الاثنين، 8 ديسمبر 2008

العـــيد فــــرحة ... مااااااااااااااااااء



السلام عليكم

كل سنه وانتوا طيبين يا حبايبي . والله وحشتوني
وقولت لازم انزل بوست عشان الخرفان والجديان والجمال .. وما زاد وزنه وغلا ثمنه

طبعا النهارده اول عيد الاضحي اعاده الله علينا وعليكم باليمن والبركات ويا رب دايما يبقي حياتنا كلها سعاده وانبساط ولحمة وبسكويت وفطير واي حاجة حلوة بتحبوها ... وطبعا مش هننسي البلح الزغلول عشان اليومين دول غلي بقي باربعة جنيه .. معرفش ليه كده !!!

الحمد لله ااتحدت الاراء السنه دي اننا نجيب جاموسة - اعزنا الله واياكم - وقولنا بقي نضحي بيها وناكل وناكل لحد ما نفقد الوعي . اهو برده يوم في السنه ولازم كله ينبسط

نزلت صليت ورجعنا عشان ندبح . طبعا وقفنا في الطابور عشان كان الجزار كان مشغول . كان فيه في ايده جمل بيخلص عليه

طبعا انا فرحت . ووقفت عشان هييييييه اول مرة اشوف جمل وهو بيندبح . ويا سلام لو كان فيه شويه اكشن والجمل يجري في الشارع ويموتله اتنين تلاته ويكسر العربية الجيب اللي كانت واقفة قدام البيت عندنا .. اصلها كانت موديل 2008 !!

وحبذا لو في حبه دراما والجمل يدوس علي واحده عجوزه عندها 83 سنه وييجي بنتها تعيط ونحوش ونمسك الجمل .. يللا اهو كله عيد
طبعا الجمل كان واقف بياكل لا ليه ولا عليه . المهم الجزار دبحه خلاص وتناثرت الدماء والصيحات والتصفيقات . زي ميكون خدنا كاس اليابان مثلا او ان خير اللهم ااجعله خير الريس ساب الحكم

طبعا دي حاجات مستحيله انا عارف بس يللا اهو عيد واللي عايز يحلم يحلم
جه دورنا وطلعت الجاموسة بتاعتنا علي المنصة عشان تقابل المصير المحتوم المظلم .. بس يللا كلهم لها

وتم الذيح والتسليخ وكله يروح البيت يللا واتقسمت وانتهي الموقف .
وانا ماشي لقيت فيه جدي هيتدبح . قولت اقف اتفرج اشوف المسكين ده وهو بيقابل نهايته المهببه . بس بجد حسيت بجوع جامد اوي .. احتمال عشان مفطرتش . احتمال

المهم بصيت في عيون الجدي .. مش حبا فيه .. اصلي كنت شاكك ان عيونه خضرا . بس طلعت عسلية .. زي عنيا .. مش عايز معاكسة
حسيت ان الجدي عايز ينطق ويتكلم .. قولت اكتبله بيتين واهديهملكوا
ده حوار بين صاحب الجدي والجدي نفسه وهو واقف علي الميزان بيتوزن الوزنه الاخيره

فالجدي كان زعلان فالراجل بدا الكلام وقال :

الا يسرك ان تكون اضحيتي .. فتحل في لحمي وفي اعصابي
وتكون عزما في دمي .. ووجبه غداء لي ولكل احبابي
فاجابه الجدي بكل اسي .. والموت يخنقه اليك جوابي
ماذا جنيت انا ؟؟ ............ فحق عقابي ؟
افعلت فيكم اي جريمة ؟ ... اين العدالة يا رفاق شبابي

فتبسم الرجل بسمة هازئ ... واجاب من خلف كل الاسوار
لا اين . فالشرع المقدس هنا .. ذبح الجديان بايدي الجزار

وهنا الجزار انهي القصيدة الماساوية دي وسال الدماء في الشارع .. لدرجة ان فيه عربية جت بسرعة ترطشت علي هدوم اللي واقف جنبي .. يللا مش مهم هو كان طويل اصلا ومش شايف منه حاجة

اهئ اهئ اهئ .. انا حزين عليا الجدي الغلبان اللي راح فطيس ده .. بس زمانه بيتوحوح علي الشواية دلوقتي . واكيد انا هشترك في اكله كمان يعني صوابعي ستلوث بدماء الجريمة دي

اوصيكم واوصي نفسي يا جماعة .. الشواية ثم الشواية ثم الشواية ... لازم تنوعوا في الاكل . حته مسلوقة علي حته مشوية علي حته لاخوكوا الغلبان اللي عمال يكتب ده .

