اتجوز رقم تلاته .. جواب نهائي

السلام عليكم

كالعادة كنت بتصل بزملائي الف عليهم كده واطمئن عليهم لان ربنا رازقني بشويه زملاء ربنا ما يوريكم فانا بعمل باصلي وبكلمهم
مهو برده دا احنا كلنا مع بعض في رمضان وعزومات وبتاع فلازم اطمئن عليهم

المهم ندخل في الموضوع . بعد ما اتصلت بعطعط صحبي وحبيب قلبي وقره عيني واطمئنيت عليه وعلي الكهربا اللي مسكت في ابوه الاسبوع اللي فات قالي افتح المحور واتفرج ....
فتحت واتفرجت وقعدت اضحك لحد ما اخويا دخلي الاوضة قالي وطي صوتك شويه عايز انام

القضية اللي كنت بتفرج عليها هي الحكم علي 3 متهمين في قضية اغتصاب .. الحكم عليهم بالاعدام . طبعا يستاهلوا عشان يكونوا عبره لمن لا يعتبر . وطبعا اكيد انتوا عارفين ان الضحية كانت فرحانه وهي بتثأر منهم وبيطبق عليهم العقوبة القاسية

مهو اللي يديك علي قفاك وانت ماشي في الشارع لازم تضربه واللي يسرق منك الفلوس لازم يتسجن واللي يقتل القطة بتاعتك احتمال برده جمعية الرفق بالحيوان تحكم عليه بالمؤبد
واكيد هتكون فرحان ولن تقبل باقل من هذا العقاب
اللي ضحكني بقي وموتني من الضحك هو انهم لما كلموا الضحية قالتلهم بعد التحية والسلام وبدون كلام ويحيي العدل واحلي من الشرف مفيش . قالتلهم انا عايزه اتجوز رقم تلاته
ههههههههههههههههههههههههههههههههههههه
جواب نهائي يا هانم ؟ اكيد طبعا
خلاص يا جماعة هاتولها المتهم رقم 3 من التلاجة تتجوزوا واعدموه . هههههههه
هو القضية قلبت ليه علي ميلودي تركس كده .؟؟

انا لما سمعت الخبر ده قعدت اضحك جدا كيك علي الاخر . تخيلوا !!! شفتوا الست الطيبة
علي فكرة دي ربه منزل . يعني مربية اجيال

علي كده بقي ده تحريض صريح للشباب ان اللي عايز يعمل حاجة يعملها . واهو يمكن الفتيات الطيبات يطلعوا حلوين زي ربه المنزل دي ويتجوزوهم . واهو برده يبقي تصحيح للخطأ ولم الفضيحة
انا مش عارف الحقيقة هي فكرت باي منطق وهي بتقول كده ؟؟؟ علي اساس مثلا انهم صعبوا عليها ؟ او احتمال يكون الواد التالت ده برئ ومجاش نحيتها . او احتمال برده يكون امور شويه ولا حاجة . ولا لما شافته افتكرت جوزها الله يرحمه .

انا بقي رايي يا جماعة تضامنا مع كلام الست .. مش ام كلثوم لا الست اللي هي الضحية يعني
رايي انهم يعدلوا المادة 300567 عقوبات الخاصة باعدام المغتصب ويخلوا العقاب انه يتجوزها . ولو كانت متجوزه تتطلق والمجرم يتجوزها لاسيما لو كانت ارمله زي الحالة اللي بين ايدينا

طب واحد مدقدق يطلع يقولي طب لو المغتصب مش واحد . زي برده القضية اللي معانا دي اقوله ساعتها نقلب القضية من سيربح المليون ونحط الضحية علي كرسي جورج قرداحي ونسالها تختار مين من العدد اللي انقض عليها في حقول الذرة .
ولو كانت الاجابه صعبه نحذفلها كام واحد ونسهل العملية وتختار وتخلصنا

والباقي بقي يتعدم او يروح في ستين داهيه او نخليه يتجوز ستات مش متجوزه . واهو بالمرة يبقي سترنا بناتنا .
وبكده يبقي قضينا علي الظاهرة من جزورها علي فكرة . لانهم مش هيخافوا من الاعدام وانما هيخافوا من الجواز . وبرده احقاقا للحق نخلي العصمة في ايد الست عشان ميطلقهاش ونطمئن علي مستقبلها زي الحاجة اللي في القضية اللي بين ايدينا .

