الجمعة، 17 أكتوبر 2008

البورصــــــــة ..... وقـــــــــعــــت



هو ايه دلوقتي مبقاش يقع ؟
الاتوبيس بيقع من علي الكوبري والكوبري بيقع في المية والمية بتقع علي الناس والناس بتقع علي الارض

كله بيقع علي كله

ازمة شهدتها العالم كله الفتره القصيرة اللي فاتت .. وطبعا كلنا سمعنا عن انخفاض البورصة او ممكن نقول انهيار

طبعا 20 في المية في اسبوع واحد دي مصيبه .. مصيبه كبيرة يا جدعان
بس الغريب بقي ان البورصة وقعت من كل حته اللا في مصر تخيلوا !!!!!

مصر ماشاء الله عليها دولة الامن والتحدي والتماسك . يادوب كام حاله انتحار علي كام حالة جنون
لكن طبعا الاعلام الصادق . قال مفيش اي حاجة من دي حصلت وكله تمام واللي ييجي في الشيش بقشيش

الاغرب بقي اللي خلاني اشوف ايه حكايه البورصة دي . ان العقل بيقول - ايام ما كان عندي عقل - ان البورصة لما تنضرب
المفروض الدولار ينزل . صح ؟؟

غريبة . لما تلاقي الدولار بينزل في كل العالم ويرتفع عندك انت . يبقي انت اكيد في مصر
هي مصر فين من الكلام ده ؟
طبعا سبب الانهيار ده هو عدم الوحده وعدم التكاتف . في ايد خفية بتلعب بالموضوع ده انا مش شايفها

حاولت كتير ادور علي باكوا المناديل بتاعي مش لاقيه .. بس الحمد لله لقيته في التلاجة
المهم . الخسارة دي كانت ضربه قاضيه لكل الناس . اللي شاري سهم دلوقتي بخ . وخسر يا ولداه اللي شايله تحت البلاطة

طبعا الحيتان الكبيرة هتستفاد . ما هي لعبه احتكار . بيع وشرا وضرب تحت الحزام
بس برده . اشمعني الدولار بيغلي عندنا احنا في مصر وبينزل في العالم كله ؟؟ داهيه ليكون الدولار بتاعنا غير بتاعهم

الست تفيده بقي سالت وقالت .هل ده هيغلي اجره الميكروباص تاني ؟ وهل السلع هتغلي تاني وللا ايه ؟
طبعا انا جاوبتها اجابه جامعة مانعة وقلتلها .. " لم تتقدم البشرية اللا عندما سالت "

يا اخت تفيده الانهيار ده علي مستوي العالم وفيه انخفاض 30 في المية علي بعض السلع اللي هي
الزيت والرز والمكرونة واحتمال البسكويت المحشي شوكلاته
بس ربنا يستر ومتطلعش اشاعه

لانها لو طلعت اشاعه الموزة بتاعتي هتضربني لاني كنت مراهنها علي باكو بسكويت

يا رب حكايه البورصة دي تبقي بمثابه استرخاء للناس شويه من الاسعار اللي عماله تطلع فوق فوق دي . دي هتاخد ارواحنا معاها
تقولشي اسعار مركبنلها مواتير هيلوم . كله عمال يزيد والمرتبات عماله تقل لحد ما الواحد هيجيله انيميا

احنا عايزين نتكاتف يا جماعة مع بعض عشان انا شايف سرسوب نور جاي من بعيد

احتمال يكون عشان نور الحمام مفتوح

المهم سلام دلوقتي عشان فيه بورصة واقفة علي الحيطة هروح اضربها بالشبشب عشان اوقعها هي كمان







هناك 7 تعليقات:

Ahmed Al-Sabbagh يقول...

هههههههه
مدونتك جميلة

ABOALI يقول...

البورصة وقعت
تايه فى وسط الزحام
بداور على سعر الدولار
قالوا البورصة وقعت
طلع انى انا تعبان
يا مصر فيك العجب
مافيش راجل بشنب
يقف ويقول
كلام من دهب
هجس وروشنه
سكر وتموين
وعيش ودقيق
يا رب يا معين
شومة على شومة
ربنا يهد الحكومة


باحييك على طرح هذا الموضوع الحيوى
فى الكمياء الحيوية اللى تبعه للقوات الجوية

مخنوق كيك يقول...

ابو علي

مع اني مش فاهم حضرتك عايز تقول ايه بس كفايه تشريفك لموضوعي

كاس علي كاس ابو علي هو الاساس

كـــيــــــــارا يقول...

مممممممممم

من قال لا اعلم فقد افتب

وانا بفتي اهووووووووووو


اني مش فاهمه حاجه في موال البورصه الا من كام حاجه قريتها علي كام خبر

كده يعني

د/ رامي شهاب الدين يقول...

مساء الخير والتجلى حسب التوقيت المحلى

جرى إيه يابرنس

إيه وجع الدماغ اللى انت كاتبه ده

فعلا الإقتصاد العالمى إنضرب

بس إحنا مالنا.. هو إحنا عندنا إقتصاد ولا إيه؟



صحيح قبل ما أنسى .. هى البورصة عندنا فى شارع إيه؟

البورصة الوحيدة إللى أعرفها هى بورصة الفراخ إللى فى بنها ، وكمان مش عارف انفلونزا الطيور عملت فيها إيه كمان


قشطة

مخنوق كيك يقول...

الي دكتور شهاب مؤيد الفكر والنعنشة وراعي الثقافة علي طول شارع شهاب وعبد العزيز ومحي الدين ابو العز

البورصة اللي عندي موجوده علي اول فيصل بجوار الشمندورة

بس علي فكرة هي قلبت النشاط وبقيت مقلة لب دلوقتي بتبيع لب سوبر طلقة

يللا هشد انا عشان عندي دور غسيل

واشكرك علي حسن تعاونكم

ماشيه الحياه يقول...

ياسلام كان اسعد خبرا ياصديقى لما سمعت بوقوع البورصه واتمنى من قلبى قلبى قلبا وقالبا انه تفضل وقعه على طول وبفكر انا وبعض اصدقائى المتطوعين بالاعمال الخيريه نبحث سويا هى وقعت فين ونروح كلنا ونردم عليا بالتراب والزباله الى ماليا الشوارع . صحيح بجد بجد فرحت اكتر لما سعر البيضه نزل لخمسين قرش بدلا من 75 قرش حتى بفكر اجيب كميه من البيض واخليها عندى عشان لو سعره عليا تانى ابقى مخزن ما يكفينى اه ماالواحد مننا لازم يحسبها صح مش بردوا الاعلانات كنت بتقول كدا فى رمضان اعلانات ..... جميله