الثلاثاء، 24 نوفمبر، 2009

الراقص مع الخرفان



السلام عليكم

عيد سعيد عليكو وعلي اهاليكو ان شاء الله
وطبعا بعد الاخبار البايته اللي عمالين نسمعها كل يوم والاعلام بتاعنا اللي بقي عامل زي ابله فضيله
اللي لازم يطلعلنا في كل قناه واخبار جديده وقديمة ومين شتم مين ومين ضرب مين

وكله ناسي ان العيد ان شاء الله يوم الجمعة اللي جاي ولازم الناس تفكر بقي في اللحمه . مينفعش كده
هو مفيش لحمة لا في الايام العاديه ولا في العيد كمان ؟؟

وانا بتفرج علي الصورة دي اللي حضراتكم شايفنها في الموضوع افتكرت وديييييييييييييييييييييع وتهامي باشا ملك الانتاج
وعلي طريقته المعهودة احب اقولكم ان الخرفان بتتدبح مش بترقص

لذلك لازم كل واحد فينا يفكر هيدبح ايه العيد ده
انا كنت مواعد بعض الناس والاصدقاء اني هشترك معاهم في جمل من العيد اللي فات بس من الواضح انهم نسيوني
ومش هقدر اضحي غير بمعزايه صغيره كده حاجة وعشرين كيلو

وبالمرة عشان التلاجة عندي لا تستوعب اكبر من هذا القدر
لذلك ادعو اي حد هيدبح حاجة اكبر من معزايه انه يسيبلي نصيبي علي جنب بس يسيبه في التلاجة بتاعته
وممكن يبقي يبعتهولي ديليفري في ايام التقشف زي اللي احنا فيها دي كده

واللي عايز يجيب نايبه وييجي يشوي معايا علي السطح انا تحت امركو برده . بس تجيبوا انتوا الفحم
واحب اسمع عن الناس اللي كانوا زمان راقدين عندي هنا في المدونة واقولهم رحتوا فين بالظبط ؟
امثال دوكتور شهاب وعايزه اتطلق والناس الحلوة دي
وللا خلاص اتجوزتي ونسيتينا يا كبيرة ؟؟؟
وللا كله خلاص غير نشاطه علي الفيسيبوك ومبقاش فيه انتماء للماضي .. اخص عليكو اخص

علي كل يا ريت كله يشارك ويقولي هيرقص مع مين العيد ده .. خروف ولا معزه ولا بجره ولا قطة

الخرفان البلدي ... ام الاسترالي

هناك 4 تعليقات:

عاشقه الرومانسيه يقول...

انا ماليش دعوه بالليله دى ياعم
انا مش بحب منظر الدم
والله بابقى متضايقه جداااا منه
انا اشوف الدم من هنا والدنيا تلف بيا زى المراجيح
هههههههههههههه

د/ رامي شهاب الدين يقول...

حبيب أذينى الأيسر وبطينى الأيمن ((حبك عامل لى أوفر لاب يعنى ))

المهم .. كل سنة وإنت طيب يابرنس الليالى المشبرة .. وأهلا بأيام اللحمة والنيجريسكو .. ألا صحيح هو يعنى إيه نجريسكو؟؟؟.. ماعلينا

آسف على طول الغياب أصل إمتحانات البكالوريوس بتاعتى كمان أسبوعين .. دعواتك وإنت بتشوى

إنتظرونا قريبا فى مكان ما .. سلام ياعسل

مخنوق كيك يقول...

عاشقة الرومانسية

اهلا بالناس اللي بتدوخ من الدم
طب خدي عندك بقي . انا هدبح بايدي وهطرطش الدم في كل حته ولكي ان تتخيلي ان الدم ممكن ييجي علي وشك بقي او ينزل عليكي شلالات شلالات

اللي بيخاف من حاجة لازم يواجهها
يعني من الاخر تعالي ادبحي انتي وشوفي منظر الدم ومنظر الخروف وهو بيبصلك بصة الندم انه وثق فيكي في يوم من الايام

علي كل ليكي يوم وهتدبحي بايدك وهتفضلي تحلمي بكوابيس واحتمال تبقي سفاحة دماء

ونعمل فيلم دماء ورمال انا وانتي

المهم اشيلك شويه دم علي جنب ؟

مخنوق كيك يقول...

يا نهار مش فايت
دكتور شهاب حته واحده ساب امتحاناته وجه يشاركني في المعزه بتاعتي ؟

النجريسكو ده يا مان حته من الديل كده بتكون معضمه شويه والغرب بيحبوها اوي لانها زي الكوارع كده عندينا

علي كل لو بتحبها انا ممكن اشيلك الحلموزه او حتي من الزور . انت تؤمر

وربنا معاك في امتحاناتك يا مان ومنتظرك علي احر من الجمر عشان هريدي بيسال عليك