السبت، 20 ديسمبر 2008

السمــكة .. أكـــلت كابل النت بين مصــر وإيـطـاليا



السلام عليكم

حبايبي الحلوين المستكنيسين . معلش انا حاسس بيكم وبالماساه اللي كنتوا بتمروا بيها
لاسيما ان النت اصبح في حياتنا زي العيش الفينو للاغنياء .. والعيش البلدي للفقراء .. والحشيش لاصحاب المزاج
طبعا كلنا مرينا بوقت عصيب جدا ً خالص كيك اليومين دول لاننا كلنا عرفنا الماساه اللي مصرنا الحبيبة مرت بيها . وطبعا كلنا عرفنا
السمكة اللي قطعت كابل النت . واللي حولوا يصوروها بالاشعه تحت الخضراء في 90 دقيقة

مش فاهم دي سمكة من نوعه ايه دي ؟؟ هي دي سمكة قرش وللا حوت . ؟ ولا يمكن تطلع سمكة البالون اللي بتاكل الناس وهي نايمة .

مرت مصر باسوأ 32 ساعة ونص في حياتها . اصعب من العدوان الثلاثي سنه 56 . واصعب من لحظة فك شفرة حجر رشيد ... لان الشباب كلهم افتقدوا الهواء والشات . والفيسبوك
بس بجد حاجة عظيمة جدا لما نلاقي ان النت قطع عن مصر كلها عشان الكابلات اتقطعت بين مصر وايطاليا .. وللا معرفش مصر وسنغافورا

بس برده مصر هي امي نيلها هو عمي . وشمسها السماري وشكل امها في ملامحي .. حتي لوني امحي وهيسود قريب بسبب عمايلك السوده يا مصر
وبرد علي كل المرتزقه عديمي النظر ان مصر دي امنا والنيل روانا والخير جوانا ولازم نقف معاها شويه
ايه المشكلة يعني لما النت يفصل يومين تلاته عشره ؟ والكهربا تفصل كمان اسبوعين وللا اتنين . وتصحي من نومك متلاقيش اكل ؟
ايه المشكلة ؟ مصر ياما ادتنا كتير . فيها ايه لما يوم نديها ؟

واحب اقول " ليا مين غيرك يا بلدي ليا مين .. يللي علمتيني ايه معني الحنين "
تقطعي عننا النت يوم ونص يا مفتريه ؟ وكل ده ليه !! عشان نطفش يعني ؟ طب مش طالعين منها برده
ويانا يا انتوا في البلد دي يا نجايحه . ومن النهارده مفيش حكومة .. احمد السقا هو الحكومة

متعرفوش يا جماعة الفتره دي عدت عليا ازاي . حقيقي لا ماسنجر لا تصفح ولا منتديات لا فيس بوك .. فظيع فظيع فظيع
بقي بسبب حته سمكه ينقطع اتصالنا بالعالم الخارجي ؟ والفالحين سايبيلنا المواقع المحليه زي مصراوي ودي لنك .
دول هنعمل بيهم ايه دول ؟ هنفتيهم في الشاي وناكلهم ؟
احنا الحمد لله الكيميا بتاعتنا بتتظبط في موقع طرب او الدي في دي او موقع من المواقع الثقافية ... زي كتاب ابله نظيره والكلام ده
دنا حتي كنت كاتب وصفه الملوخيه علي الفيس بوك وبسبب النت معملتش ملوخيه .. اضطريت اعمل مكرونه بالتونه
واتحرقت لان النور قطع كمان ومكونتش شايف .. حاجة تقرف

ربنا يسامحك يا مصر . عايزه تموتيني ؟ مش عارفين تحافظو علي شويه كابلات ماشية في المية ؟ اسفوخس عليكم
بس انا عارف مين اللي ورا الحركة دي . دي اكيد حركة ارهابيه عشان كلنا نهاجر بره البلد ونروح شبرا . بس ابدا
وحياه ابوهم لقاعد لهم فيها باللابتوب بتاعي وهشيت علي موقع نمرا كمان . وهستمر في كتابة التدوين لاخر قطرة في دم احمد صحبي

