السبت، 13 سبتمبر 2008

يوم الارجاء ... جيش رايح جاي


مقدرتش انام من يوم الكشف الطبي .. فضلت صاحي قاعد علي الفيسبوك بقرا بعض المواضيع الحزينة . وربما بعض النكت البايخة . لاني مخنوق اصلا فلازم اجهز نفسي اني رايح الارجاء .. او كما يسمونه " يوم الحشر الاصغر "
لبست قميص وبنطلون ونزلت انا واخويا وواحد زميلي عزيز عليا .. ورحنا التجنيد مع بعض .

المشوار نيله من اول المواصلات المقرفة والناس اللي بتزعق في الشارع واللي ببصلها كاني اخر مرة هشوفها . مش عارف هلبس 3 سنين وللا سنه ؟ مع اني مترشح احتياط يعني هلبس 3 .. لابس لابس .. دنا باشمهندز يا راجل

نزلنا التجنيد وطبعا بما ان مصر بلد كلها امن واستقرار فلازم نقف علي الباب صف واحد عشان كلنا ننال شرف التجنيد والدفاع عن مصر الغالية .. ولازم تقف يا اما هنحرمك من التجنيد واحتمال كمان يرموك بره ويقولوك انت مطرود .

دخلنا كلنا ودفعنا فلوس برده ... مهو كل ده لازم تدفع فلوس .. هو الدفاع عن مصر باالساهل كده ؟!! انت انسان حيزبون صحيح
هتدفع طبعا وتاخد قلم وورقة عشان تكتب فيها قدرك الابيض ان شاء الله
فضلنا قاعدين تحت المظلة - في الظلة يعني - مستنيين العميد اللي هينادي بالارجاء من الساعة 8 صباحا للساعة 2 ونص نهارا

وكنا في رمضان علي فكرة .. يعني الواحد اساسا شايف بالعافية .. دا غير ان شاشة الكومبيوتر كلت عيني امبارح باليل من كتر السهر .

لكن طبعا الدافع لكل ده هو حبنا لمصر لكي ننول شرف حمل السلاح والوقوف ليلا لكي تحرس بلدك .. وطنك .. امك
ابتدت الارجاء وبدا ينده الشهور .. ياااااااااه

الموقف ده بيحسسني ان كلنا واقفين تحت دش كبير .. وانت وحظك يا تطلع المية اللي نازلة عليك كويسه .. يا اما تطلع متكهربا

تلاقي اللي اخد تاجيل طااااير من الفرحة وهييييه وفرحان .. شوية عملاء للشيوعية المقعره التي ليس لها هدف في الحياه غير استنشاق الهواء النقي . العبيط فرحان ان اسمه مش هيتكتب في صفحات التاريخ انه شارك في الدفاع عن بلده .. مفيش نخوه .. فين الوطنيه . فين الملوخيه ؟!!
علي النقيض تماما تلاقي اللي دخل الجيش زي ما يكون نزل عليه سهم من السماء او لعنه الفراعنه اصابته .. اشكال غريبة ووجوه اغرب ومشاعر مش قادر افسرها .

واخيرا وصل لليوم بتاعي والشهر بتاعي . كنت واقف مستني القدر اللي هيجمعني باخواني المحاربين علي ارض واحده .. دفعة واحده .. 45 يوم واحده برده ... عذاب واحد .. الم واحد .. نظام واحد
جت اللحظة اللي نطق فيها العميد بالحكم عليا بالاعدام .. بل بالموت شنقا .. بل بالموت حرقا ... لا انه الموت شوقا

مصر طردتني يا بشر .. مصر رفضت اني انضم الي صفوت المقاتلين اؤدي واجبي كاي مواطن اخر .. مصر ادتني تاجيل .

بصراحة .. احلي تاجيل في حياتي .. مفيش احلي من عيشه الحرية .. انا قابل اني ابقي عبيط . بس مدخلش الجيش
الحمد لله ... صرفت لحد دلوقتي 400 جنية احتفالا اني مدخلتش الجيش .. والباقي اكثر

اللي عايز يتعزم يكتب رقم تليفونه وهبعتله عشان الانتفريو

واخيرا اختم كلامي بشعر من العملاق هريدي .. من ديوان " بحبك بجنون "

بحبك يا مصر مهما عاقبوني ..... وحبك في قلبي مال الكون
لوظابط احتياط او حتي قتلوني ..... هفديكي بسلاحي وقلبي الحنون

بس في الاخر يا مصر هقولك ... نيلك ده صلصلة امر من اللمون
وخدت تاجيل يا مصر يا غاليه ... ده جيشك يا حبي اوحش من الجنون

ونتقابل في احداث اخري بيني وبين حبيبتي مصر


هناك 6 تعليقات:

sakhan يقول...

السلاموا عليكم ورحمه الله وبركاته انا رايح يوم الاربعاء الموافق 17/12 منطقه التجنيد علشان اسمع الارجاء ادعولى اخوكم m/h

غير معرف يقول...

نفس اللى حصل لك انا بمر بية دلوقتى انا فرز تانى مواليد27/9 وخريج هندسة برضو قولى اعمل اية انا قسم مدنى هل محتاجين مدنى فى الجيش ولا اية الظروف

واحد من الناس يقول...

لو فيه اي حد عايز يعرف معلومات عن يوم الارجاء او اجراءات التجنيد ممكن يدخل الموقع ده
اتفضلوا
http://eltagnid.blogspot.com

محمد يقول...

اوعدنا يارب بتاجيل...بس انا بقى كلية اداب..رايح كمان يومبن..اما اشوف ايه الوضع اليومين دول في ظل المظاهرات..البلد مقلوبه..ربنا يسهل

Unknown يقول...

انا رايح بكره ارجاء 9.10.2016 ربنا يارب يستر هسمع الحكم عليا وابقي اقولكم.هه

Unknown يقول...

هل بيسالو علي اي ورق في يوم الارجاء ام لا يعني لو اتنسي الورق ميدخلش الشخص ولو مدخلش يعرف ازاي بقا اتقال ايه جوه