بجد مش حلوة ؟ الله عليكي يا بلد لما تعملي في شعبك كده .. واحده بدل ما تاخد بتارها وتربي عيالها . عايزه تتجوز رقم تلاته .
الحياه بقت صعبه من غير راجل بصراحة . بس بجد الست دي رجعتلي الثقة في نفسي اني مرغوب في المجتمع
واهو لما اغلب يعني في الاخر اروح اغتصبلي واحده وللا اتنين يمكن البليه تلعب معايا والبت تطلب تتجوزني
واهو ابقي اتلميت بين اربع حيطان بدل ما احنا لايصين كده مش عارفين تجوز ولا يحزنون .

كفاية كده علي الموضووع الفكاهي ده واشوفكم في حلقة جديده وخبر كوميدي جديد .

اضحك . الصورة تطلع في المرور

صباح الخير علي احلي شعب في الدنيا
شعب مصر الكرام

انا بكتب التوبيك ده في تمام الساعة الثانيه صباحا
لاني قاعد سقعان ومش عارف انام فقولت ادخل ارغي معاكوا شويه . امال انا عامل المدونة دي ليه ؟
طبيعي عشان اعمل ازعاج
اولا الموضوع ده تعليقا علي حدث حصل جديد في مصر . لان مصر بلد المفاجات ولازم اتداول كل حاجة فيها
دي برده بلدي يا جرع
المهم الحادثة دي للاسف منقولة من واحد زميلي لاني مكونتش في مكان الحادث . والعهده علي الراوي

وانا رايح الجيم مع صديكي العزيز كوجاك . قالي علي حاجة جميلة فرحتني واثلجت صدري وبدات اقتنع ان مصر
هتطور للاحسن والنظام فيها هياخد مجراه
قالي انهم حاطوا كاميرا مرورية واشارات مرورية الكترونية في وسط البلد
وبيقولي وهو ماشي هو ومجموعة من الاصدقاء بتوعنا اللي من ضمنهم هريدي لقي كده - خير اللهم اجعله خير - اشارة
بتنور لوحديها في الطريق وعداد ثواني شغال والاشارة بتفتح وتقفل بدون التدخل من العناصر البشرية المتمثلة في عسكري المرور
اللي بيكون واقف بياكل سندوتش طعمية عندنا

ومش كده وبس وفجاه لقي فيه اضاءه وفلاشات وكاميرات بتصور العربيات اللي بتكسر الاشارة
في الاول افتكر ان دي كاميرات فلاش لشخص اجنبي بيستمتع بالترجل في شوارع المحروسة ومعاه كاميرا
مهو بيقولك الاجانب بيحبوا يمشوا بالكاميرات في بلدنا الشقيقة وبيصوروا المتاحف اللي عندنا والاسدين اللي قاعدين علي كوبري قصر النيل
وساعات بيصوروا الناس المصريين وهما مشيين متيسين او يصوروا مشهد جرئ لشخص انتحاري بيعدي الشارع في هوجة
من السيارات المتسارعة

المهم اتضح بعد كده ان فيه كاميرا فوق الاشارة بتصور العربيات اللي بتكسر الاشارة . يا حلاوة
معني كده يا جدعان ان مفيش حد هيكسر الاشارة تاني والناس هتعدي براحتها وكل واحد جارر في ايده واحده والعيال هيعدي
براحته بدون صراع مرير مع مرايات العربيات وهيقللوا التزاحم البشري اللي بيكون في الشارع

بس قالي برده ان الكاميرا ماشاء الله كفاءتها عاليه اصلها كانت عماله تصور عمال علي بطال . انا قولتله معلش برده يا ماو
مهو الناس لسه مخدوش بالهم من الكاميرات والنظام بيحتاج شويه مجهود شويه . بس احنا شعبنا شاطر وذكي وهيفهم النقطة
دي بسرعة .. عادي يعني
بغض النظر ان فيه بعض الناس المصريين اللي بيقفزوا من فوق ماكنه المترو وفاكرينها حواجز للقفز وميعرفوش انها حاجة كده
بتحط فيها التذكرة فتفتح فتعدي . وبرده بعيدا ً عن الناس اللي متعرفش ان العربية لما تزمرلك تبعد عنها

اصل فيه ناس بتمشي في الشارع وزمارة العربية وراهم بيفتكروا مثلا ان الراجل اللي راكب عربية ده بيحيه وبيهنئة انه ماشي في الشارع
ومش عايزه ييجي علي جنب ولا حاجة