يعني النت مش يفصل مثلا عن حته واحده ويسيبوا حته . لا دي مصر كلها اتقطع عنها النت ؟؟
طبعا اصحاب النفوس الضعيفه والشخصيات المهزوزه هيسالني ويقولي ليه ؟ ليه النت اتقطع عن مصر كلها ؟
االاجابه بسيطة . مصر دي عظيمة يا ولاد وكل حته في مصر ماسكة في الحته اللي جنبها . ولازم لما النت يقطع عن الهرم لازم ياخد في ديله الدقي لحد التحرير .. ويا نعيش عيشه فل يا نموت احنا الكل

بس برده ارجع اقول مصر هي امي ونيلها هو عمي
وبخاطب جميع المسؤولين القائمين علي التحقيق والتفحيص والتمحيص والجري وراء السمكة ... شكرا يا بشر علي النت وعودا حميدا ً والحمد لله انكوا لحقتونا بدري بدري .. قبل ما كان يحصلنا حاجة

ده احنا كنا ممكن ننقرض في الحركة الارهابية دي . بس الحمد لله جت سليمة
وعلي فكرة انا كمواطن مصري النيل رواه والخير جواه بيحب مصر انا ناوي اعمل عملية انتقامية الا وهي :
الوزير طلع وقال يا جماعة محدش يحمل حاجة - لا افلام ولا اغاني ولا .... - عشان النت بطئ وكله يساعد بعضه والاولوية للعواجيز والحوامل وذوي الاحتياجات الخاصة
فانا بحمد لله حصلت علي مجموعة مصطفي محمود كامله - 6 جيجا - وهحملها كلها من دلوقتي لحد ما الكابلات تتقطع تاني
مهو محدش ضامن عمره ولازم اامن مستقبل العيال بكام جيجا قبل ما اتنقط من البلد دي
وابقي قابلني يا وزيرنا لو حد عرف حتي يدخل علي موقع مصراوي .
وبناشد كل الشباب وكل البنات .. محدش يقرب من الكومبيوتر . لانه دلوقتي تحت سيطرة من لا يرحم .
وهطالب المحكمة بتعويض لما حدث لي من ضرر نفسي وجسدي ومعنوي . وهطالب مبلغ كبير مصحوبا بطبق من الملوخيه وكيلو خيار

وبالنسبة للعصابة بتاعي دكتور شهاب ومحاسن وابو علي وكل الناس الحلوة اللي مش فاكرها . بطمنكم وبقولكم مصر امانه في ايدينا . ولازم نحافظ علي السلك بتاع النت ويا ريت محدش يشرب سجاير جنب الكورنيش عشان ممكن السجارة تقع في المية فتلسع السلك اللي تحت المية ونمر بازمة عصبية تانيه . ومنقدرش نلم المشكلة . ومش كل مرة تسلم الجرة
ويا ريت نقف دقيقة حداد كلنا علي اللي حصل .. طبعا انتوا عارفين
علي المكرونة اللي اتحرقت !!!!!!!!!!!!

وفي نهاية الحلقة بهديلكم الاغنيه دي عشان كلنا اصلنا علي نياتنا .. ومش فاهمين ايه اللي بيحصل في البلد
وسلام حار لكل الناس الحلوة اللي منفضالي



هناك 26 تعليقًا:

queen_of_Dark يقول...

هااااااااااااااي مستر كيك
مقااااالة جميلة بس ايه ذنب مصر ف السمكة اللي اكلت الكبل؟
يعني هي اللي قالتلها كليه؟؟؟
مسكينة يا حبيتي يا مصر ديما ظالمينك!!!!..

غير معرف يقول...

ياعم دى الجزمه اللى عدت من بوش جت فى السلك اتقطع يعنى ولا سمك ولاغيره

adel يقول...

ههههههه

انا وقفت دقيقة حداد....بس ازاي ابطل دنلود... دانا اموت ياعم

و مش هاسيب النت يعني مش هاسيبه

متقلش النت ادينا ايه ... ق ادينا ايه للنت

عادل
http://elbald-dy.blogspot.com/

Kiara يقول...

يالهوي هو انت مش بتعتق حاجه

عارف ان النت قطع في وقت مناسب اوي اوي عندي :)

قطع اليوم الوحيد اللي باخده اجازه يعني حاجه تشل

ونطالب نحنو البت مولان

بالوقوف ساعه حداد مش دقيقه :)

SHAPE YOUR LIFE (ABOALI) يقول...

