الجمعة، 10 أكتوبر 2008

ويــل للعالــم اذا انــحرف المتعـلـمون وتبـهــيظ المثـقــــفون



ويل للعالم اذا انحرف المتعلمون وتبهيظ المثقفون

من اجمل افلام المؤلف محمود ابو زيد .. فيلم " البيضة والحجر " واحده من ابداعات احمد ذكي .الملقب بالامبراطور

فيلم بصراحة ممتع وفي الصميم والجون. انا مش عارف المؤلف جاب منين الحكم والخوابير دي كلها . خوابير جمع خبره
شدتني اوي جملة احمد ذكي في الفيلم وهو بيقول " ويل للعالم اذا انحرف المتعلمون وتبهيظ المثقفون " حسيت ان العلم ده اد ايه غالي اوي

يعني ممكن بسببه الدولة تنهار ويتخزوق الشعب كله وينحرف المجتمع عن مساره الطبيعي
طب ليه احمد ذكي قال كده ؟ وهل فعلا الجملة دي حقيقية ؟

فيلم الكيف ايضا للمؤلف ايضا محمود ابو زيد . وهو انتاج عام 1985 كان فيلم في منتهي الجمال ومنتهي المزاج . بل انه كان بيخاطب العقل بصورة جبارة وشديده
زي ما يكون رئيس الديوان الملكي هو اللي كاتبه . بما فيه من اقناع وثقافة عالية جدا
الشكرمون طاخ في الترالولي وتفييش الهوامش والتحتوث البراني كل دي من ابتاكارات محمود ابو زيد في فيلم الكيف . اصبح دلوقتي قاموس ثقافي
زي الابلاتين لدع في دهاليز الحياه . واضرب حقنتين وشد صابونه

اللي كتب فيم الكيف هو اللي كتب فيلم البيضة والحجر وكان بيجابه مشكلة الدراويش في مصر والشعودذة والسحر
واحمد ذكي كان دورة راجل علم بيدرس في المدرسة ولما حصلتله مشاكل اتجه للشعوذه واصبح مشهور جدا وبيطلعلك اد ايه الشعب ده محتاج سحر لانه مفيش عنده ايمان بحاجة
واثبت اد ايه ان الشعوذه والسحر في المقام الاول هما ثقافة . وازاي يبقي عندك قدرة اقناع عاليه جدا بحيث انك تلبس اللي قدامك السلطنية

واختصرها احمد ذكي وقال " ويل للعالم اذا انحرف المتعلمون وتبهيظ المثقفون " فعلا ما هما دول اللي في اديهم الثقافة والقواميس
وهما دول اللي طلعوا لغة العصر من موزة وتكايه وزغروف و جنشة وغرقانة

ممكن يكون فيكم مش فاهم كلامى . اللي مش فاهم كلامي يروح يقرا قصة " مصرع صرصار في وضح النهار " للروائي الكبير سعيد الملط
وهو هيفهم كل حاجة

الغريب ان الفيلم ده لما اتكتب المؤلف قال فيه . الشهادات دلوقتي مبقتش تاكل عيش اللي بياكل عيش هو تفتيح المخ .. الكلام ده كان سنه 1985 . مع انه
ينطبق تماما علي الوقت الحالي .

الكوميديا الساخرة المنتشرة في الوقت الحالي - اقصد الكوميديا الكتابيه - والمقالات الصحفية . الكبار دول هم المثقفون فعلا وهما دول اللي يتخاف منهم
زي ما قال بالظبط محمود ابو زيد
انا مش هخاف من سواق ميكروباص ولا بتاع تين شوكي . لان فكره محدود وهيفضل محدود . لكن يا خوفي من المتعلمين اللي اتخرجوا من الكليه لاسعين
ومنتظرين اي لحظة عشان يبقوا دراويش ويظبطوا نفسيهم ويعملوا اول ارنب .. وانا واحد منهم علي فكرة
وجهة نظري من طرح الموضوع ده هو اني بخاطب كل مثقف ومتعلم . وبقوله خلي بالك من نفسك لانك ممكن في لحظة والتانيه تتبهيظ . او دماغك تلسع