لذلك انا ارجح ان الناس فاكره ان الكاميرا في وسط البلد في الاشارات دي للتصوير الشخصي وكله عايز يتصور
فكان كله - اللي بعربية واللي من غير عربية - بيجري علي الكاميرا ويقف ياخد صورة بالزينون ويمشي
احتمال برده !!!! مهو حاجة جديده يا جدعان

لذلك انا بخاطب ضمير الشعب المصري وبقوله بالراحة علي الكاميرات . دي لسه جديده . خلوها تشتغل شويه صغيرين حتي
وبرده عرفت ان فيه كاميرات اتحطط علي بعض محلات وسط البلد زي محلات الهدوم والمولات . دي احتمال تكون عشان ضد
السرقة . عشان كده يا جماعة محدش ييجي قصادها ويتصدر . لانها مش هتصورك يا اخويا ولا هتديك فلاش
لانها كاميرا فيديو مش سايبر شوت
لذلك انا بدعوا الحكومة انها تحط الكاميرات دي برده جوه الجامعات وفي الحدائق العامة والخاصة لان فيه بعض المناظر مش بتعجبني خالص
زي واحده مثلا جايبه حله معكرونة وفرشة في الحديقة قدام قفص الاسد وعماله تاكل . زي ميكون الحديقة دي ورثاها عن جدها
السابع عشر مثلا
مبدا المراقبة ممكن ينفع عندنا في حاجات كتير . وبرده ممكن عشان السرقة .
عشان لو فيه واحد اتضبط وهو بيسرق الكاميرا بتاعه المحل . يبقي الكاميرا بتاعه المحل اللي جنبه تشوفه والراجل يمسكه ويقدمه
للجهات المختصة

انا مش عايز اطول عليكو اكتر من كده بس المهم انا سعيد ان فيه تطور . ودخل عندنا الفلاش الزينون . اصلي سمعت
انه بينور الشارع لما الفلاش ده بيضرب .
انا حتي بفكر اخد عربية اخويا بكره واروح العب في وسط البلد واقعد اضحك قدام الكاميرا
يمكن يلقطوا ليا صورة حلوة يحطوهالي في البطاقة بدل صورة المشبوه اللي في بطاقتي دي

ها حد جاي يتصور معايا ؟
واحتمال لما يحصل تجمهر قدام الكاميرات يعملوا صور عائلية . اخيرا البلد هتعملنا خدمات مجانيه . فل اوي
يللا بقي سلام انا بقي عشان اروح اكوي الطقم بتاع بكره اللي هروح اتصور بيه
واشوفكم بعد ما اتاخد مخالفة واقضي ليلتين في الحجز

تصبحوا علي خير

هروب الاضحية .. الجزء الثاني

السلام عليكم

من غير مقدمات لاني منمتش بعد حادثة الجاموسة . ومش قادر ااكل
انا هكملكوا الجزء الثاني لان فيه رسايل كتير جتلي علي الميل وقالتلي ايه اخبار الجاموسة

واللي قالي انا هسفرها بره واللي قالي هاتها عندنا واحنا ناكلها صاحيه من غير ما تتدبح
انا هعمل اللي يمليه عليا ضميري واحكيلكوا وبقول تاني اللي قلبه ضعيف بلاش يكمل قرايه
عشان ده غلط . واحتمال يحصله انسداد في الشريان الاورطي اللي بيطلع علي الجيزه

احم احم . احنا وصلنا لحد فين ؟
اه لحد ما لجموسة اتزحلقت واتملوا عليها
المهم بعد ما الجموسة قامت وقفت راحت هايجة علي الناس وضاربه سبرينت في نص الشارع
وهاتك يا جري .. وانا قلبي بقي جامد وروحت طالع من خرم الباب وواقف قدام البيت
اول مرة في حياتي اشوف جاموسة بتجري .. تخيلوا !! بتجري ولا حصان شيكسلوفاكي في سباق خيل

لكن بطبيعة الامر الجاموسة لازم تتعثر لانها معندهاش خبره في الجري . راحت وقعة في اول مطب قابلته
قدام بتاع اللبن اللي بعد بيتنا بمتين متر كده

والناس وراها بالسكاكين
وتكرر مشهد المواجهه مرة تانيه قدام بتاع اللبن . والراجل البقال واقف مرعوب لحسن الجاموسة تعمل عملية
انتحارية في المحل بتاعه وتبوظله اللبن

المهم واحد من الجزارين الشباب اللي الحماسة ملياه شويه وعايز يعمل قط قدام المزة بتاعته اللي واقفة في البلكونة
راح واقف قدام الجاموسة بالسكينة وصمم لازم يجيب رقبتها
زي ميكون اول مرة يشتغل جزار وميعرفش ان الجاموس والبقر والحاجات دي بتخاف من منظر السكينه