اللي عايز يبعتلي لحمة يبعتلي علي ص.ب 14 حارة الجديان .. ميدان ابوالعلا شارع ابو الفدا متفرع شارع الجامعة امام بتاع العصير اللي قفل وحول سمكري سيارات

وطبعا بالنسبة للناس اللي لسه مدبحتش ولسه هتضحي اليومين اللي جايين دول . الاضحيه لازم تكون سليمة مفهاش مشكلة يعني متكونش لاعبه دور بوكس ورجليها اتكسرت او لسه راجعه سباق وعنيها طارت

او واحد مثلا حط الخروف علي السطح فالخروف حس بالوحده فعمل اسبرنت في الشارع والراجل نزل جابه وضحي بيه .. لا طبعا مينفعش . هي سلطة ؟
واللي هيجيب حاجة اكبر من الخروف ( زي دكتور شهاب مثلا او محاسن صابر ) يا ريت يجبها فوق ال 400 كيلو لانها مش هتحدف لحم كتير .. صدقوني انا شفت بعنيا محدش قالي

وبالنسبة للفشا والكلية والكرشة والحاجات الغريبة دي .. مليش دعوة بيها لاني مش بحبها اصلا ً
ومحدش يسيب راسة لحد .. قصدي يعني راس الاضحيه . اهو برده تاخدها تخلي الواد يلعب بيها في الشقة او يخبط بيها اخوه او الست الوالدة تاكلكوا لحمة راس . فاهم يا ابو رامي ؟

واخيرا ً . اقول من كل قلبي قلبا وقالبا ومقلوبا ً .. لا تنسوا اخوانكم المساكين والفقراء والمدونين . وكلوا بثوابه
احنا برده كاتبن واكلين شاربين نايمين مع بعض .. ولا بنصون اللقمة الحرام . ومتنسوش الريجيم

اخوكم . مخنوق .. بس مش اوي لاني رايح اكل
القاكم بعد العيد بقي

وتحياتي لمحاسن صابر وابو علي ( ladies first ) والدكتور شهاب وكل الحبايب الحلوين وكل سنه وانتوا طيبين

كن دائماً بين الخراف مع الجميعْ
طأطيء و سر في درب اسرتك الوضيع
أطع الذئاب يعيش منا من يطيع
إياك يا ولدي مفارقة القطـيع
ن أنت أتقنت الهروب من النزالْ
تحيا خروفاً سالماً في كل حال
تحيا سليماً من سؤال و اعتقال
من غضبة السلطان من قيل و قال
ما العز ما هذا الكلام الأجوفُ
من قال أن الذل أمر مقرف
إن الخروف يعيش لا يتأفف
ما دام يُسقى في الحياة و يُعلف




هناك 24 تعليقًا:

adel يقول...

ههههههه

كل سنة و انت طيب يا عم ....و عموما انا هبعتلك اللحمة علي الميل ....اهو اسرع و احسن برضه :):)

عادل
http://elbald-dy.blogspot.com/

adel يقول...

تصدق مكنتش اعرف اني اول تعليق :):)
و خدت التاني كمان ....ههههه

كل سنة و انت طيب تاني :)

SHAPE YOUR LIFE (ABOALI) يقول...

ههههههههههههههه
وانا اقوووووووووول المدونة متختخه
وبايان عليها الاحمرار والدموية الفظة
وسامع اصوات شكاوى على الخط الساخن

شكوى من الجديان لعدم كتابة الابراج اليوم
شكوى من الجمال لنتشيط السياحة الى الاهرامات
شكوى من الجاموس للمطالبة بحق رعاية للمولود
وشكوى من الخرفان للحفاظ على نهر النيل
من الماااااااااااااااااااااااااء

وانت يتريك مجمعهم عندك ونازل حتتك بتتك عليهم
و ماهنش عليك الاهات
يا قلبك القاسى
بكرة يتلموا عليك وتبقى
مدونة مخنوق بسبوسة مش كيك

وكل عام وانت بصحة
وبوست فعلا فى ميزان الجزار يوزن كتير

Kiara يقول...

