الاثنين، 30 نوفمبر، 2009

هروب الاضحية .. الجزء الثاني



السلام عليكم إضافة صورة

من غير مقدمات لاني منمتش بعد حادثة الجاموسة . ومش قادر ااكل
انا هكملكوا الجزء الثاني لان فيه رسايل كتير جتلي علي الميل وقالتلي ايه اخبار الجاموسة

واللي قالي انا هسفرها بره واللي قالي هاتها عندنا واحنا ناكلها صاحيه من غير ما تتدبح
انا هعمل اللي يمليه عليا ضميري واحكيلكوا وبقول تاني اللي قلبه ضعيف بلاش يكمل قرايه
عشان ده غلط . واحتمال يحصله انسداد في الشريان الاورطي اللي بيطلع علي الجيزه

احم احم . احنا وصلنا لحد فين ؟
اه لحد ما لجموسة اتزحلقت واتملوا عليها
المهم بعد ما الجموسة قامت وقفت راحت هايجة علي الناس وضاربه سبرينت في نص الشارع
وهاتك يا جري .. وانا قلبي بقي جامد وروحت طالع من خرم الباب وواقف قدام البيت
اول مرة في حياتي اشوف جاموسة بتجري .. تخيلوا !! بتجري ولا حصان شيكسلوفاكي في سباق خيل

لكن بطبيعة الامر الجاموسة لازم تتعثر لانها معندهاش خبره في الجري . راحت وقعة في اول مطب قابلته
قدام بتاع اللبن اللي بعد بيتنا بمتين متر كده

والناس وراها بالسكاكين
وتكرر مشهد المواجهه مرة تانيه قدام بتاع اللبن . والراجل البقال واقف مرعوب لحسن الجاموسة تعمل عملية
انتحارية في المحل بتاعه وتبوظله اللبن

المهم واحد من الجزارين الشباب اللي الحماسة ملياه شويه وعايز يعمل قط قدام المزة بتاعته اللي واقفة في البلكونة
راح واقف قدام الجاموسة بالسكينة وصمم لازم يجيب رقبتها
زي ميكون اول مرة يشتغل جزار وميعرفش ان الجاموس والبقر والحاجات دي بتخاف من منظر السكينه

اوباااااااااااااااااااااااااااااا
اتقلب المشهد 180 درجة تماما . اصبح القاتل هو المقتول والجاني هو المجني عليه والمجرم هو فريد شوقي
راحت الجاموسة نطحه في الواد وطلعت تجري ورا الناس

هههههههههههههه . الجاموسة بتجري والشارع بيجري قدامها . طبعا لذت بالفرار خلف باب البيت بتاعنا كالمعتاد
منظر في قمة الكوميديا وانت شايف الجاموسة بيجري قدامها الجزارين والشباب في اعمار 15 سنه

بس للاسف حظها المتعثر دائما راحت خبطة في عربية ووقعت بس المرة دي اتعلمت من اخطائها وراحت واخده خمسة امريكاني
وراجعه عكس الاشارة وراحت وخداها جري المرة دي وعينك ما تشوف اللا النور
واختفت الجاموسة عن الانظار وبعض الشجعان كانوا بيطاردوها

طبعا انا واخويا قررنا اننا نروح نجيب فطار عشان جعانين
روحنا جبنا جبنه نيوزلاندي وفينو وبسكويت . ورجعنا بعد ربع ساعة
مهي الدنيا كانت مليانه طيبنه من المطر ومكوناش عارفين نمشي

المهم واحنا جنب البيت لقينا تلاته من الجزارين جايين من بعيد والجلابيه مليانه دم .. سمعاني يا رومانسية .. مليانه دم
علي الجلبية وعلي وشهم وعلي ايديهم . وجايين ينهجوا

بنسالهم بنقولهم ايه اللي حصل ؟؟
قالوا خلاص احنا دبحناها في الشارع اللي ورا وفيه عربية بتحملها وجايه ورانا .
ههههههههههههههه

معرفوش يموتوها في الجزارة راحوا طاردوها في الشوارع وموتوها والله اعلم يمكن تكون رجليها اتكسرت ومتنفعش اضحيه اساسا

بس المهم انتهي الكابوس وبتاع اللبن ارتاح وبتاع لعب الاطفال اللي اتكسرت حاجاته بيطالب بحقه من صاحب الجاموسة

واشوفكم علي خير بقي

هناك 10 تعليقات:

ABOALI يقول...

