ازيكم يا شباب .. يا رب تكونوا مباسيط وسعايده .. والحياه ماشية فل وياسمين وموووووووووووز
الجواز ده نعمة يا جدعان .. فيه احلي من الفستان الابيض والبدلة السودا ؟ فيه احلي من شهر العسل ؟؟ مفيش طبعا
النهارده بصراحة كنت قاعد مع صحابي وصحباتي بنشد شيشة علي كهوة المصريين . وكنا بنتناقش حول اوضاع البلد والناس تعبانة ومفيش معاها فلوس وعايزه تشتغل وتفتح بيت
اللي لفت نظري في القاعده حبيب هارتي " هريدي ". بيقولنا بعلو صوته وهي بيشد في سجارته " انا عايز اتجوز "
الغريب في الموضوع ان هريدي اول مرة يعي للواقع اللي احنا عايشينه .. علي طول كان متدهول وبيكتب شعر بالعامية الفصحي . ومكانش ليه دعوة بالحياه خالص وكان عايش ملكوت لوحده
وسبحان الله .. اول ما بدا كلامة قال " عايز اتجوز "
بذمتكم مش كلمة جامدة .. الواد ده عبقري .. حط ايده علي الجرح اللي معور كل شباب قصر النيل والحتيقة الدولية والازهر باركينج باركينج
الشباب كله عايز يتجوز ومش عارفين .. طب نعمل ايه يا جماعة ؟؟ واحد بيحب بقاله 6 سنين وبيقابله حبيبته اللي ساكنه في اسيوط . نعمل فيهم ايه ؟ نساعدهم ازاي ؟ الراجل مش عارف يجيب شقة .. وكل ما يجيلها عريس تزحلقه وتديله استماره سته .. وتقعد بالليل تسمع كاظم الساهر .. لحد ما هتكرهه
الحكومة كتر خيرها راحت عملت قرعة للاسكان في بنك الاسكان والتعمير .. روح كده البنك هتلاقي قمم واقفة وامم نايمة وامم مغمي عليها . واحلي ما في الموضوع العيال البلابيص اللي طلعوا علي المواسير عشان يدفعوا 5 الاف جنيه للست اللي معاها الاستمارات .
وتلاقي يا عيني اعلانات مليانة في موقع " خلطة العمر " .. ابحث عن فتاه وسيمة ويكون مرتبها 700 جنيه .. طبعا احسن من تاكسي
ومطلوب شاب وسيم وجزاب وشغال شغلانه حلوة ومعاه شقة ... ادي دقني لو لقيتي حد بالاسم ده !! خليكي قنوعة وشويه وانتي احتمال تتجوزي بعد 10 سنين بس
انا بخاطب كل فتاه واهالي الفتاه .. انهم يتعاونوا مع الشباب ويسهلوا الجواز شويه .. دا الجواز يا جماعة هدف سامي ونبيل . ولازم لاستمرار الحياه البشرية في ام البلد الفقرية دي . لازم تساعدوا ولادكوا وبناتكوا بدل ما يحصل مشاكل وسط البلد عشان وسط واحده رقاصة .. لازم نعمل واقفة ........ غير واقفة كوبري عباس .. لازم ندعم شبابنا ونلم بناتنا شويه في البيت .. خلوا الامور تهدي شوية
احنا داخلين علي ايام سودة .. والباقي اسود .. وقابلوني لو اتجوزتوا
واحب اوجه كلمة لببهاتنا وامهتنا .. خلوا بالكوا من عيالكوا
شكرا
هناك 16 تعليقًا:
موضوع مهم وحيوي جدا
وفي كتير بيتغربو عشان يعرفوا يرتبطوا بالانسانه اللي حبوها وفي كتير اتجوزو وخلااص لان اهلهم حطوا العقبات
بس في كتير بقي مش بيحط العراقيل دي
تحياتي