ههههههههههه انت فصصته

كل سنه وانت طييييييييييب

عيد سعيد

ومش تغيب بقي الله

نـــــور يقول...

:))

كل سنه وانت طيب وعيدك سعيد يارب
بطل اكل هتفطس من كتر اللحمه
وبعدين شوب عصير مين ياكداب ؟
انا كنت بشرب مانجه وانت شفتنى اممممممم؟؟

اه اكداب هصرخ بعلو صوتى فى البلوج واقول مااعرفوووووووووش :)

تعليقك عسل بجد واسفه انى اتأخرت فى تهنئتك يارب دايما سباق بالخير

صحيح ياغشاش واخد العنوان بتاعى بس انا برضه مختلفه لانى كاتبه العيد فرخه من فرحه p:

عيدك سعيد ياجميل

م/ الحسيني لزومي يقول...

تقبل الله منا ومنكم
وكل عام وانتم بخير

mahasen saber يقول...

ههههههههههه وكمان ههههههههههههههههه

بس هتقلب نكد بئه افهم جزئية واليى هيجيب حاجه كبيره زى د/ شهاب ومحاسن صابر اغهم دى
هل تم تشبيهنا بالخرفان او الجواميس او الجمال هههههههههه افهم بس اصلى حساسه قوى فى المواضيع دى

بس ايه الروقان ده كله هيا اللحمه بتعمل فينا كده يا شعب بتعدل المود خالص
يعنى واحد صاحبنا اول مره مشفوش مخنوق كيك
ده قلب فرحان كيك وده كله بسببها ربنا يسامحها بئه الحته الحمرا

mahasen saber يقول...

بس كل عيد وانتا بالف خير
وفكرنى العيد الجاى اشارك فى الجاموسه او نلم بعض كده كلنا يا بلوجريه ونجيب جمل
اهه ونفرحك بئه وتتفرج عليه وهو بيتدبح وتكتب قصايد فيه للعيد اليى بعده

كل عيد وانتا مش مخنوق ولا زعلان ولا مجنون برضه

وشكرا على التهنئه بالعيد مش عارفه اودى تهانيك فين
ااقلك اعزمك على لحمه
ولا بلاش خليها عصير اوفر اصلى مش غاويه لحمه اسيبك يعنى تاكلها واتفرج عليك

mahasen saber يقول...

استنى صحيح هيا دى الخضه اليى قلتلى عليها فى تعليق البوست اليى فات
ههههههههههه
هيا دى خضه انا قلبى ميت ومبخافش اصلا
انا يا مخنوق بترعب بس

مخنوق كيك يقول...

يا مسهل .. نشمر الكم بقي عشان نرد علي كل الجماهير .. احم احم .. استنوا اشيل بس حته اللحمة اللي في بقي دي .

مخنوق كيك يقول...

ADEL
كل سنه وانت طيب يا حبوب ويا ريت متبعتش حاجة علي الميل عشان متراقب .

شكرا يا حبوب ولازم افط عندك فطة في المدونة

مخنوق كيك يقول...

ABOALI

حبيب هارتي معلش يا مان مقدرتش اجيلك امبارح لان عندي برد مموتني واحتقان زور ورشح مبهدلني مش عارف انام

لكن كل سنه وانت طيب يا كبير واشوفك النهارده ان شاء الله وشكرا علي الرد الجامد بتاعك

ومتقلقش نصيبك محفوظ يا كبير .. شوية دم علي جنب

مخنوق كيك يقول...

مولان

مش عارف ليه يا بنت لما بدخل اقرا ردك في اي موضوع احس انك ضاربه صباع حشيش وعامله دماغ . مش عارف ليه

بس احتمال عشان بتيجي تردي وتجري من غير حتي ما تقولي رايك في الخروف ولا الجاموسة بتاعتنا

مخنوق كيك يقول...

صحيح كل سنه وانتي طيبة يا مولان يا بتاعه الكرتون انتي

Kiara يقول...