اوباااااااااااااااااااااااااااااا
اتقلب المشهد 180 درجة تماما . اصبح القاتل هو المقتول والجاني هو المجني عليه والمجرم هو فريد شوقي
راحت الجاموسة نطحه في الواد وطلعت تجري ورا الناس

هههههههههههههه . الجاموسة بتجري والشارع بيجري قدامها . طبعا لذت بالفرار خلف باب البيت بتاعنا كالمعتاد
منظر في قمة الكوميديا وانت شايف الجاموسة بيجري قدامها الجزارين والشباب في اعمار 15 سنه

بس للاسف حظها المتعثر دائما راحت خبطة في عربية ووقعت بس المرة دي اتعلمت من اخطائها وراحت واخده خمسة امريكاني
وراجعه عكس الاشارة وراحت وخداها جري المرة دي وعينك ما تشوف اللا النور
واختفت الجاموسة عن الانظار وبعض الشجعان كانوا بيطاردوها

طبعا انا واخويا قررنا اننا نروح نجيب فطار عشان جعانين
روحنا جبنا جبنه نيوزلاندي وفينو وبسكويت . ورجعنا بعد ربع ساعة
مهي الدنيا كانت مليانه طيبنه من المطر ومكوناش عارفين نمشي

المهم واحنا جنب البيت لقينا تلاته من الجزارين جايين من بعيد والجلابيه مليانه دم .. سمعاني يا رومانسية .. مليانه دم
علي الجلبية وعلي وشهم وعلي ايديهم . وجايين ينهجوا

بنسالهم بنقولهم ايه اللي حصل ؟؟
قالوا خلاص احنا دبحناها في الشارع اللي ورا وفيه عربية بتحملها وجايه ورانا .
ههههههههههههههه

معرفوش يموتوها في الجزارة راحوا طاردوها في الشوارع وموتوها والله اعلم يمكن تكون رجليها اتكسرت ومتنفعش اضحيه اساسا

بس المهم انتهي الكابوس وبتاع اللبن ارتاح وبتاع لعب الاطفال اللي اتكسرت حاجاته بيطالب بحقه من صاحب الجاموسة

واشوفكم علي خير بقي

هروب الاضحية .. الجزء الأول

السلام عليكم

طبعا كل سنه وانتوا طيبين واللحمة كويسة واللي بيشوي مينساش حقي في الفحم

انا قاعد فاضي دلوقتي مستني اللحمة علي ما تخلص علي البوتاجاز فقلت احكيلكم حكايه العيد
وكالعاده هروب ودماء وسكاكين في الشارع وصويت بنات وتكسير عربيات
يا نهار ابيض .. العيد السنه دي قلب لعبه " نداء الواجب " والجاموسة لمؤخذه كنت البطلة

ابتدت الحكايه وانا واقف قدام البيت بعد صلاه العيد مستني الجزار ييجي يدبح المعزه بتاعتي . بس كان في ايده شغل
وكان فيه عنده جاموستين بيدبحهم
كالمعتاد في الشعب المصري الناس تتلم حولين الدبيحة زي ميكون هيكلوها وهي صاحيه
الناس حولين الجاموسة والجزار واقف بالسكينة وعايزين يقعدوها عشان يدبحوها .. ومرة واحده
هتف هاتف وقال ادبح يا عم وخلص احنا لسه هنستني !!

فشرع الجزار بلا شفقة ولا رحمه في دبح الجاموسة وهي واقفة . حاجة تقطع القلب الحقيقة
وطبعا كلنا ابدينا اعتراضنا وشجبنا هذا العدوان زي بالظبط ما شجبنا مقتل الشربيني في المانيا
وحصل المراد والجاموسة طبعا ماتت في ايديهم ونامت علي الارض غصب عنها بعد ان اردوها قتيله في ارض المدبح

المفاجاة بقي ان كان فيه جاموسة تانيه واقفة جنبيها تنظر بعين الحسرة والندامة لدماء شقيقتها الصغري وهي تسيل كالبن المسكوب
وكانها بتقول انا اللي جابني هنا وسط الناس دي !!!