احييكي يا كيارا علي رأيك المتفاءل ان برده مفيش ناس بتحط العراقيل دي
نفسي والله الناس كلها تتجوز بدل ما هما زاحمين الشارع كده ومش عارف امشي بالعجلة بتاعتي
موضوعك مهم اوى و أنت كتبته بطريقة لطيفة مووووووووووووت
فعلا و الله معاك حق كل حاجة بقت نار و كمان أهل البنت بيدوسوا أوى فى الشبكة و المهر ووووووو
و دى حجات كلها رمزية و مش لازم تكون كدة
بس على فكرة اللى جاى أحسن
و حتشوف
لو متابع للأخبار كويس اليومين دول حتعرف ليه هو أحسن ؛)
ههههههههههههههههههه والله انت تحفة واسلوبك تحفة
حلوة بجد المدونة بتاعتك
اول مرة ازورها بس ان شاء الله مش هاتبقي اخر زيارة
تحياتي
وبالنسبة لموضوع الجواز بقي فانا عندي الحل
وقلته للسادة المسئولين من زمان بس ماحدش سمع كلامي
الحل يتلخص في كلمتين
شوفت
اديني نسيت الكلمتين هم ايه
يالله مش مهم
تحياتي ياريس
عايز تتجوز
حرام عليك
يا كيك
اسئل اللى اتجوزا
وعيب عليك تقول
يا جواز
وانت ماسك سجارة
ومعرفتش تقول عبارة
وعلى القهاوى نعمل
رجاله
ونشد شيشة وعرنوس
ونقول فين يا فلوس
قبل الفلوس يا كيك
افتح صفحة الاخلاق
وشوف الاول
صنع الكيك
ده محتاج راجل
مش ذكر
كل اللى عليه
اعمل ايه
يا عم كيك
الجواز مش لشباب القهاوى انصح حبيب هارتك بكده
تحياتى
اسلوبك جميل وطريقتك جميله فى عرض الموضوع بس انا بختلف معاك فى حاجات الاهل لما بيجوا يسهلوا الجوازه احيانا فى شباب مش بيقدروا ده وبيعتبروا ان كل حاجه سهله وبيفضلوا طول حياتهم حاسيين انهم اخدوا البنت من غير ما يتعبوا فيها وفى اهالى مش بيساعدوا حد وبيعتقدوا انهم لما يغالوا فى الطلبات ده بيغلى البنت فى عين اى عريس يتقدملهاوفى اهالى عايزين الوسط بين الاتنين وده نادرا ما بتلاقيه بس كلمه اخيره انا متفقه مع ابو على فى حاجه ان الشباب اكترهم دلوقتى موجودين على القهاوى والكافيهات وماشيين بالسجاير وبيصرفوا فى فلوس من غير حساب ولما تيجى تساله متجوزتش لحد دلوقتى ليه يقولك منيييييييين يا عم دا انا على فيض الكريم طب فكر الاول فى كل قرش بيتصرف وبعدين اتكلم ده رايى ومش عايزه اكون تقلت بكلامى على حد
هههههههه تضامن معاك يا كابتن فيه بوست عندي اسمه عاوزه اتجوز ميكانيكى ابقى شوفه بقول للشباب توضعوا شويه
انا ودماغي
عثل والنبي عثل ردك .. ويشرفني انك تردي علي البوست بتاعي .. هو يعني ايه بوست صحيح ؟
المهم
طبعا احوال الدنيا بقت احسن دنا لسه حتي سامع ان الرئيس بجلالة قدره افرج علي ابراهيم عيسي اللي كتب الالهه لا تمرض وكان سبب انه اتحبس
فعلا احنا داخلين علي عصر احسن واحسن
manamido
انت مين ؟؟؟ هو انا اتعديت منك وللا ايه ؟
اشرب نعناع كتير يا مان وانت هتفتكر كويس وهتفتكر الكلمتين
وهغنيلك قول الكلمتين يللا قولهم لو كده يرضيك .