وتبقي سبب في خرم الاوزون الثقافي في بلدنا . وبسببك العالم هينحرف . لانك سلاح ذو حدين . وتبقي مزاجنجي التاني

قريت مقال لخالد منتصر زمان كان بعنوان " لماذا كرهت المثقفين ؟ ازوداجية الثقافية في العالم العربي "
وقالك المثقفون اصبحوا بيهتموا بالفلوس والمجلات بتاعه الخليج اكثر من الابداع . يبقي اذن دول تبهيظوا فعلا

ودا مثال علي كلامي " إزدواجية بعض كبار المثقفين تتجلى أقوى ماتتجلى فى علاقاتهم الجنسية مع مبدعات المستقبل ممن يضحكون عليهم
وكيف يتحدثون معهن عن كسر التابوهات، وعندما تطلب إحداهن الزواج يخلع المثقف، ويصحو الجميع على خبر صاعق وهو زواجه من فلاحة من البلد . يغلق عليها الباب، ويحولها المثقف التقدمى إلى مجرد كائن بيولوجى يمسح ويكنس ويستقبل جنسه البارد السريع المتقطع !
إنها إزدواجية المثقف الثورى الليبرالى الرجعى المملوكى " . هو ده التبهيظ بعينه او ما يسمية البعض بالازدواجية

وبخاطب المسؤولين عن التعليم بلاش تصعبوا المناهج عشان الناس متروحش تدور علي النت ودماغها تنفتح لان ده ضار علينا . لان الشعب المصري لو دماغه اتفتحت

هيفتح دماغ الحكومة وهيخليها تخر دم . وفي الحالة دي كله هيمشي في الشارع يقول " انا اللي ستفت الاونطة جوه الشنطة "
وعايز كله يفتح دماغه ويدهرزه ويدهبزه. عشان يبرعش ويحنكش ويبقي اخر طعطعة

وفي الاخر احب اهدي فيلم البيضة والحجر لحبيب هارتي صاحب ديوانة القصصي المشهور " ام رحاب وعالم ما وراء السحاب "

وعمار يا مصر

هناك 16 تعليقًا:

كيارا يقول...

الفيلم ده بعشقه ودايما اتفرج عليه بجد فيه رسائل كتير اوي

mahasen saber يقول...

انتا حللت الفيلم بمنتهى العقل
والموضوعيه والجمال ..شئ تحفه..
فعلا خد الحكمه من....افواه العاقلين
بس قولى مين فى وقتنا ده معندوش ازدواجيه فى المعايير...
ها قولى..

mahasen saber يقول...

اه تعالالى هنا بقه انا اغير اسمى
واخليه محاسن الصدف ..اه انتا بتتريق
ده انتا وقعتك بحلقى
هتروح بنفسك على مستفى المجانيين هتلاقينى حاجزالك هناك اوضه ...قصدى عنبر عشان لو حبيت تاخد حد معاك واكيد انا مش منهم
بجد تعليقك استغربته كيك ..مش اليى بيتاكل
انا بهزر بس استغربت التعليق فعلا...

mohamed ghalia يقول...

فعلا هيا أفلام ليها قصة وهدف مش زى أفلام اليومين دول طبعا شمش كلها بس المعظم؟
تقبل تحياتى لفت نظرنا لحاجات مهمة قوى

انا ودماغي يقول...

فعلا الفلم ده رائع جدا و أنت حللته بطريقة أروع بجد أحيك عليها

مخنوق كيك يقول...

كيارا

طبعا الافلام دي كلها كنز وفعلا ليها طعم غير الافلام العقيمة بتاعه دلوقتي اللي دخل فيها كل الطبقات

اشكرك علي مداخلتك

مخنوق كيك يقول...