ههههههههههههههههه
ماهو كل ده بسبب عمايلك السودة
لازم يعنى المكرونة الاسباجتى ما انت عارف انها ايطالى
وقاعد تقولى انا هادلدل لسانى واكلها حته حته
لغاية ما لسانك عمل ماس مع قاع المحيط الفمى وانت عارف انى الالياف الضوئيه بتاعة النت
قريبة من اللعاب ويغطيها البلعوم
وفى كثافة عاليه من الميكروبات بتستخدم الالياف فى طرق غير مشروعة
افلام لووووووووووووووووووز
العاب بوووووووووووووووووووش
اغانى اه ونوووووووووووووووووص
ومنك لله يا بعيد
6جيجا فى الازمة الطاحنة دى
وانا بدور على نسخة ويندوز
ياااااااااااا مفترى
ها تروح فين من دعاء الشات والفيس
ربنا يجيب ليك فيرس سالتى يكهرب ليك المدونه
وسلامى للسمكة

وريحنا فى التعليق شوية
والغى تاءكيد الكلمة
النت باااااااااااااايظ حرام عليك الوقت

غير معرف يقول...

على فكرة اسلوبك جااااااااامد طحن
بس انا رايي اننا نمسك السمكة ونقوم بتطبيق اقصى عقوبة عليها بالشوي أو القلي وطبعا مننساش نشوف في بطنهاالدليل القاطع على انها المتسبب في هذه الجريمة (حلوة الدليل القاطع دي).. خلص الكلام .. سلام

رندا يقول...

دى اول زيارة ليا
وجيت اقولك ان مصر هى امى واخدة وصلة لسة من الجيران يعنى خط مشترك حضرتك ولما نكون ايد واحدة لازم الجميع يتعاون يعنى لو فى فرح نزغرط ولو فى حزن نصوت اية المشكلة يعنى لما قطع يوم ها اية يعنى ها هههههه
هو يعنى الكل وراة البورصة
اقولك على حاجة نعملها جنون بجنون بقى
نلم قرشين من البلوجرية ونصلح السلك الى كل شوية دة يقطع تيجى نغير السلك ونخلص ههههههههههه
شكلهم كل لما يقطع حد يروح يصلحة بشكرتون تيجى السمكة تفكة وتغمز بعنيها وتجرى هنلعب استغماية قريب مع السمكة احنا بقى نضحك عليها ونغيرة خالص ولا اقولك تعالى نعمل وصلة من بلد تانية غير ايطاليا دى شكلها انضربت خلاص وفيها خم
بس ياترى ناخد وصلة منين عايزة اقتراح واستفتاء بلوجرى محصلش :)

كلمة كدة لابو على ردك خلانى اضحك لما اقول يابس
اية علاقة المكرونة الاسباجتى هههههه
فكرة برضة نعمل مسابقة اطول اسباجتى ونعمل بيها وصلة للنت هههه

تقبل مرورى

احترامى لاسلوبك الرائع الساخر

مخنوق كيك يقول...

Queen of Dark

احييكي علي مداخلتك الجميلة وان كان بين الكلمات حاسس انك وطنيه زياده عن اللزوم وبتدافعي عن مصر من كل قلبك

بس علي العموم السمكة برده مش غلطانة . هو كده مجتمع البحار يا تاكل يا تتاكل

والمجتمع البشري بيني وبينك

اتمني تزوريني علي طول . وتبطلي وطنيه شويه

مخنوق كيك يقول...

غير معروف .

طبيعي مش هرد عليك لانك غير معروف واحتمال تطلع متواطئ مع السمكة لذلك انا مش هنزلق وراك في ارائك المنحنية دي

انت عايز تدخلني في السياسة بس انا مليش فيها .. انا في الاكل وبس

وشكرا لدخولك الحلزوني

مخنوق كيك يقول...

Adel

عدولة حبيبي
متبطلش داونلوود يا معلم . احنا عايزين نعمل اعتصام علي النت . وعايزك تنزلي شريط اليسا الجديد اصله مش عندي

وابقي ابعت شريط هيفاء لدكتور شهاب عشان بيحبها اوي

وشريط رحلة عمري مصطفي كامل لمحاسن
والايام الحلوة لكل الشعب المصري

وشكرا ليك وخليك في حالك وفي نتك

مخنوق كيك يقول...

