الأربعاء، 8 أكتوبر 2008

وطـــن بـــلا هويـــة



حبايبي الحلوين .. اصحاب المزاج
اتمني ان يومكم احسن من امبارح واحسن من اول امبارح ومراتك تكون بتسمع الكلام

في احد صديق ليا علي النت كنت بتكلم معاه علي الماسنجر حول تصنيف الامم . يعني انت شايف مصر دي عامله ازاي ؟

قالي مصر دي " عديمه الهوية " طبعا دمي فار بدرجة حرارة 80 درجة رختر تحت الصفر والوطنية خدتني وقولتوا اييييييخرس .
انت ازاي تتكلم كده .راح النت عندي فصل ومقدرتش ادخل اكمل الحوار معاه .. " دي لنك " بقي ومشاكلها

طبعا انا قاعد متنرفز ليه هو قال كده وايه سر الكلمة دي
قولت خلاص ياد يا لذيذ ما تقعد مع نفسك تشوف مصر دي فعلا هويتها ايه ؟ دولة اسلامية دولة ثقافية دولة علمانية

دولة كوسة وملوخية

بعد ما دورت في دماغي وصلت لقرار واحد وهو ... في الاخر هتعرف

مصر دولة كويسة وفيها فساد زي اي دولة في العالم .. ولكل قاعده شواذ .. والخطا موجود في كل حته
بس تعالوا كده نشوف مصر عملت ايه يحتسب ليها . يعني نشوف مكتوب ايه في البطاقة بتاعتها

دولة ثقافية ؟؟؟؟

عمر مصر ما هتكون منبع ثقافة طول ما التعليم متدهور للحد المجنون ده .. مفيش مدرسين مفيش تعليم مفيش اهتمام بالتعليم - كله
عايز يبقي زي عمرو دياب ونجلا والحصان
حتي السينيما اللي كله دخل فيها .. حتي لعيبه الكورة دخلوا فيها . بقت زي الملوخية خلاص كله داخل يدوق
افلام غريبة لحد ما الواحد كره يبص في التليفزيون . طب انا عايز اعرف انتوا عايزين تعملوا ايه بس ؟

لو عايزين الحريم تقلع .. تقلع وتخلصنا . بس اهم حاجة في الاخر يبقي فيه نتاج للسينيما

طب دولة اسلامية ؟؟؟
ممكن تكون اسما فقط بس تعالي كده روح الحسين وشوف اكوام الزباله المتبعثره يمينا ويسارا . طب بذمتكوا دي نضافه ؟
البنات اللي ماشين في الشارع اللي لابسين باديهات اشتكت من كتر الضيق . دي سلوك اسلامي ؟ او اخلاقي ؟

لما يلتف 100 شاب حول خمس بنات ويزنقوهم في جامعة الدول .. دا اسلام ؟ دي اخلاق ؟
لما يكون التحرش في المترو علي عينك يا تاجر .. دا دين ؟

في الخارج في اسكتلندا علي سبيل المثال المؤتمرات الكبري بتقام في الكنائس وفي اديره العباده
من شده النضافه واحترامها وقدسيتها .

وفي اليابان بيعبدوا البقر اوك .. بس مقدسين الحكايه دي .. يعني علي الاقل فيه عندهم مبدا - جدعان والله
بس في المقابل رقم واحد في التكنولوجيا

طب دولة رياضة او يحتسب انها فلحت في حاجة رياضية اصلا ؟
هههههههه ضحكتوني والله

اصل انا عرفت ان مصر خدت ميداليه واحده بس برونزية في دورة بكين بتاعه هشام
والميداليه التانيه خدتها واحده اسمها هبه وهي معاقة .. ربنا يكرمها كسبت الميداليه الذهبية وضربت رقم قياسي

احنا فعلا شعب معاق .. السالمين معرفوش ياخدوها وجابتها هبه سيد

هبه سيد اللي كانت بتركن عربيتها الضابط قالها ممنوع الركن .. قالتله في هدوء انا من ذوي الاحتياجات الخاصه .. رفض
حتي بعد ما قالتله " انا هبه سيد .. بطلة مصر " .. فعلا ضابظ نموذج للتخلف اللي هيجيبنا ورا

حتي الكورة اللي فرحانين بيها .. عايزين يجيبوا دكاتره نفساويين ليهم . عشان يصنعوا اللاعب العالمي
هههههههههه . طب هاتوا دكاتره للشعب الاول
حتي رئيس البعثه الرياضية بتاعتنا بره طلع مزور .. طب اقول ايه تاني ؟!!!

