السبت، 22 نوفمبر 2008

حوار فكـــري خاص .. علي قـــهوة الــــمدونين .. إهـــداء للجميع



حبايب هارتي . انا وعدت كتير منكم ومن اللي كلموني اني لازم اعمل بوست فريد من نوعه .. بوست هيجمع كل الحلوين وهجيب اسمهم واحد واحد .

وانا ماشي في مشوارى الفكري تعبت ودماغي وجعتني قولت ادخل استريح شويه في اي قهوة او كافيتريا مودرن .. زي ما بعمل لما بكون في التحرير بدخل كافيتريا زد - او اهبر هبره في كنتاكي واطلع اجري . كده يعني

او ادخل علي كافيتريا نصبايه اللي في جنب هيلتون رمسيس اضرب سحلب ومدفعش .

عنيا اتكعبلت في قهوة المدونين . اللي جنب وادي النيل وانت رايح عبد المنعم رياض

دخلت طلبت شاي سكر بره - ولمونة .. اصل انا كان عندي برد . اصل انا راجل صحي جوي جوي

قعدت وانتخت بس قبل ما الشاي يوصل بصيت جنبي الاقي مين .؟؟؟؟ مين ؟!!!!

حبيب هارتي ومعشوق الجماهير ومشهور الفضائيات المحلية . ابو علي

ابو علي : حبيب الروح . اتاخرت ليه عليا يا كيك

مخنوق كيك : معلش يا كبيرنا .. اصلي كنت جعان فريحت علي عربية كبده ضربتلي اتنين كبده وسجق وجيت

ابو علي : وايه اخبار الحياه معاك يابني ؟

مخنوق كيك : عايشين بفضله خيرك وتحت ضلك يا حانينا

ابو علي : عرفت انك مجروح وقولتلك اللي يروح يروح . دي الصحة اهم حاجة والدنيا مش محتاجة

مخنوق كيك : بس الدنيا قايمة عليا يا كبير والصحة علي الاد .. يللا بقي اللي حصل حصل . انت لسه عايش في التقارير بتاعتك دي والادوية ؟

ابو علي : اعمل ايه طيب مشغل تحت ايدي شويه نقاشين . محدش عارف يظبط الورق

مخنوق كيك : هو ورق حائط وللا ايه ؟

ابو علي : لا دي اوردرات ادوية وحاجات مطلوبة . يللا اقوم انا عشان مستعجل . يللا باي

بقيت قاعد لوحدي . هرشت في دماغي وقولت اتجول في المكان - ابص يميني اخبط في شيشة .. ابص لصاحبها الاقي مييييييييين ؟؟ اوببببس

مخنوق كيك : حبيبي . طويل العمر يطول عمره وينصره علي مين يعاديه هاي هيئ .. والسلام علي طول شارع السلام للدكتور رامي .

دوك رامي شهاب : ايه يا مخنوق فين الحلقات اللي قولتلي عليها .. يعني انا ضربتلي حجرين لحد دلوقتي ومفيش نتيجة ؟ كل ما اسال عليك الاقيك في البورصة .. انت متعرفش ان البورصة ضاره بالصحة ؟

مخنوق كيك : معلش يا برنس الليالي . الواحد لازم يدوس بقلب جامد . بس من الواضح ان الدنيا هي اللي داست عليا . يللاظروف وهتعدي .. محدش بياكلها بالساهل

دوك رامي شهاب : ايه ده انت كنت في الساحل ؟؟ ايه بتعمل ايه يا لئيم بتاكل سمك وللا ايه ؟

مخنوق كيك : ركز معايا وحياه الشيشة اللي في ايدك .

دوك رامي شهاب : مهو انت اللي مش عايز تفهمني يا معلم

مخنوق كيك : الموضوع اني فاضي ومخنوق قولت ادخل البورصة والاستثمار بس كانت تجربه قاسية وخلاص خلصتها

دوك رامي شهاب : يعني افهم من كده ان موضوع البرصه انتهي خلاص واتحل ومش هيتقبض عليك في القريب المستعجل ؟

مخنوق كيك : طب من بقك يا دوك .. قصدي تف من بقك . دنا حتي بفكر ابني كنيسة وجامع وادخل الانتخابات . واكسب اصوات كتير وانصب علي الناس واهرب بره البلد

دوك رامي شهاب : بس كده الموضوع خلص من غير ما اخبط سؤال كالمعتاد .. هل هذه هي السعاده ؟؟

مخنوق كيك : يا عم دسوقي غيرله الحجر باين عليه دماغه ونونت .

