كوبري قصر النيل
مخنوق كيك اخر حاجة .. يعني لحد اخر الشارع كده

وشكرا

لمن يريد المتابعة علي الفيسبوك
http://www.facebook.com/topic.php?uid=8896066997&topic=14526


هناك 8 تعليقات:

د/ رامي شهاب الدين يقول...

معلش يابرنس أصل فيه أزمة فى الكهربا اليومين دول ، بس أنا سمعت إنهم هيحلوها قريب عن طريق توفير بدايل للكهربا عن طريق توليد الطاقة من عصير القصب .. يعنى هتتعشى مكرونة بالتونة وقبل ماتيجى تنام بدل ماتطفى النور هتقوم شارب شوية العصير دول وخلاص

اصبر بس انت شوية وماتتخنقشى ، وسيب كوبر قصر النيل وروح بيتكم ، وزى ماقال سيادة الريس النهاردة زفت وبكرة كويس

سلاموكة

Kiara يقول...

اممممممممممم واصلا اصلا الناس القديمة كانت مش في عندها كهربا انتم كمان عاوزين نور بعد 12 لالالا ايه الطمع داااا

just dream يقول...

هههههههههه الكهربه دى عليها من الله ماتستحق لان فعلا بقت بتتراخم اخر حاجه لاء وايه كمان مش بيحلى ليها انها تفصل غير بالليل وتلاقى كل اجهزة البيت عملت بووووووم هههههههه وتحس ان البيت هينفجر
والله بقت حاجه خيبه لما نكون ف 2010 والكهربه لسه بتفصل والادهى من ذلك ان فيه ناس معندهمش كهربه اصلا
لكى الله يامصر مش لو كان عز الدين ايبك موجود كان الحال اتغير اهو حتى كان جاب شمعه لكل مواطن هههههه
جميل البوست المجنون ده تقبل زيارتى المجنونه لمدونتكم الاجن

مخنوق كيك يقول...

دكتور رامي شهاب

يعني دكاتره امتياز وربنا معاك يا حجوج
بالنسبة لعصير القصب انا مش بحبه

هل ممكن يولدوها من الخيار او الملوخيه ؟؟

اهو بالمرة نعمل سلطة كهربا ونختمها بالطشة .. باين دماغي اللي طشه

المهز يا مان انت من الاخر كده بتهيس عليا وبتضحك حليا
وبخصوص جملة الريس النهارده زفت وبكره كويس
انا برد علي سيادته وبقول بالفم المليان الغضبان الجعان

النهارده حواوشي بكره ديليفري

مخنوق كيك يقول...

كيارا

يعني الانشطة المسموحة والممنوعة والجرائم اللي مالية التاريخ من الجلدة للجلدة

انتي مالك بقيتي قنوعة ليه كده ؟
هي الشقة اللي انتي كنتي بتدهنيها من كام شهر دي لسه موصلهاش كهربا ولا ايه ؟؟

مخنوق كيك يقول...

قول يا رب

انا حاسس يا بني ادمه اني شفتك قبل كده هنا ورديت عليكي برده

مش كده ؟؟

علي كل انتي تشرفي في اي وقت . طبعا بعد الساعة اتناشر باليل عشان الكهربا بتبقي قاطعة ومحدش شايف حاجة :)

وكله يخش يخبط في بعضه في المدونة واهو الواحد يطلع بسبوبه برده
فعلا حاجة تخنق كيك لما نكون في 2010 والكهربا والمية بيقطعوا

والمشكلة الكبري ان مفيش انابيب
يا نهار مهبب
اسكتي خلي الطابق مستور لحسن فيه اكل علي النار خايف ليشيط

تقبلي تحياتي بنكهة الممعكرونة بالتونه

سَارةٌ يقول...

مخنـوق .. فين بوستاتك ؟

إنهردة 1-6 .. ومفيش بوست جديد .. !!

لعل المانع خيـر .. :)

ومستنيه بوست جديد ..

احمد امير القوصى مصر قنا قوص يقول...

ياجدع عيب النور يبقى عندك انت امال الناس الحلوه الحراميه اللى بيسرقو بلدنا
يجوزو ولادهم ازاى مش لازم يسرقونا عشان البهرجه الكدابه مصر اصبحت مجتمعات كتيرة قوى اللى عايش فى الضلمه واللى عايش فى نور سهارى واللى عايش على لمبة جاز واللى ميعرفوش لمبة الجاز واللى بياكلو على طبليه و اللى يقولو لك ايه دى الطبليه دى يعنى طبله يعنى مجتمعنا راح فى الكازوزه لان نص الناس اللى فى مصر محسوبين علينا هبطو علينا من الريفيرا ربنا يحمى مصر منهم وربنا يأتى الينا بالنور ومصر تبقى للمصريين بس