وعينك ما تشوف اللا النور يا حاج انت وهو . والجاموسة طاحت في الكل دفاعا عن شرف اختها اللي راح هدر
وسط صيحات وهتاف الملايين . احم احم قصدي المئات . هما كانوا شويه ناس وخلاص

المهم الجاموسة هاجت وماجت وفلتت من ايد صبي الجزار وجريت في الشارع مصابه بحاله من الهيستريا
في هذه اللحظة انا كنت واقف عند البيت بفكر في فطار اجيبه لاني تيقنت ان اليوم هيطول ومش هيعدي علي خير
ولو فضلت مستني اكل من الاضحيه يبقي مش هاكل غير علي عرفات الجاي بقي وعليكو خير

المهم انتابني شعور بالخوف لما شفت الجاموسة جايه جري عليا - كنت واقف انا واخويا وخالي - وطبعا كرجولة
باقي الشعب المصري قمت جاري علي البيت مستخبي في المدخل متابعا للاحداث من خرم الباب

بس اخويا فيه عنده حاجة حلوة خالص . ان اي خناقة تحصل او اي جريمة مشوقة لازم يكون في قلب الاحداث
وبالتالي هو فضل واقف في نص الشارع كفيلم القلب الشجاع يشوف الجاموسة الهربانه من المصير المحتوم

المهم الجاموسة اول ما هربت من الناس راحت داخله في محل لعب اطفال مكسراه . وعينك ما تشوف اللا النور
مسدسات المية والاستندات بتاعه الالعاب كلها في الارض . وعلي فكرة الجو كان مطر علي الفجر كده والارض كلها طينه
وراحت مخلصه علي محل الاطفال وراحت داخله علي محل الكومبيوتر اللي جنبه ومكسره الباب بتاع المحل في محاولة
لتشتيت الانتباه علها تنال الحرية من ايدي الاعداء البشريين

واتزحلقت المسكينة والناس اتلموا عليها بالسكاكين
كمجموعة من الحريم اتلموا علي واحد في الاتوبيس
ولكن دي جاموسة 650 كيلو ... فحدث ما لا يحمد عقبااااااااااااااااااااااااه ........

ونلتقي في الجزء الثاني لاني حاليا ً جعان والاكل استوي ولازم الحق نصيبي عشان اخواتي وحوش في الاكل
ولو ملحقتش نصيبي هيكون فيه مذبحة زي بتاعه الجاموسة دي بالظبط

الراقص مع الخرفان

السلام عليكم

عيد سعيد عليكو وعلي اهاليكو ان شاء الله
وطبعا بعد الاخبار البايته اللي عمالين نسمعها كل يوم والاعلام بتاعنا اللي بقي عامل زي ابله فضيله
اللي لازم يطلعلنا في كل قناه واخبار جديده وقديمة ومين شتم مين ومين ضرب مين

وكله ناسي ان العيد ان شاء الله يوم الجمعة اللي جاي ولازم الناس تفكر بقي في اللحمه . مينفعش كده
هو مفيش لحمة لا في الايام العاديه ولا في العيد كمان ؟؟

وانا بتفرج علي الصورة دي اللي حضراتكم شايفنها في الموضوع افتكرت وديييييييييييييييييييييع وتهامي باشا ملك الانتاج
وعلي طريقته المعهودة احب اقولكم ان الخرفان بتتدبح مش بترقص

لذلك لازم كل واحد فينا يفكر هيدبح ايه العيد ده
انا كنت مواعد بعض الناس والاصدقاء اني هشترك معاهم في جمل من العيد اللي فات بس من الواضح انهم نسيوني
ومش هقدر اضحي غير بمعزايه صغيره كده حاجة وعشرين كيلو

وبالمرة عشان التلاجة عندي لا تستوعب اكبر من هذا القدر
لذلك ادعو اي حد هيدبح حاجة اكبر من معزايه انه يسيبلي نصيبي علي جنب بس يسيبه في التلاجة بتاعته
وممكن يبقي يبعتهولي ديليفري في ايام التقشف زي اللي احنا فيها دي كده

واللي عايز يجيب نايبه وييجي يشوي معايا علي السطح انا تحت امركو برده . بس تجيبوا انتوا الفحم
واحب اسمع عن الناس اللي كانوا زمان راقدين عندي هنا في المدونة واقولهم رحتوا فين بالظبط ؟
امثال دوكتور شهاب وعايزه اتطلق والناس الحلوة دي
وللا خلاص اتجوزتي ونسيتينا يا كبيرة ؟؟؟
وللا كله خلاص غير نشاطه علي الفيسيبوك ومبقاش فيه انتماء للماضي .. اخص عليكو اخص