علل بل وضح لما سميت الجاموسة جاموسة ؟

الاجابه
حرف الجيم يشير الى انها جدعة
حرف الالف يشير الى انها انثى
حرف الميم يشير الى نها مؤدبة
حرف الواو يشير الى انها وديعة
حرف السين يشير الى انها سامية
حرف الهاء يشير الى انها سوف تتعرض ل هجوم

اذن ومن ذلك نستنتج ان وارء تلك الاحداث مؤامرة
دبرت لها قوى الشر الكبرى
واردت ان تصنع فوضى خلاقة
بمشاركة الهمج متمثلين فى

جزارين ليس عندهم فكرة كيفية الدبح
الاسلامى
اصحاب محلات ظنوا ان الشارع ملك لهم
فتركوا بضائعهم فى الخارج والله منتقم
عيال يفرحوا فى المصايب
واخيرا فهلوة تمتع بها الجميع

انى تلك المؤامرة قد شارك فيها وساعد فى تدبيرها قوى الشر على مستوى العالم

وفى النهاية

استرنى يا بنى ربنا يسترك

لووووووووووووووووووووووولى

غير معرف يقول...

ههههههههه
حبيبى قلبى
والله يامان مش عارفين نقولك ايه بس قبل منتكلم فى اى حاجه كان المفروض تفهم بتاع اللبن مش فاكر اسمه ايه بصراحه المهم ان الجاموسه عمرها مكانت قدر تازيه لان لو عملت حاجه فى محله مش هيدفع باقى الفلوس الى عليه لاهلها انت ناسى انها مديناه بمبلغ لانه بياخد لبن بالاجل
ولو حصله حاجه هيلكك طبعا ومش هيدفع الباقى .
وبالنسبه لحادث الجاموسه انا هغير راى يامان انا كنت متحامل عليه المرة الى فاتت والان انا اشجب وادين الحادث وبنطالب بدفع عويض كبيرررررررررررر لاهله لان الطريقه الى زبحة بيها مخالفها للجميع القوانين الدوليه وشكرا............

عاشقه الرومانسيه يقول...

سامعه يااخويا سامعه
بقولك ايه
انت لو مش بطلت تكتب عن الدم والغلب ده انا مش هاجى هنا تانى
وهاعتبرك جزائرى واقاطعك
P:

مخنوق كيك يقول...

ابو علي حبيب هارتي

عندك حق يا كبير
فعلا دي مؤامرة من شويه ناس معندهمش فكر ومعندهمش قلب

معلش بقي يا كبير تتعوض المرة اللي جايه

ايه رايك تبقي تيجي انت تديها ابيمول تنيمها وتدبحها ؟

واشكرك علي تسليفك ليا للصورة بتاعتك

مخنوق كيك يقول...

انت يا غير معروف

انت مش ناوي تقولي انت مين ؟؟

ماشي . انا هحط سم فران بعد كده في المدونة واول ما هتاكله وانت جاي هعرف انت مين

لما الاقي حد ميت من صحابي او صحباتي هعرف انت مين علي طول

وشكرا لمداخلتك القيمة وابقي تعالي عشان فيه حفلة شواء بعد يومين عندي تاني

مخنوق كيك يقول...

عاشقة الرومانسية

ليه بس كده يا جميل . هتقاطعيني حته واحده ؟ هي دي الصحوبية ؟

خلاص يا ستي مفيش دم تاني ولا حاجة وكله راح لحاله وكله اخد جزاءه وكل سنه وانتي طيبة

صحيح انتي بتخافي من الدم ليه ؟
طب اسمعني النكته دي

بيقولك فيه اتنين مصاصين دماء دخلوا قهوة واحد طلب كباية دم سخن والتاني طلب كباية مية سخنه . ليييييييييييه ؟

بيقولك عشان كان معاه دم فتله

هههههههههههههههههه

واهلا بيكي

مخنوق كيك يقول...

صحيح محدش قالي ايه رايه في الصورة الجديده بتاعتي ؟

عاشقه الرومانسيه يقول...

ههههههههههههههههههههه
حلوه النكته
وبرضه فيها دم
مااااشى
بقولك ايه؟
رجع الصوره القديمه
لانى عرفتك بيها وحتى لو شفتها فى اى مكان غير تعليقك فدى بتمثل ليا مخنوق كيك
وبافتكرك بيها انما كده انا حاسه انك حد تانى
هى حريتك اولا واخيرا
بس انا من النوع اللى اول انطباع هو اللى بيدوم عندى
وانا اتعودت على مخنوك بصوره معينه بلاش تغيرها

تحياتى ياحفيد دراكولا
((:

عاشقه الرومانسيه يقول...
أزال المؤلف هذا التعليق.
مخنوق كيك يقول...

ههههههههه المدونة ضحكت عليكي يا عاشقة الرومانسية وافتكرتي ان التعليق الاول راح

انتي كده اي حد بيضحك عليكي ؟!!!

انا عايز قلبك يبقي جامد كده . الله
وبالنسبة للصورة فطبعا احلام سيادتك اوامر ولازم انفذها

مع ان الصورة القديمة هتتعبني اني ادور عليها عندي بس كله عشان خاطرك

انا ميرضينيش ان انطباعك الاول يتكعبل او يحصله حاجة

حااااااااااااادر يا ست الكل