طبعا قمت بسرعة قبل ما يدخلني في السياسة ويلبسني قضيه قبل ما ابني مستقبلي وانصب نصبايه حلوة اامن بيها مستقبل العيال .

وانا قايم طالع اجري لقيت واحد حط رجله قدامي كنت هقع جوه طبق الفول اللي قدامي . اصل كان فيه ناس بتتعشي

ابص لروحي فجاه . تعبت من المفاجاه . ونزلت دمعتي .. ايه ده انا قلبت مغني وللا ايه .؟ المهم بصيت لقيت احد عملاء البرجوازية المقعره والشيوعيه اللي دايما بيدخل المدونة بتاعتي بيحبطني ويغلبني في البنج

غير معروف : ايه يا مان ؟ انت علي طول بتتغلب وتتكعبل كده ؟ ما تفوق وانت ماشي

مخنوق كيك : بقولك ايه يا يللي متتسماش انت . انا مخنوق من ام الدنيا ومش ناقص حواديتك المحروقة دي

غير معروف : ليه يا اكسلانس ده كنت ناوي اكلك عيش غراب من المزرعة اللي انا شغال فيها بالليل . ده الكيلو باربعين جنيه يا واد

مخنوق كيك : مش عايز حاجة ووريني عرض قفاك من هنا ومشوفكش غير الجمعة اللي جايه امام صاله البنج عشان اعلم عليك

طبعا مشيت وانا زعلان . لقيت القلب الحنون بيطبطب عليا ويقولي متزعلش يا كعبول . ( كعبول ده اسمي الحركي لما كنت بطلع دهب وسفاري وكده ) تعالي هنا اقعد جنبي

مخنوق كيك : حبيب هارتي رامي اخيرا اتقابلنا . فينك يا عم وفين ايامك وعربيتك ولياليك الحلوة

روميو : هنا يا معلم بس معلش كنت مشغول في كود كان مطلع عيني . كنت محشور جوه الدي اس ال كنت بدور علي برنامج برمجه نضيف

الاقيش عندك واحد يا بوب ؟

مخنوق كيك : متلاقيش ومش هجيبلك , لما ابقي احوش فلوس النت هبقي ادخل ادورلك . لكن دلوقتي الحياه فحت وضنك وكيك . وبحاول اكمل علي القرشنات اللي معايا عشان اعيش للقرن اللي جاي .

روميو : يا عم متكبرش الموضوع انت بس عيش وخلي الناس تعيش

بصراحة انا اتخنقت من القعده دي انا هروح علي قسم الحريم احسن . اصل قهوة المدونين دي فيها قسم للرجاله وقسم للسيدات . فيه برده شيشه متخافوش

طبعا لازم عشان ادخل ادفع الرسوم . اطلع ايدي في جيبي واطلع جنيه وادفع الاقي مين ؟ يا للهول ؟ يا سماء امطري ملوخيه !!

مخنوق كيك : المدونة الكبيرة " عايزه اطلق و .... " يا محاسن الصدف . ايه اللي جابك هنا ؟

محاسن صابر : اهلا يا مخنوق . طب اعمل ايه طيب ؟ الكاميرات بتطاردني في كل مكان . اضطريت اجي امسك الكاشير هنا في القهوة يمكن اقدر اعيش حاله الامان اللي بدور عليها .

مخنوق كيك : بس انتي كده مش هتعرفي تحاربي الرجاله ولا تشجعي الفلانتاين زي ما عودتينا

محاسن صابر : خلاص الوقت ازف ومحسن طلع كداب والنفاق بقي مالي حياتنا

مخنوق كيك : انا حاسس اني قاعد مع يوسف وهبي يا اخواتي . طب ممكن نغير الموضوع . قوليلي طيب انتي متوقعه الاهلي ياخد مركز كان في كاس العالم ؟

محاسن صابر : بقولك ايه الاهلي ده عملي استحبس في نفسويتي وعايزه فتره نقاهه من الدنيا . روح اضربك كوب قهوة بعيد عني ولما تخلص ابقي تعالي حاسب

مخنوق كيك : طب مش ممكن اشرب القهوة وامشي من غير محاسب لحسن انا معييش فلوس اليومين دول .

محاسن صابر : وماله . اتفضل اشرب وامشي . وانا هبلغ عنك قبل ما توصل بيتكو .