هههههههههههههههههههه

ماشي ماشي

بقي بضرب صباع حشيش منا قلت انت فصصته علي الخرف يحني

ياحيني عليكي ياكوكي دايما بيظلموكي هههههههههه

Kiara يقول...

مالها بتاعه الكارتون عااااااااااااااا

يامظلومه ياني

مخنوق كيك يقول...

HABIBA

انتي لسه محرمتيش يا بنتي ؟؟

طب تحبي بقي اقول للناس هنا انتي عملتي ايه ؟ يعني المانجة ومش معترفه وبتكذبيني امام اتباعي

طب اشهدوا يا عالم . حبيبة بعتتلي علي ص.ب 14 العنوان اللي انا كاتبه

بعتتلي شويه كوارع ومن الواضح انهم كانوا متاكلين قبل كده !!

هل ده ينفع ؟ يا حماه البشرية ويا انصار مخنوق كيك ؟

هسيبك لضميرك يا حبيبة . بس شكرا علي التهنئة وكل سنه وانتي طيبة

مخنوق كيك يقول...

م / الحسيني لزمي .

كل سنه وانت طيب يا جميل ولزوما عليا اقولك تبعت حتتين لحمة عشان التعارف

مهي الصداقة مش ببلاش

مخنوق كيك يقول...

يا مولان

يا حاجة

سيبيني اكتب كلمتين علي بعض .. انتي دايما بتنطي كده وسط الزحمة

روحي العبي مع كونان لحد ما اكمل تعليق وهرجعلك .. او روحي كلي لحمة

Kiara يقول...

لا هلحب هنا بقي

ومش هلحب مع كونان بس هه ومش بحب انا اللحمه اءاءاءاء

مخنوق كيك يقول...

محاسن صابر

محبوبه الجماهير وصاحبه الصيحة الاولي في عالم المراه ومقطعه الرجاله من يومها

الحكيكة مش عارف ارد علي انهي رد من بتوع سعادتك بس هحاول ارد علي كلوا انا برده مقدرش انفض

يوووووووووووه .. البنت بتاعه التوكتوك " مولان " عماله ترد والايميل بيشتكي منها .

كل سنه وانتي طيبة يا محاسن وحاشا وماشا انا مقدرش اشبهكوا بحاجة خالص . انتوا برده الاساس واناا عن نفسي لو هشبهك هشبهك بالخروف الاسترالي اصله امور اوي . ههههههههههههههه

بس صدقيني مقصدك حاجة والله انتوا الخير والبركة

مخنوق كيك يقول...

تاني رد برده علي محاسن صابر .. احنا الحمد لله شعب بتاع لحمة وخصوصا انا . عايزه يا تديني سندوتش جبنه فلامانك يا نص فرخة

نحن شعب افعال لا اقوال

وانا موافق علي اقتراح اننا نلم من بعض ونجيب ديناصور .. قصدي جمل ونفرح فيه كلنا ونتصور جنبه

ونوقف دكتور شهاب جنبنا عشان لو الجمل جري ولا حاجة يديله مهدئ

وبخصوص الخضة .. فمتقلاقيش جايه في السكة . انا بس باكل ومش بعرف اخض حد وانا باكل لاني بكون في منتهي البراءه والانسيابيه المكتمله . فاستني بس يوم وللا اتنين وانا هعمل موضوع اخبط فيه كل المدونين

مخنوق كيك يقول...

وكل سنه وانتي طيبة يا محاسن وكل عيد وانتي طيبة وفي اتم صحة وعافيه

استاذن بقي عشان اروح اكمل اكل اللحمة لحسن ميدو اخويا يخلص عليها

د/ رامي شهاب الدين يقول...

كل سنة وإنت طيب ياجميل


معلشى إتأخرت عليك .. عيد بقى وإنت عارف باللى بيحصل فيه

عندى سؤال صغنن خالص : هو الجدى طلعت عنية عسلية فعلا؟؟؟ .. وهل إنت عنيك برده عسلية ؟؟؟ إنت متأكد من إللى بتقوله ده يامان ولا إيه؟

ماعلينا

سلام بقى عشان أروح أكمل أكل لحمة