السبت، 5 ديسمبر 2009

اضحك . الصورة تطلع في المرور


صباح الخير علي احلي شعب في الدنيا
شعب مصر الكرام

انا بكتب التوبيك ده في تمام الساعة الثانيه صباحا
لاني قاعد سقعان ومش عارف انام فقولت ادخل ارغي معاكوا شويه . امال انا عامل المدونة دي ليه ؟
طبيعي عشان اعمل ازعاج
اولا الموضوع ده تعليقا علي حدث حصل جديد في مصر . لان مصر بلد المفاجات ولازم اتداول كل حاجة فيها
دي برده بلدي يا جرع
المهم الحادثة دي للاسف منقولة من واحد زميلي لاني مكونتش في مكان الحادث . والعهده علي الراوي

وانا رايح الجيم مع صديكي العزيز كوجاك . قالي علي حاجة جميلة فرحتني واثلجت صدري وبدات اقتنع ان مصر
هتطور للاحسن والنظام فيها هياخد مجراه
قالي انهم حاطوا كاميرا مرورية واشارات مرورية الكترونية في وسط البلد
وبيقولي وهو ماشي هو ومجموعة من الاصدقاء بتوعنا اللي من ضمنهم هريدي لقي كده - خير اللهم اجعله خير - اشارة
بتنور لوحديها في الطريق وعداد ثواني شغال والاشارة بتفتح وتقفل بدون التدخل من العناصر البشرية المتمثلة في عسكري المرور
اللي بيكون واقف بياكل سندوتش طعمية عندنا

ومش كده وبس وفجاه لقي فيه اضاءه وفلاشات وكاميرات بتصور العربيات اللي بتكسر الاشارة
في الاول افتكر ان دي كاميرات فلاش لشخص اجنبي بيستمتع بالترجل في شوارع المحروسة ومعاه كاميرا
مهو بيقولك الاجانب بيحبوا يمشوا بالكاميرات في بلدنا الشقيقة وبيصوروا المتاحف اللي عندنا والاسدين اللي قاعدين علي كوبري قصر النيل
وساعات بيصوروا الناس المصريين وهما مشيين متيسين او يصوروا مشهد جرئ لشخص انتحاري بيعدي الشارع في هوجة
من السيارات المتسارعة

المهم اتضح بعد كده ان فيه كاميرا فوق الاشارة بتصور العربيات اللي بتكسر الاشارة . يا حلاوة
معني كده يا جدعان ان مفيش حد هيكسر الاشارة تاني والناس هتعدي براحتها وكل واحد جارر في ايده واحده والعيال هيعدي
براحته بدون صراع مرير مع مرايات العربيات وهيقللوا التزاحم البشري اللي بيكون في الشارع

بس قالي برده ان الكاميرا ماشاء الله كفاءتها عاليه اصلها كانت عماله تصور عمال علي بطال . انا قولتله معلش برده يا ماو
مهو الناس لسه مخدوش بالهم من الكاميرات والنظام بيحتاج شويه مجهود شويه . بس احنا شعبنا شاطر وذكي وهيفهم النقطة
دي بسرعة .. عادي يعني
بغض النظر ان فيه بعض الناس المصريين اللي بيقفزوا من فوق ماكنه المترو وفاكرينها حواجز للقفز وميعرفوش انها حاجة كده
بتحط فيها التذكرة فتفتح فتعدي . وبرده بعيدا ً عن الناس اللي متعرفش ان العربية لما تزمرلك تبعد عنها

اصل فيه ناس بتمشي في الشارع وزمارة العربية وراهم بيفتكروا مثلا ان الراجل اللي راكب عربية ده بيحيه وبيهنئة انه ماشي في الشارع
ومش عايزه ييجي علي جنب ولا حاجة

لذلك انا ارجح ان الناس فاكره ان الكاميرا في وسط البلد في الاشارات دي للتصوير الشخصي وكله عايز يتصور
فكان كله - اللي بعربية واللي من غير عربية - بيجري علي الكاميرا ويقف ياخد صورة بالزينون ويمشي
احتمال برده !!!! مهو حاجة جديده يا جدعان