بس صحيح مصر فازت بكاس الام الافريقية كتير .. خلاص مصر حلوة . لما يتصرف علي اللعيبه من الضرايب
تبقي مصر حلوة .. بره الكورة هي اللي بتصرف علي البلد .. الكورة استثمار .. هنا الكورة استحمار

استنوا استنوا .. ممكن تكون دولة عسكرية وانا معرفش
مصر يا شباب هي الدولة الوحيده اللي فيها التجنيد اجبار واكتر من 20 في المية بيتهربوا من الجيش . في حين ان الجيش بره
بيدخلوا الجنس اللطيف .. دا اسمه ايه ؟ انتماء .؟

مصر مش نافعة حتي في الهلوسة .. يعني انا اعرف ان الخلاعة من طباع الغرب . بس علي الاقل بيشتغلوا وبينتجوا .
يعني اوك هما معندهمش دين بس علي الاقل ناجحين في حياتهم التكنولوجيه والعلمية والتطبيقية
احنا فين ؟؟؟

احنا دولة هلس ومسخرة ؟ طب فين التقدم ؟ احنا دولة رياضية ؟؟ دا احنا معوقين
عصام الحضري راح سيون دخل فيه خمس اهداف ....... هيهيهيهيهيهي مسخرة

دولة دين ونضافه ؟ الواحد خلاص كره المتسولين والزباله في كل حته

شوفوا اليابان لما انضربت بقنبله ذرية عام 1945 عملت ايه ؟ وصلت لايه ؟
احنا محلك سر

المانيا وفرنسا اتدمروا بعد الحرب العالمية الثانيه

وصلوا لايه ؟؟ الاولي هي ماكينة الصناعة في العالم والثانيه مزز العالم ههههههههههه

طب بذمتكوا نوصف مصر دي بايه ؟؟

نحن امه نامت حتي شخرت ... فلما استيقظت شخرت لها الامم
وان لم تعرف من انت بدون هويتك ... فعذرا قد ضعت حتما كما ضاعت الهمم

هناك 12 تعليقًا:

ABOALI يقول...

ههههههههههههههه
نوصفها بالزلابية والملوخيه
وكمان يا عم
لو تزود التقليه
كله ماشى تايه
وسط الزحام اهو عايش
بزراميط جنب الحيط
اهم حاجة سيبك من السياسة
وعش كده حمار حصاوى
من الصبح للمسا
دور فى البرارى
يمكن فى يوم تلاقى نفسك
انسان تانى


ياااااااااا سلام عليك يا مخنوق كيك
احنا ممكن نسميها ام الدينا
هههههههههه

مخنوق كيك يقول...

Aboali

حبيب هارتي
تشكرات افندم علي ردود حاضوراتكم علي مدونتي المتواضعة

مصر ام الدنيا

فعلا

انا هعيط

سلام بقي عشان هغرق اللابتوب بتاعي

Desert cat يقول...

عزيزى احنا ما شاء الله جمع كل سلبيات العالم وتعالى قارن بينها وبين مصر هتلاقى مصرنا الغالية تفوقت وبشدة
صاحبك اللى بيقولك مصر فقدت الهوية مصرى زيك صح ؟؟؟
تعمل ايه لما واحد بينك وبينه عشرة عمر بس الفرق انه يمنى وانت مصرى ويقولك هو موسم التحرشات عندكو بيبتدى فى الاعياد
انا قفلت الماسنجر على صباعه وخرجت
الهى يورم ويفضح شوبابنا المتحرشين كمان وكمان

habiba يقول...