مخنوق كيك : طب انتي هتفضلي قاعده لحد ما اجي ؟

محاسن صابر : متقلقش " هفضل كده وابقي قابلني لو حاجة حصلت "

طبعا مشيت وانا زعلان وكنت لازم اضرب قهوة عشان انفع المكان باي حاجة . ولو كان فيه كشري كنت ضربت واحد . يللا اركن انا في اي جنب يمكن الاقي واحده حلوة تطري القاعده

وانا قاعد بتفرج علي المكان لقيت الويتر جاي ومعاه شوب مانجو مش عارف ليه نفسي راحت للمانجو .. مش البانجو .. لا المانجو

الغريبة ان الراجل حطه جنبي . افتكرته ليا قالي لا .. دي للانسه اللي جايه هناك دي

مخنوق كيك : انا مش مصدق . HABIBA قاعده جنبي وبتضرب مانجو . لا مش معقول ؟ ده شئ لا يسدكه عكل . !!

حبيبة : ازيك يا مخنوق . عامل ايه ؟

مخنوق كيك : تمام . بس كانت مفاجاه اني اشوفك هنا . انتي مش المفروض تكوني قاعده علي النت بتضربي علي الكيبورد وبتنشري الاخبار في كل مكان ؟

حبيبة : يا عم مفيش نت عندي وقاعده فاضيه قولت اجي هنا اشوف الحبايب . وبالمرة اخبط مانجه اصل عندي صداع . اصل الناس بقوا عاملين قلق جامد والحياه بقت مش ظريفة

مخنوق كيك : قولت في نفسي "اخيرا هلاقي حد حاسس بخنقتي .. هيشاركني احساسي واحتمال اشاركها المانجه اللي معاها . وابو بلاش كتر منه " ليه بس يا حبيبه ؟ هو انتي لسه زعلانه علي مديحة ؟

حبيبة : لا هو مش معني ان مدحت غدر بيها يبقي هو غلطان . هي غلطانه انها وثقت فيها اصلا من الاول . المفروض كانت تقرا قوانين الجاذبية كويس وتعرف ان الحب مش سهل كده . ده حتي المسافة بتتناسب طرديا مع الشاورمة .

مخنوق كيك : اهلا بيكي في عالم التهييس يا حبيبه . لا حقيقي باين الويتر ده حطلك حبيتين تهييس في المانجة . انا مش عايز مانجة انا هقوم اقعد بعيد

واهو بالمرة ادخل الحمام لحسن الجيل اللي علي شعري بدا يقع .

طبعا زي العبيط قمت داخل الحمام ونسيت اني في مكان تحكمه قبضه السيدات . طبعا اخدت علقة مخدهاش عبد اسود في عصر المماليك لما دخل عنبر الستات علي راي جعناوي .

وطبعا محاسن صابر كانت مبسوطة لانها من انصار الستات كالمعتاد

لم اتوقع بعدها ان ممكن فيه جنس واحده ممكن تتعاطف معايا في القعده الظريفه دي . لكن غريبة طلع صوت كده وقال " حرام عليكم " ده مكانش يقصد . طبعا افتكرت انها حبيبة . لكن اتضح ان حبيبة مشغولة في المانجة بتاعتها وكسلت تقوم تدافع عني

مخنوق كيك : ايه ده . دنا ناسي ان فيه واحده اسمها سومة كانت بتزور المدونة بتاعتي

سومة : معلش يا مخنوق مشغولة . معلش علي اللي حصلك ده بس انت غلطان ايه اللي دخلك كده من غير ما تعرف . تعالي اقعد وملكش دعوة بحد قصدي بحده .

مخنوق كيك : وانتي ايه مشاريعك اليومين دول يا سومة .

سومة : مفيش هتجوز واقعد جنب امي

قعدت بقي واللي حصل حصل . طبعا عنيا ورمت قولت اقعد اشرب شاي واخلع من القهوة دي خالص اروح بيتنا احسن

اخيرا ً . شفت واحده جايه وجايبالي تلج وكبايه شاي . انا كنت متوقع انها هربانه في الجبل او مستخبيه في اي حته لكن الحمد لله طلعت عايشه

مخنوق كيك : يخرب عقلك . ومش خايفه حد يشوفك يا مولان ؟

كيارا : اسكت انا مش عارفه ايه اللي بيحصلي ده يا مخنوق . المدونة اتعملها هاك والرساله بتاعتي مش عارفه اركز فيها ولا عارفه اعمل حاجة . دي مؤامرة عليا

مخنوق كيك : معلش بقي يا كوكي . هي دايما الشجره المثمرة الناس بتخبطها بالفاصوليا

كيارا : يا عم دول اخترقوا الموقع وبوظوا كل حاجة . انا حزينه خالص

مخنوق كيك : معلش معلش . هاتي بس التلج اللي في ايدك ده عشان وشي ورم ومش شايف حاجة . وانتي ازاي تغيري نشاطك من غير ما تقوليلي ؟

كيارا : يا عم مغيرتش حاجة دي زمبه ضربوها فيا بس الحمد لله مسحت المدونة

مخنوق كيك : وانتي بتعملي ايه دلوقتي بعد ما غيرتي نشاطك ؟

كيارا : بفكر اجيب ميكروباص واشغله علي خط الهرم .