مولان .

اكيد طبعا ً دي مؤامرة زي المؤامرات اللي فاتت كتحويل الموقع بتاعك لموقع ترجمة صيني او تعيينك علي موقف التكاتك او دهن الحيطة بتاعه الشقة بمعجون ب 20 جنيه

طبعا انتي علي طول غلبانه يا عيني
بس احب اقولك ان دايما في الافلام البوليسية المظلوم هو اللي بيطلع الفاعل

وبناءا عليه اصاله عن نفسي ونيابه عن الشعب المصري انا بوجهلك تهمة قطع السلك وحرمان الشعب الشبراوي من الاستمتاع بحقه المدني

رفعت الجلسة

مخنوق كيك يقول...

ابو علي حبيب هارتي

نسختك عندي وشايك عندي

لما اقبض الجمعية هبقي اديك نسخة وندز واخد منك الفلاشة اللي انت ضارب عليها من اسبوعين يا كبير

وايه حكايه المكرونة دي ؟ انا اصلا مش باكل مكرونة اسباجتي . دي حتي طويلة ومش بعرف اظلطها كلها . باكل المكرونة الصغننة عشان انا لسه صغنن ومش بعرف اكل كتير

لسه الشباب بقي

Kiara يقول...

انا اعترررررررررررررررررررررررررض


انا مش موافقه

برئ يابيه

هو اللي عملها

ايه الظلم ده

اعاااااااااااااااااااااااااااااااا

مخنوق كيك يقول...

صحيح يا ابو علي

حكايه الكلمة دي تاديب وتهذيب واصلاح

اللي معندوش وقت يدخل علي المدونة بتاعتي ويستمخ بيها وتعباان في كتابة الكلمة

يروح احسن ينام وملوش عندي حاجة
لا تعليق ولا موضوع ولا كباية النسكافيه اللي وعدتكو بيها

مخنوق كيك يقول...

Aljoker

طبعا حلوة منك يا جميل , بس حكايه اننا نعاقبها بالشوي او القلي دي صعبه شويه . لاننا مش هنعرف نمسكها اصلا

انا رايي نكهرب المحيط الهندي اللي ماشي فيه السلك ونشل كل الاسماك

وننزل بعد كده ندور علي السمكة براحتنا

بس احنا كده ممكن نتكهرب ؟؟؟

مخنوق كيك يقول...

رندا

طبعا بما انها اول زياره ليكي فانا مش هزود العيار عليكي لانك باين عليكي شابه صغيرة تعملي حاجة واربعين كده .

احلي حاجة عجبتني بصراحة في ردك انك دخلتي علي طول علي الخط الساخن وقولتي مساعدات واقتراحات بناءه . بدل الحشاشين اللي قبلك اللي دخلوا يشوا السمكة واللي دخل يقولك مصر مالها ؟ سيبك منهم

انتي دماغك شغاله واحتمال اشاركك في المدونة . انا رايي نستدرج الغلابة دول اللي اتقطع عنهم النت ونلم منهم فلوس بحجة اننا هنصلح اللي انكسر قصدي اللي اتقطع . ونروح نشتري تذكرتين سينيما بره البلد ونهرب علي جزر هاواي وناخد شقة في صحراء نيفادا

اما حكايه تغيير البلد دي ففكره مش بطالة برده . انا سمعت ان الصين جنب ايطاليا . وممكن ناخد منها سلوك برخص التراب . والمتر هناك مش بيعدي تمناشر جنيه

وعشانك هعمل استفتاء دلوقتي ويا ريت كلكوا تشاركو فيه .

وشكرا لمداخلتك والمرات اللي جايه هتشربي شيشة زي الحلوين اللي هنا

نـــــور يقول...

ازيك
فينك يابنى
دايما بقرا عندك حاجات محتاجه استفسارات زى دى "المستكنيسين"
يعنى ايه ياهندسه؟
افيدونا والنبى

اخبارك ايه؟

نـــــور يقول...

تعرف عقدتنى بجد بجد

انا بقيت احس انى مش بعرف حاجه خالص

النشر كان بناء على رغبتها
اخبار الطلاق هى اللى موجوده

انما الجواز لما انا اتجوز او انت تتجوز بقى :)

غير معرف يقول...