لازيك
شكرا على توضيح الرؤيا فى التعليق اللى فات
وثانيا يمكن معاك حق فى كل الى قلته لكن خلينى اسالك سؤال
احنا بننتقد وعارفين العيوب دى كويس اوى اوى
لكن تقدر تقولى النقد ده بيعمل ابه؟
انا شايفاه استخراج للعيوب وخلاص
نقد مش بيجى من وراه غير الفضايح وخلاص

انما لو فعلا عايزين نتغير يبقى كل واحد عليه بنفسه
كل واحد يبدأ يتغير للاحسن علشان نلاقى مصر كلها اتغيرت
انما للاسف احنا احسن ناس نعمل الغلط وننتقده بكل بساطه وبيبقى نفس الغلط
طب لو احنا بجد مجربين قرف الغلط ده ليه بنعمله ؟؟؟!!!!!!!!!!!!!!

صدقنى احنا محتاجين اعاده حسابات

تحياتى جدا ليك وان شاء الله مستقبل كويس لبلوجك
يارب تفهم وجهة نظرى صح :)
دمت بكل خير

مخنوق كيك يقول...

قطة الصحراء
شكرا علي مداخلتك وتعليقك واحنا فعلا شعب اخد الدرجة الاولي والامتياز في التدهور الاخلاقي والثقافي وكل حاجة

ربنا يزيدنا كمان وكمان .. من اعمالكم سلط عليكم

Habiba

اسمك علي فكرة جميل اوي وانا بحب ارد عليكي عشان اسمك حلو وكلامك برده حلو

شكرا لاتفاقك ان كل حاجة انا قولتها صح
اما توضيح وجهه نظرك واننا شعب انتقادات لا افعال . ماشاء الله احنا كلنا اصبحنا نقاد .. مبقاش فيه شعب خالص .. خالد يوسف بيطلعنا شعب نزوات وكباريهات وناس وسخة .. والرقابة سايباه . ويوسف معاطي مطلعنا شعب فتن طائفية ومحدش بيحب حد .. وبرده الرقابة سايباه

طيب مهو عشان الناس تفوق يا حبيبة لازم تشوف عيوبها الاول . وتبتدي بنفسها - علي الاقل انا مش بخدع الناس وبقول يا جماعة احنا دولة الفضيلة ومرتع الاخلاق . انا بقول اننا دولة مليانة فساد والمفروض نغير ده . انا حتي بكتب كلامي بطريقة ساخرة عشان الناس اللي بتغلط تحس شويه

انا عن نفسي يا حبيبة ابتديت بنفسي والحمد لله عملت اللي انا عاوزه

مهندس محترم وان شا ءالله اتمني يكون ليا مستقبل محترم .. الرك علي الباقي اللي هيفضل طول عمره في الارض زي شباب وسط البلد والمعاكسات الواطية بتاعتهم

اتمني ان حال البلد تنصلح والشباب اللي يقروا كلامي يغيروا من نفسهم

سومه...مجنونه فى بلد عاقل يقول...

مقدرش اضحك على كلامك للاسف لانه مبكى
انا دخلت لاقيت للمجانين فقط قلت يبقى المدونه دى صديقه
حختلف معاك طبعا فى اشياء اوعى تفكر مفيش عنف ضد النساء فى الغرب بالعكس اعلى نسبه عنف واغتصاب للنساء فى امريكا ارض الحريات ودا حسب بحث عملته واحده اعرفها فى كليه طب عن العنف ضد النساء
فى جمله مضايقانى اقولك عليها
حتي بعد ما قالتله " انا هبه سيد .. بطلة مصر " .. فعلا ضابظ نموذج للتخلف اللي هيجيبنا ورا