احييك علي تشريفك لموضوعي . اما بخصوص الجواز فحله في كلمتين فعلا
No woman No cry
Aboali
حبيب هارتي .. ومعشوق الجماهير والملايين
شكرا يا باشا علي ردك بس انا ليا كام استفسار كده في القصيدة الجهنمية بتاعتك
انت عرفت العرنوس منين ؟؟ انت تعرف هريدي ؟؟
ثانيا ما علاقة الكيك بالاخلاف يا كبير ؟
ثالثا . هو صنع الكيك محتاج راجل ؟؟ انا اعرف ان صنع الكيك محتاج فانيلا وبيض وقليلا من الدقيق . وللا هو اتغير وللا ايه ؟
القهوة دي هي المنفز الطبيعي لغضب الشعب بدل ما يطلع يولع في العربيات وهنولع في عربيتك اول واحد .. هما يعني اللي اشتغلوا خدوا ايه ؟
خلينا نشجع المعسل المحلي ونعيش اللحظة
سعد سعد يحيي سعد
اذا مات عبد الناصر فكلنا عبد الناصر
يسقط الانجليز
مشمشة
شكرا علي ردك العقلي جدا وفعلا انا متفق معاكي في كل كلمة بس انا مش بتكلم علي الناس اللي قاعدين علي القهاوي
انا بتكلم عن الشباب اللي ماشيين علي كوبري قصر النيل وقافلين الطريق ليل نهار . فيه ناس كويسه بتحب ناس سنين طويلة وبتشتغل والاهالي بيحبكوها شويه . احتمال يكون خوف واحتمال تكون ظروف - الحياه فرضتها علي الناس
انا مش بتكلم علي هريدي ولا اصحاب القهاوي .. انا اخدت الكلمة من علي لسانه بس . لكن هو لا هيتجوز ولا نيله
بخصوص الجواز برده واستدلالك علي الناس اللي بيصرفوا . الجواز مش فلوس وبس . الجواز مسئولية والناس اللي مدمنين القهوة دول معندهمش مسئولية .. ممكن يكون في جيبه تلاته جنيه بيصرفهم علي كوكتيل فراولة وجيم بلياردو
بس فين المسئولية ؟؟
المسئولية صعبه ولازم تتربي في نفوس الشباب والاسرة تربيها فيهم . عشان نتجوز ونخلص بقي من الهم ده
اخر الاخبار
القبض علي اتنين حبيبه في جنيه الحيوانات بتهمة تبادل الورد امام قفص الاسد
No woman No cry
هههههههههههه انت غلطان اهو انتوا كدا يا رجاله تصوتوا وتقولوا يا جواز وترجعوا تلعنوا سلسفيل مراتتكم والستات وكان يوم اسود ومهبب وانا كنت اتعميت ولا اتهبلت
طيب ما تخليكم ع البر احسن
شوف حقولك على شىء ربنا سبحانه وتعالى بييسر الامور وبالذات الزواج وانا اعرف ناس لم يكونوا يملكوا سوى وظيفتهم 250 جنيه وتزوجوا والحمد لله عايشين كويس ومتقوليش منين من يريد الزواج يتوكل على الله ويبدا فى العمل لذلك وحيجد بركه منقطعه النظير وهذا الكلام على مسؤليتى
اللى حيفشل يبقى شىء من اتيني اما مش نصيبه او ربنا شايله خير قدام هو يجهله
او نيته مش كويسه او مجتهدش بالقدر ا
الكافى.....
واسمحلى وبدون قصد للمضايقه والله بس هى وجهه نظر لاحدى المجانين اللى هى انا صديقك لو وفر فلوس الشيشه والسجاير والشاى بتاع القهوه وحوشهم يتجوز بيهم كان بقى احسنله
تحياتى ليك
انتي باين عليكي مستنصداني يا سومة
بس كويس
هشرب شاي واجي ارد عليكي
الموضوع ده يامان جامد جدا وانا لو هكلم فيه مش هخلص بس الى احب اوضحهولك يامان ان حبيب هارتى وهارتك الشب الفنان المبدع هريدى فنان من زماااااااااااااان اسالنى انا ده جارى وصحبى من زمااااااااان وفنان مفرط المشاعر والاحاسيس وبيكتب شعر ايه مقولكش يعنى دى نبذه صغيره عنه بيس يامان مممممم بحبك من ايام الجيزة .
ربنا يخدنى عشان نرتاح انا عن نفسى مش بحب الحرام ونفسى اتجوز مرتبات تعبانة وغلو اسعار نجيب منين شقة وعفش وذهب لارضاء العروسة واهلها ربنا يخدنا عشان نرتاح ونريح الحكومة من متطلباتنا الكتيرة للعيش فى البلد مرتاح ههههههههه انا حاسس ان كلامى غريب بس بجد تعبت نفسى اتجوز
عاوز اتجوز واحده تكون مش اكبر مني سنا مش اشكال بس تعيشني
إرسال تعليق