السبت، 4 أكتوبر 2008

زمــــــارة كبيييييييييييرة

انا جبتلكوا يا جماعة النهارده معلومات مهمة جدا جدا . لكل اللي عايز يشتري عربية
اهم حاجة يا جماعة في العربية مش البطارية ولا المرايات ولا الكربراتير ولا الكلام الفاضي ده

ولا عامله كام كيلو ولا بتقطع في السكة ولا الكلام ده .. كل ده خنتريش في البقشيش

ولا حد يضحك عليك ويقولك كام حصان وكان نقلة وكان نفر وكام انبوبه
اهم حاجة في العربية حسب خبراتي المستقبليه هي الزمارة

كلاكس العربية يا جماعة
اوصيكم بكلاكس العربية

احنا بقينا في مجتمع منظم جدا جدا لازمله زماره وتكون كبيرة وصوتها عالي

دلوقتي لو انت ماشي في شارع جامعة الدول - خير اللهم اجعله خير - هتلاقي حمير وحصنه ماشية في نص الشارع وهتلاقي ناس رامينها ماشيين في الشارع ومش هينفع تقولهم حاسبوا ولا تكون رفيق بيهم

لازم زمارة تصحيهم من الغيبوبة اللي هما فيها بقالهم 40 سنه دي
الناس اللي ماشيين في الشارع حصل عندهم تبلد في الاحساس وتهنيج في المشاعر

محدش بقي بيعبر حد راكب عربية .. لازم هو اللي يعدي الاول
لانه شايل من جواه غل وحقد وهم كفيلين انهم يخلوه ينام تحت العربية ويلبسك قضية .. مش مهم .. المهم انه خد بتاره منك برده

ولو انت نازل من علي كوبري - انا رايي متطلعش الكوبري اصلا - يا ريت تضرب زمارة من الكيلو خمسين وانت جاي لان ممكن يومك يصادف يوم الخميس وهو اليوم اللي الواد زعبوله بيلعب مع صحابه كوره علي مطلع الكوبري .. واحتمال تخبطهم وتروح في داهيه

لازم زماره .. وتكون كبيرة ويا سلام لو تركبلها صب ووفر عشان تزمر كويس


اللهم بلغت
اللهم فاشهد

هناك 5 تعليقات:

قررت أكون عانس يقول...

هههههههههه

نصيحة حلوة اول مرة حد ينصحها

عارف انا جربت الشعورين شعور انك مواطن ماشى فى الشارع ومواطن راكب عربية
لما تبقى ماشى و عربية هتدوسك تشتم اللى جواها وتتهمه بالطيش و الغباوة
و لما تكون انت اللى ركاب عربية وتبقى هتدوس حد تتهمه بالتناحة وانه مغمى عليه

Anaza3lan يقول...

قررت اكون عانس

اجمل حاجة انك تكوني بتعلقي وانتي علي دراية بما سيحدث ليكي في الشارع سواء كنتي راكبه عربية او ماشية علي رجليكي

فعلا بقت حاجة غريبة اوي في الشعب وهو انه مبقاش عنده احساس بالمكان والزمان والاتجاهات . ممكن يكون عشان اللي بيحصل فيه من النظام ؟؟ احتمال .. وممكن برده يكون الزمارة بتاعته بايظة

علي كل لسه ياما هنشوف وياما هنشتري زمازير كتير

وكلمة اخيرة للاطفال .. يا ريت بلاش تلعبوا كورة علي الكوبري . كفايه تحت الكوبري

Manamino يقول...

والله معاك حق
بس برضو زي مافيه ناس جبلات ومابتوسعش ولا حتي بالطبل البلدي فيه برضو ناس راكبين العربيات وبيزمروا علي الفاضي والمليان
وخصوصا سواقين الميكروباصات والتاكسيات
ياراجل ده ساعات تلاقي الكاسيت بتاع الميكروباظ بايظ يقوم صاحبنا السواق مشغل الكلاكس علشان يسلي نفسه
يالله ربنا يسترها علينا
تحياتي ياباشا

مخنوق كيك يقول...

manamido

فعلا سواقين الميكروباصات دول ملهمش لازمة في الحياه غير استنشاق الهواء النقي واللعب بالكلاكسات

لدرجة انهم بقوا بيشتموا بعض بالكلاكسات تخيل ؟؟!!

ولاد اللعيبه

يللا ربنا يهديهم وياخدهم

غير معرف يقول...

صحيح يامان الحياه اصبحت عباره عن جراج كبير وكله كلاكسات ده ياراجل المطلح الجديد على الشاب الخنيق الى عامل زى الابريق او الشاب الكحول الى فاكر نفسه امور يتقالى عليه كلاكس تلقى اتين بيكلموا بعض يقول واحد منه للتانى ياعم فكك منه ده شب كلاكس حاجه غريبه يامان بس حقيقى الكلاكس حاجه مهمه اليومين دول انا حتى بفكر اجيب واحد بس مش عارف اشغله ازاى اصلى معنديش عربيه بس احيانا بحتاجه وانا ماشى فى الشارع من زحمة الناس . ايه رايئك شوفلى كدا فكره اشغله من غير مجيب عربيه
ماشى جنب الحيط