مساااااااااء الخير على كل الضريبة
من مكانى هنا بضم صوتى لمستر مخنوق كيك أن الغلطة هى غلطة مصر من وجة نظرى المحورية الدائرية الميدان سفنكسية أن مصر المفروض تأكل السمك ماتسبهوش كده جعان بدل ما عمال ينخرب فى أم السلك وشكــــــــراً

مخنوق كيك يقول...

غير معروف

اشكرك يا حبي علي مداخلتك الطيبة اللي تنم علي دخان غريب اللون والرائحة

انت باين عليك لسه ضارب حجرين بوري

علي كل يا جميل احنا بناخد باقتراحك وهنقول لكل المسؤلين انهم يكلموا كل بتوع اسكندريه ينزلوا حمله علي السمك الصايع اللي في بحر بور سعيد . بدل ما هو طايح في المية كده مفيش حد عارف يوقفه

توصل كمان انه يتعدي علي حدودنا ويقطع السلك .؟؟ لا كده عيب اوي

وانا مضطر احترم فكرتك المدورة اللي بتقول عليها دي عشان انا معرفكش
لكن لما هعرفك ... اكيد هبلغ عنك

قررت أقتل كل الرجالة يقول...

مينفعش السمكة دى تطلع على سطح الارض وتقوم بعمل جليل وتريحنى من انى الوث يدى بدمهم والنبى ابعتلى عنوانه بالظبط

MasrwyForEver يقول...

يا جماعة أنتم كلكم غلطنين أنت ترده لنفسك أنى حد يدخل حاجة في بيتك من غير أستاذن هو ده اللى حصل مع السمكة أزاي أهنا نوصل السلك من غير ما نستأذن منهم هههههههههه أكيد السمك عامل تحالف مع بعضهم .. وبالنسبة للتبرعات ده يا عم خلى الحكومة تدفع شويه مش كفاية الفواتير اللى علينا كل شهر "كهرباء - نور - نظافة - ضرائب ... وغيرها كتيرررررررر " أحسن حاجة فلوس النظافة وأهنا جيبين زبالة خصوصي بياخد مرتب كل شهر ههههههه قال نظافة قال ده بس حاجة جديدة وهي في الأصل أسمها فلوس نظيف مش نظافة طبعاً كلناً عرفين مين نظيف بلاش كلام أحسن في السياسة ...
المهم والله يا جماعة أنا شايف أنه ده فترة راحة عن العالم الخرجي شويه ما أحنا مش وخدين منهم غير البدع وأعوذ بالله

مخنوق كيك يقول...

قررت اقتل كل الرجاله

الحقيقة انا مش عارف اقولك ايه . مش عارف اواسيكي علي السمكة وللا اواسيكي علي كرهك للرجاله .

بس علي كل لما تخلصي من موضوع الرجاله ابقي قوليلي وانا ابعتلك السمكة ديليفري علي البيت

بقي قادره تقتلي الرجاله ومش قادره علي سمكه ؟؟ ناس فاضيه صحيح !

مخنوق كيك يقول...

masrawy4ever

من الواحد انك انت اللي فاهمني يا ريس . والحكومة مظبطاك زيي بالظبط وبتاخد منك فلوس علي كل حاجة . انا بقي اخترت طريقي . بقيت ساكن في الدور الاخير ( الثامن ) عشان لا الكهربائي ولا بتاع المية ولا بتاع الزباله يقدر يطلع . لان اللي هيطلع هحدفه من فوق

وبخصوص النت فانا فعلا معاك ان مصر دولة بتحتل عوالم الغير . وبتبني كباري في كل حته عشان تضيق علي الناس العيشه !!! . ايه الفرق دلوقتي بين مصر واسرائيل ؟

الفرق في العلم وبس .. هو صحيح علم اسرائيل ايه ؟

عاشقه الرومانسيه يقول...

اى كابتن كيك
اولا كل سنه وانت طيب
عجبتنى مووووت دماغك اللاسعه دى
وحلو التهييس اللى انت فيه ده
ولك سلام من اجمل بلاد الله
الاسكندريه
اختك عاشقه الرومانسيه

sharkey يقول...

don't say that .. iam very happy when u put little feed to my blogspot , take ur time and do wt u want . and please repeat ur visit daily , ramadan kareem