لذلك انا بخاطب ضمير الشعب المصري وبقوله بالراحة علي الكاميرات . دي لسه جديده . خلوها تشتغل شويه صغيرين حتي
وبرده عرفت ان فيه كاميرات اتحطط علي بعض محلات وسط البلد زي محلات الهدوم والمولات . دي احتمال تكون عشان ضد
السرقة . عشان كده يا جماعة محدش ييجي قصادها ويتصدر . لانها مش هتصورك يا اخويا ولا هتديك فلاش
لانها كاميرا فيديو مش سايبر شوت
لذلك انا بدعوا الحكومة انها تحط الكاميرات دي برده جوه الجامعات وفي الحدائق العامة والخاصة لان فيه بعض المناظر مش بتعجبني خالص
زي واحده مثلا جايبه حله معكرونة وفرشة في الحديقة قدام قفص الاسد وعماله تاكل . زي ميكون الحديقة دي ورثاها عن جدها
السابع عشر مثلا
مبدا المراقبة ممكن ينفع عندنا في حاجات كتير . وبرده ممكن عشان السرقة .
عشان لو فيه واحد اتضبط وهو بيسرق الكاميرا بتاعه المحل . يبقي الكاميرا بتاعه المحل اللي جنبه تشوفه والراجل يمسكه ويقدمه
للجهات المختصة

انا مش عايز اطول عليكو اكتر من كده بس المهم انا سعيد ان فيه تطور . ودخل عندنا الفلاش الزينون . اصلي سمعت
انه بينور الشارع لما الفلاش ده بيضرب .
انا حتي بفكر اخد عربية اخويا بكره واروح العب في وسط البلد واقعد اضحك قدام الكاميرا
يمكن يلقطوا ليا صورة حلوة يحطوهالي في البطاقة بدل صورة المشبوه اللي في بطاقتي دي

ها حد جاي يتصور معايا ؟
واحتمال لما يحصل تجمهر قدام الكاميرات يعملوا صور عائلية . اخيرا البلد هتعملنا خدمات مجانيه . فل اوي
يللا بقي سلام انا بقي عشان اروح اكوي الطقم بتاع بكره اللي هروح اتصور بيه
واشوفكم بعد ما اتاخد مخالفة واقضي ليلتين في الحجز

تصبحوا علي خير

هناك 6 تعليقات:

SHAPE YOUR LIFE (ABOALI) يقول...

لييييييييييييييييييه كده تعلب مع الحكومة والفلاش الزينون
عيب عليك
الحكومة بتريح الشعب وتصوره
وعمك بطرس غالى وزير المالية الراجل المحترم
ماسك الصور
ويقول ده يدفع ده لوز لوز وده جمبرى جمبرى

والراجل يا عينى مش ملاحق
لييييييييييييييييه بقى علشان اللى زيك
ادووووووووووه الفرصة
وكل شوية يتصوروا ويعمول سور كبير كبير
علشان يشوفوا الكاميرا الخفيه
هههههههههههههههه


اشطه يا ماااااااااااو

kojak يقول...

بس حوار جامد ..تصدق انا مخدتش بالى فعلا الا من الفلاش ..كنت واقف تحت العمود ..وخدت بالى وقتها..قبل ما اعرف ..كنت عمال اشوف فلاش ..وكل ده فاكر حد بيصور ..لدرجه انى افتكرت انى متراقب والا حاجه واسئل اللى واقفين معايا يقولولى مش عارفين .كانوا هما اصلا شبه مهيسيس بس كويس ان الحوار ده حصل فى بدايه الخروجه لو كان حصل فى نهايه الخروجه ..كنت هفتكر انى بهيس انا كمان لائنه كان يوووم ..تهيس على الاخر ..واكتشفت الموضوع فى الاخر لم واحد زميلى قلى ايده ...الحق .ده فى كاميرا فوق العمود ..وقتها استغربت وقولت كويس يا شباب ..مصر بتتقدم..وهيه دى مصر ..بلدنا

kojak يقول...

ههههههههههههههه
معلش يا جماعه الظاهر انى انا اللى هيست على السيره لم افتكرت الخروجه
كتبت (مهيسيس) ..بدل (مهيسين)

micheal يقول...

ههههههههههههههه..طب كويس أنك نبهتنا ..بقالي كتير متصورتش
مدونتك لذيذة
تحياتي

mahasen saber يقول...

ههههههههههههه طول عمرك فلته واعجوبه

وحشتنى المدونه قوى قوى

بنت الغربة يقول...

تعرف انا تخدت صورة برضه مع انى ماكسرتش الاشارة ولا حاجه..
انا قلت ايه الحكايه هى شغاله عمال على بطال ولا انا اللى جالى عمى الوان..؟؟
المهم انا قررت انى اروح اشوف استلام الصورة فين ..جايز تطلع احلى من صورة الرخصه..
تحياتى