مع انى بعترف ان لدينا ظباط وشعوب اغبياء بس الظابط دا شخص محترم اقولك ليه
لان الانسان مش المفروض يتخذ من اعاقته او نجاحه واسطه ليه فى الحياه والقانون لابد ان يطبق على الكبير والصغير كون بقى فى ظباط بهايم مبيطبقوش غير الكوسه يبقى نشتم الظباط المحترمين زى الراجل دا ونعترض عليه
والدول اللى حضرتك بتشيد باعمالها لو حدث فيها نفس الموقف حتتصرف نفس تصرف الظابط
يا سيدى متفهمنيش ان واحده واخده اولمبيات مش حتقدر تمشى شويه قدام تلاقى ركنه للعربيه
وانا لا اقلل من شانها لكن اعيب عليها انهاتتخذ من اعاقتها وسيله لاشفاق الاخرين واختراق القانون
باقى الزلابيه واللوخيه هى فعلا ملوخيه بس عفنت وعفنت بسببنا وهم مين المصرينن ما هو احنا احنا واهلنا واقاربنا واصدقائنا
وللاسف بعترف اننا فعلا كسالى ومهملين وماتت فينا النخوه
الحل كالاتى
مش حقول الاسلام زى شعار الاخوان
لا حقولك الايمان وتقوى الله هى الحل
لان كلنا مسلمين لكن لا نعمل باسلامنا ولا نتقى الله
ولهذا نهمل اعمالنا ونتخذ من ديننا حجه لتتكاسل
والاسلام منهم برىء
يوم ما كل انسان يكلف بعمله فيقوم به على الوجه الاكمل من اول الطالب والزارع وحتى الزبال لرئيس جمهوريه الملوخيه اوعدك اننا حنتصلح
بس للاسف تفهم مين
اقولك متفهمش حد تعالى نبدا بنفسنا الاول
مدونتك رائعه استمر واعتبرنى من زوارك المجانين الدائمين ان شاء الله
تحياتى ليك سومه_87

سومه...مجنونه فى بلد عاقل يقول...

بس سؤال معلش هى العربيه اللى فى المدونه دى بتاعتك عشان بس احدد حقر عليك ولا ادعيلك ربنا يغنيك :))

سومه...مجنونه فى بلد عاقل يقول...

تركت ليك تعليق فى موضوع قديم اسمه انا عايز اتجوز
:)

مخنوق كيك يقول...

سومة

شكرا لتعليقك الجميل ويشرفني كل الكلام اللي انتي قولتيه

اما بخصوص العربية فدي مش بتاعتي طبعا

دي بتاعه ابن خالي

واتمني اشوفك هنا علي طول

habiba يقول...

ماتتصورش قد ايه ردك على تعليقى فرحنى
فرحت انك قد ايه تفمت كلامى ومش اخدته على نفسك والحمد لله يارب بجد

وثانيا احترمت احترامك لنفسك بشده وثقتك فى انك على حق وتقويمك لنفسك وللغلط

وطبعا عندك حق وده اللى انا اقصده ان كل واحد عليه بنفسه
ولو كل واحد عمل زيك التغيير هيكون فعال بجد

الله ينور عليك ويارب تبقى مهندس جامد يارب وادعيلى انا كمان اتخرج السنادى لانى فى بكالوريوس

بالمناسبه متشكره اوى اوى على زوقك ولانك بتحب اسم حبيبه وبتحب كلامى
ربنا يخليك يارب ولو كنت قابلتنا فى الملتقى كنت هتعرف انى اسمى نور كمان مش حبيبه بي :):)

سلاااااااااااااام

فلسطينية الهوى يقول...

امممم

ممكن مصر تكون فيها كل المصايب دي واكتر وده حقيقي

بس في امل بردوا

في امل في الشباب اللي رافض الوضع انه يغيره

دايما في امل طول مافي ناس مش عاجبها الحال

الفجر مش بيجي الا بعد ليل حالك

ماشيه الحياه يقول...

ههههههههه والله يامان كلامك عجبنى جدا اصلى بصراحه مبحبش مصر يعنى بمعنى ادق معنديش انتماء وهيبقى عندى انتماء ليه اصلا يالا مش ده المهم المهم انك قولت كلام كتير عجبنى بس بصراحه الى معجبنيش فى كلامك يامان وحسك عينك تكرررررررره تانى انك تضع عمرو دياب فى مقارنه بين نجلا والحصان على فكرة عمر الواحيد الى ممكن يكون عنده هويه على الاقل عرف طريقه صح وبيدى انتاج كويس كفايه انه رفع سعر السى دى فى وقت محدش بيشترى . ماشى يامان والله حبيبى انت ههههه من ايام الجيزة