مخنوق كيك : فرصه عظيمة وانا هكون زبون دايم عندك لاني راقد علي الخط

كيارا : بس متقولش لحد لان الموضوع لسه في اطار السر ولسه مقولتش لصحباتي في التدوين . وده سر لو حد عرفه احتمال كله يدخل في الكار ده وملاقيش عربية فاضيه اطلع بيها

مخنوق كيك : سرك كبير . وكده فيه سرين " انك مدونة و سواقة ميكروباص " .... وشكرا علي التلج


وهنا خلصت رحلتي في قهوة المدونين اللي كانت ممتعه فعلا ً وكان نفسي تستمر اكتر من كده بس للاسف كنت لازم اروح اشرب النسكافيه اليومي بتاعي واتغطي وانام عشان اروح تاني يوم التجنيد اخلص ورق سفر وكلام من ده

وبكده قصتنا انتهت والقاكم علي خير و اوعي حد من الابطال يزعل مني .

واهديلكم الاغنيه اللي شغاله دي " بطمنك " .. هي اكيد خلصت بس ابقوا رجعوها بقي









هناك 17 تعليقًا:

د/ رامي شهاب الدين يقول...

هههههههههه

بقى أنا كنت بشرب شيشة؟

إنت مش عارف إن التدخين والبورصة ضارين جدا بالصحة ويسببوا الوفاة ولا إيه

عموما سيبك ..الأكلة الحلوة مفيش زيها المهم تهضم كويس..وعشان نهضم كويس عايزين الواوا..ولا هتدينا إسفين برده زى ماعملت فى حوار تاج السعادة

إكتب بوست الواوا ونزله من غير مقاومة يامان .. الهروب مش هيفيدك ، المكان كله محاصر من الآخر يعنى

سلام بقى عشان عندى خناقة فكرية سايبها مولعة هروح أزودها شوية فحم

وشكرااااااا

SHAPE YOUR LIFE (ABOALI) يقول...

ههههههههههههههه
يا عينى يا مان
يا متعنا وشهرنا ومشهر بينا عبر الاثير
يا قلبى
جمعت المدونين ونازل فيهم بوسات اقصدى بوستات
وكمان عملت تشكيله
دكاترة وسواقين وشيشه ومزه
يااااااااااااااااا حبيب الeye
من جوه جوه
ماسى ماسى
بس المزاج كان عالى
وكان فيه تروياء انانى
ماسى ماسى
بس حوااااااااااار
كوووووووووووووووووووول
كله فاين بيبى بودرة تلج لزوم الورم الحميد

وسلامى لماما سوزى وباما باراك

Kiara يقول...

هههههههههههههههههههههههههههههه

هههههههههههههههههههههههههههههههه


هههههههههههههههههههههههههههه

موتنييييييييييييييييييييي من الضحك

يانهار الوان

ايه السيناريوهات دي

ههههههههههههههههههه

وبقيتي ياكيارا سواقه

انتي سواقه

كيكيكيكيكيكيك

مخنوق كيك يقول...

الي دكتور شهاب روح الروح .

انا عارف ان الشيشة غلط لذلك انا ذكرتها كطريق لاتخاذ العبره يا مان .. انا قولت اخليك عبره ومثال يحتذي بيه . وبالنسبة للواوا انا مش فاهم ايه سر حبك لهيفاء . طب ايه رايك ان المرة اللي جايه بقي هعورك واخليك تغني بوس الواوا

يللا اشوفك في البوست اللي جاي

مخنوق كيك يقول...

الي ابو علي حبيب هارتي الساكن جوه الفؤاد

طبعا يا كبير انت الكبير ولازم نشهر بيك .. قصدي نخليك مشهور يعني

بالنسبة لبودره التلج .. هي بتعمل ايه دي صحيح اصلي معرفش

مخنوق كيك يقول...