محاسن الصدف

قصدي محاسن صابر

طبعا لازم نتفق مع بعض لاننا مجانين ولازم يكون فيه تقابل فكري
وبالنسبة للازدواجية فللاسف دي مبادئ احنا اتربينا عليها من صغيرنا

يعني اصبح دلوقتي الانسان المصري بينمو عنده مبدا الازدواجية في كل حاجة
عشان يقدر يبرر موقفه في كل حاجة

وبالنسبة لتغيير اسمك فانا مش بتريأ والله ولا حاجة

بالعكس انا بقول ان انتي نسمة لطيفة بتهف علي المدونة بتاعتي وعلي اي مدونة بتزوريها

لذلك قلت غيري اسمك وخليه محاسن الصدف لانك صدفة جميلة

بس كده

مخنوق كيك يقول...

mohamed ghalia

طبعا دي الافلام التي قامت عليها سينيما

مش فيلم عبيط زي افلام اليومين دول

اشكرك علي مداخلتك

مخنوق كيك يقول...

انا ودماغي

شكرا علي ردك ومداخلتك الطيبة

د/ رامي شهاب الدين يقول...

أنا معجب جدا بشخصية أحمد ذكى فى فيلم البيضة والحجر

للاسف إحنا فى زمن الفنكوش .. الفنكشة يعنى

الواحد يفنكش له كام كلمة وكام معلومة يقولوا عليه مثقف وزهبج من زهابجة الزمن

على رأى عادل إمام لما قال :البلد دى مش عايزة دكاترة ولا مهندسن ، البلد دى عايزة صيع وحرمية ، إحنا فى زمن المسخ .. بيتهيألى عادل إمام ما قالشى ولا هيقول غيرها أصلا

سلام ياعم المخنوق كييييييييييك بس ياريت ماتكترشى البيض هههههه ((بهزر طبعا))

ABOALI يقول...

يا عم التثقيف ده ايام زمان
ايام الست ام كلثوم
كان الواحد يقعد يثقف لغاية لما ايده توجعه
دلوقتى الواحد استريح من التثقيف
ومحتاجين نلطم ونشد الطرح

اه يا ثقافة
نعشك شايفه قدامى
من عمو عمر مكرم امامى
ومن غالوتك يا غاليه
بالبنزين 92
ولعوكى
الله عليكى وانتى مزهزه
ومنورة وريحة رمادك
سحابة سودا معقربة


ونعم البيض
و الحجر علشان ما تزعلش

ana ga3an يقول...

???
جنشة وغرقانة
انت ضريب قديم بقي
بس المجموعات القصصية اللي انت بتكلم عليها دي انا بشبة
انت سمعت عنها فين؟؟؟
قهوة كتكوت
دي كلها من تأليفي يا ابني

مخنوق كيك يقول...

انا جعان

يا نهار ايبض .. انا يشرفني يا كبير انك تطل من البلكونة علي كلامي

بخصوص المجموعة القصيية اكيد طبعا بتاعتك . هو حد يقدر يقول الكلام المجعلص ده غيرك ؟ دا احنا عايشين في مدونتك وتحت ضلك يا حانينا معلش اصل انا كتبتها ونسيت اعمل لنك علي مدونتك .. تقبل اعتذاراتي وقبلاتي

ماشيه الحياه يقول...

اخص عليك يامان ازاى تنسى دور البرنس محمود عبد العزيز يعنى راجل انت قعدت تكلم عن احمد ذكى نص ساعه لدرجة انى مقدرتش اكلم قرايا ومتفتكرش محمود عبد العزيز وتكلم عن المولف بس ياراجل ده ابدع فى بدور كفايه انه فعلا اتكيف عشان يعرف يطلع الدور صح وانت فاهم بقى ازاى كان مكيف يعنى مش هعرفك انا يامان انت جهبز فى الموضوع ده هههههههههه . على فكرة حسك عينك تزكر اسمى تانى فى المدونه دى تقولهم روحوا اسالى المولف الكبير سعيد متقولهم انت ياااااااا مش عاوز اقولك اسمك ههههههه عشان تعرف بس انت قد ايه غالى عليا يامان انت حبيبى من ايام الجيزة .

adel يقول...

فيلم الكيف ده مشكلة و يستاهل اوسكار
و عندك حق طبعا

عادل
http://elbald-dy.blogspot.com/

مخنوق كيك يقول...

Por supuesto que fue el tiempo suficiente para pensar y obtener lo que desea la comunidad .. Estoy a la espera de la llamada am