الأحد، 7 يونيو 2009

انتهــــت المباراة ... ولا عزاء ولا بتنجـــان



السلام عليكم

امبارح كنت بتفرج علي ماتش الارجنتين وكولومبيا وقولت امتي فريق مصر يطلع بالوانه الزاهية وبدقن الواد شوقي الجامده دي ويورينا مهاراته في كاس العالم ان شاء الله حتي يطلع من اول ماتش .
وكنت شايف عيال فعلا بملايين بتلعب وقولت بس برده ابو تريكه بالتقوس اللي عنده ده هيجيبلنا جون وللا اتنين وهنظبط التظابيط .

جماهير مصر الكرام تفضلوا بكل حموقية ووطنيه وملوخيه واتصلوا بالفنان الكبير مدحت شلبي وقالوا مصر هتكسب 3 صفر والحمد لله التوقعات صدقت بغض النظر عن النتيجة الفعليه للمباراه .

الجماهير قالت هنكسب 3 صفر قولت جماهير مبتفهمش
ودخل فينا جون والتاني قولت وماله برده .... معلش
لكن يدخل الجون التالت وانا باكل فشار وهطق من الغيظ ؟
لا ده كده يبقي حرام اوي .. دي بشلة وعلمت في الوش

وعجبي

دا مش كلام صلاح جاهين ولا كلام عمده بتاع الخيار ولا كلام احمد اوكا السبب في الجون الاول . ده كلامي انا .. كلام واحد مخنوق ومبـضــ .... ولا بلاش عشان الرقابة
الماتش النهارده بصراحة كان عشرة علي عشرة للي ضغطهم قليل لانه رفعلهم الضغط وكان كويس برده عشان الحووامل بدل ما يطلعوا يمشوا في الشارع 2 كيلو اهو يتفرجو ويصوتوا . واحتمال يسقطوا واجوازهم تفرح فيهم .

بصراحة انا مش عارف اشبه المنتخب ده بايه ؟ مشكلة مرور ولبسناها للقطر قبل كده وقولت معلش سوء تفاهم لكن اللي بيحصل ده حرام . ازاي يضيعوا امال مئات بل الاف من الشباب قاعدين علي قهوة الثرايا في الهرم مستنيين النصر العظيم وافتتاح المباراة بهدف برجل احمد فتحي او حتي سيد معوض اللي بيجري زي البطة .

قريت كلام بجد ضحكني من واحد حبيبي اوي علي الفيسبوك ونصه كالاتي ....

" احد مزايا كوني زملكويا ً ... هو الهدوء والبرود عند الهزيمة .. ولا حاجة خالص طفيت التليفزيون وقمت اتفرج علي مسلسل كوميدي وضحكت طبعا ... بمنتهي البرود برده .. قفلت الكومبيوتر وكلي رضا عن النفس لاننا بصراحة .. مش وش نعمة .. وبعدين ايه يا جماعة ما احنا االسنة الجايه هنتفرج علي كاس العالم علي الارضي ... حلو اوي .. حسبي الله ونعم الوكيل "

دا كلام واحد حبيب قلبي قضي معايا احسن سنين عمري في الاعدادية وكرهته في الكلية لاني عرفت انه زملكاوي . بس اوي مرة يقول كلام يفرج صدري ويريحني من تانيب الضمير اني اشتريت تليفزيون . عشان اتفرج علي فريق عفش زي بتاعنا

قال كاس عالم ال .. جتكم الارف كده وانتوا شبه براد الشاي بتاع بيتنا .
ممكن تكون هزيمة النهارده سوء حظ .. بس تلاته واحد ؟؟؟ وللا ممكن يكون فريق الجزاير فريق جبار والناس فيه خارقة وانا معرفش ؟ ده الجزاير النهارده لو كنت نزلته فريق الصفا كان غلبه 2 صفر اقل تقدير واحترام .

لو فريق مصر النهاده كان بيلعب لوحده في ارض المباراه كان طلع تعادل .

بجد احنا مش وش نعمة .. وبيني وبينكم ولا حتي وش نقمة . احنا مش نافعين في اي حاجة
انا رايي بقي ان فريق مصر يلعب ويشد حيله عشان يلحق كاس عالم 2018 مثلا ً . اهو يكون اللعيبة ماتوا وجابوا لعيبه جداد

او ربنا يكرمني واجيب واسطة وانزل العب بالنظارة بتاعتي .. سعات بجيب اجوان في الشارع عندنا علي فكرة
انا حزين وزعلان علي الفريق . بجد ونفسي اعمله حاجة تشفي صدور قوم مؤمنين .
بجد بجد بجد ... انا حزين علي كل دقيقة قضيتها قدم التليفزيون وكنت بتمني ان النور يقطع ومكملش الماتش

واترك لكم حرية التعبير وابداء الراي . واي حد هيدخل يقولي سوء حظ ولا الجون بتاع العدو كان ضيق شويه صدقوني همسحه من علي الصفحة زي ما ممسحت فريق مصر ومصر كلها من دماغي

سلام دلوقتي بقي عشان اروح اخد بروفين عشان مصدع

كان يوم اسود اليوم اللي شجعت فيه فريق زي فريق بهلول بتاعنا ده
ال كاس عالم ال .. انتوا اخركو تتشطروا علي بترو جيت واسمنت اسيوط .







هناك 5 تعليقات:

SHAPE YOUR LIFE (ABOALI) يقول...

ايه يا عم
القسوة ملت قلبك وشالت الحنية من عيناك

ايه يعنى لما يكون الفريق مهرتل وكانت الكرة لعبه بدماغهم حبتين
ولا عمرو زكى وهو بيجرى ورا الكرة ويقول
ان كانوا طردونى من الدورى الانجليزى
فاءنا بردوا عمور الاكتع بتاع زيزى


يا مان بطل حقد وكره فى البلد

والكورة فوز وحبة حاجات فوق بعضها
واحنا ارتحنا منك برضوا
يمكن انت كنت النحس اللى خلتهم كده


يلا من غير سلام و جنان

Kiara يقول...

يالهوي كل دا

الحمد لله علي كل حال

Kholios يقول...

لأ با مخنوق كيك الغلط علينا أننا أتولدنا مصريين
مش كنا طلعنا سنغاليين كان أحسن برضو
يالا سلام و شد حيلك الناس شكلها نسيت المدونة بتاعتك
تـــحيـــاتى

غير معرف يقول...

ههههههههههههههه

ده أنا موجوع اوى...كل ده معبيه و ساكت


أنت و الله قلتها حكمة أحنا لا وش نعمة و لا نقمة و لا حتى بصل اخضر

سيبك أنت و لا تزعل نفسك و غن كان على التلفزيون روح بيعه و آدى الموقف ده يعلمك أنك متخدتش قرار مصيرى و تشترى تلفزيون عشان سبب هايف كدة

:)

mahasen saber يقول...

يا كابتن ..يا كابتن حد قالك تشجع كوره

طول ما انتا فى مصر هو ده مستوى الكوره ومستوى الانديه بالذات الزمالك

بوس ايدك اصلا انك بتلاقى لاعيبه بتجرى ورا بعض فى الملعب