الي مولان .. مش هرد عليكي غير بكلمة واحده بس عشان تعرفي معزتك عندي

انتي جايه اشتغلي ايه ؟؟؟

سوااااااااااااااااقه


علي جنب يا اسطي

خلي بالك لانهم قرروا يلموا التكاتك لو كان دماغك وزتك وللا حاجة

Kiara يقول...

هههههههههههههههههههههههههههههه


بقي كده ماسي ماسي

طب مس هقف بقي وهوديك الصحرا واسيبك اءاءاءاءءاءاءاء

adel يقول...

هههههه اول مرة ادخل و اول موضوع ااقراه بس جامد موت موت موت :):)
عاجبتني حكاية مولان و الميكروباص دي
بس انا راي تجيب تك تك افضل و ارخص
هههههههه

عادل
http://elbald-dy.blogspot.com/

اول مرة و ان شاء الله مش الاخيرة

Unknown يقول...
أزال أحد مشرفي المدونة هذا التعليق.
مخنوق كيك يقول...

فركشاوي .. ناوي

للاسف يا حبي همسح تعليقك لانه مش ظريف والمدونة هنا للمجانين فقط

اما الكلام الجاد فعند حضرتك مش عندي

خخخخخخخخخ

خفيف مش كده ؟

غير معرف يقول...

بقى كمان مش عجبك عيش الغراب مش كفايه بسيبك تغلبنى علشان ارفع من روحك المعنويه وكمان مش عاجبك
وبتتبتر على المشروم
طب انا هشهد عليك زوار المدونه الكرام
بقى ايه رايكم فى المشروم
هههههههههههههههههه

اقصوصه يقول...

looooooooooooool

انا كنت بنام قبل ما اخلص التدوينه

بس الحمدلله وبعد جهد جهيد

قدرت اني انتهي من قرائتها

عىل خير :)

استمتعت بقراءة الحوار رغم طوله:)

تقبل مروري

mahasen saber يقول...

يعنى انا ااقولك ايه
انتا وقعتنى من الضحك
فعلا فعلا اسعدتنى جدا جدا يا مخنوق افندى
بس تعالا هنا انا بدافع عن الفالنتين وبشجع عليه
شكلى فعلا هبلغ عنك
انا مبشجعش ابدا عليه ولا بحبه
ااقرا البوست كويس بدا ما اجننك اكتر

متفقين واخرتها بتقعدنى كاشير ماله كرسى رياسة الوزرا انتا خسران حاجه
اعوذ بالله من الحقد ههههههههه

مخنوق كيك يقول...

اهلا اهلا بمحاسن صابر

يعني احلي سلام لتسعين دقيقة والمحور والدائري

والشكر للناس اللي في الاستوديو
بس ايه الحوار الجامد اللي عملتيه ده يا محاسن .. كده من غير ما تقوليلي ؟

بس علي فكرة انا سجلت الحوار كله علي الريسيفر بتاعي وقريب اوي هرفعه وهصيطك علي النت وكلنا معاك يا عبد الناصر

اذا مات عبد الناصر فكلنا حسني مبارك

واستعدي للخضة اللي جايه في البوست اللي جاي .. هتقولي يا ريتها جت علي الكاشير

mahasen saber يقول...

مخنوق افندى سولفان
ازيك يا جامد يا مضحكنا ومنسينا هم الدنيا وشويه شويه هتنسينا اهالينا

شوف بقول شعر فى جنابك بعوضك عن العلقه اليى كلتها

كل عيد وانتا بالف خير وسلام
واسرتك وكل من تحب
بكل صحه وستر

ومستعده يا سيدى خض براحتك

غير معرف يقول...

دمكوا زى السم والله الواحد انخنق اكتر انا ماضحكتش خالص ايه القرف ده الواحد ما شفش كده

مخنوق كيك يقول...

غير معروف

غريبة اوي انك تعليقك جالي في يوم اجازتي . يلا هرد عليك مش مهم

اولا يا لذوذ انت من كلامك باين انك داخل اصلا مخنوق فمش محتاج حد يخنقك

عارف انت لو دخلت ونفسيتك مرتاحه فعلا هتحس بالكلام من ناحيه مختلفه خالص

ثانيا انت داخل تقرا الموضوع الوحيد اللي خاص بالمدونين ؟؟ مهو طبيعي مش هتضحك لانك مش عارف مين اللي انا كاتب عليهم دول

سابعا انا شاكك انك بنت وان انا اعرفها كمان . بتحاول تبوظلي يوم اجازتي . لكن ابدا ابدا ً مش هتعرفي برده

ههههههههههههه