علي كل يا ريت كله يشارك ويقولي هيرقص مع مين العيد ده .. خروف ولا معزه ولا بجره ولا قطة

الخرفان البلدي ... ام الاسترالي

لماذا تذكروا الكرامة الوطنية الآن

السلام عليكم ورحمه الله وبركاته

ازيكم يا احلي شباب . معلش مكونتش بكتب اي حاجة اليومين اللي فاتوا لان الاعلام قايم بالواجب وزياده
وطبعا قبليها كان فيه ماتش والواحد مكانش فاضي من كتر النفخ الوطني اللي كنا فيه

مكونتش عارف ابص جنبي من كتر الوطنيه اللي كانت علي التليفزيون المصري

دا مقال لاحد المفكرين " جمال سلطان " وعجبني الحقيقة وقولت لازم انقله هنا واللي عايز يقول حاجة يقولها

عمليات الحشد الإعلامي والسياسي المتتالي والأسطورية حتى الآن بدعوى الكرامة الوطنية التي أهدرت في مباراة كرة القدم في الخرطوم تؤكد بما لا يدع مجالا للشك في أن الحكاية أبعد كثيرا من مسألة اعتداء بعض البلطجية على مشجعين مصريين عقب انتهاء المباراة ، وأن هناك إصرارا على إشعال الحريق لتهييج الوطن كله ، يقابله إصرار على إبعاد العقل تماما عن فهم الأحداث.

لا أريد أن أقلب المواجع في المواقف العديدة التي أهدرت فيها الكرامة الوطنية خارج الوطن وداخله ، بما في ذلك قتل وجرح المصريين أو سحلهم ، ومرت كلها مرور الكرام وبتسامح مثير ، ولم نسمع مثل هذه الأناشيد العسكرية التي تدق طبول الحرب ، ولم نجد مثل هذه الحملة المخيفة على دولة عربية شقيقة وشعبها وتاريخها بالكامل ، دون أدنى وعي بطبيعة التكوين الاجتماعي والثقافي والسياسي للمجتمع الجزائري .

وعمليات التحريض الموجهة للإعلام المصري الرسمي والخاص انتهت إلى إهانة كبيرة لمصر ومكانتها وإعلامها وثقافتها ، لأنه لم يظهر الإعلام المصري بمثل هذا الهوان والإسفاف والتدني بمثل ما يحدث الآن ، كما أن الكثير مما يبث الآن ويقال في الفضائيات المصرية يجرمه القانون المصري نفسه ويضع قائليه تحت طائلة العقاب ، ولكن لا أحد يخشى شيئا ، لأن التوجيه من الجهة التي لا يطالها القانون .

ولو أن الكلام الذي قاله أحمد موسى عن الجزائريين في القاهرة وتحريضه على قتلهم ثأرا "للشهداء" المصريين في الخرطوم ، لو أنه قاله عن الإسرائيليين في القاهرة في أعقاب مقتل الجنود المصريين على حدود رفح وتدمير بيوت مصرية لتم تقديمه للمحاكمة بعد توبيخه بما لم يسمعه من قبل .

المسألة لا تتعلق بالكرامة الوطنية ، ولكن تتعلق بالبحث عن مجد سياسي ضاعت فرصة صناعته بالفوز في مباراة الخرطوم بعد التحضير له ، فيتم الآن محاولة صناعته عن طريق استثمار إحباط الناس من خسارة المباراة وبلطجة بعض المشجعين الجزائريين هناك ، لإثارة معركة خرافية لا صلة لها بالمنطق ولا بالعقل ولا بالمصالح الوطنية ولا حتى الكرامة الوطنية ، من أجل صناعة مجد سياسي للبعض بدعوى أنهم حماة الكرامة الوطنية.

وكأنهم لم يروا كرامة المواطن تسحل هنا في القاهرة وليس في الخرطوم ، أو كأنهم لم يكونوا شركاء في عمليات استباحة كرامة المواطن في وطنه ، ثم دخل على خط المزايدة الرخيصة كل من له مصلحة خاصة شخصية أو طائفية في تسعير الحريق ، فرجال الأعمال الذين لهم مشكلات مالية مع الجانب الجزائري حركوا صحفهم وقنواتهم لتصفية الحسابات ، وكله في زفة الكرامة الوطنية ، والعنصريون أعداء العروبة ـ أيا كانت جهتها ـ وجدوها فرصة تاريخية لهجاء العرب والعروبة والانتماء والأمة.

وبعض القوى الطائفية سخرت منابر مصرية لتصفية حساباتها مع هوية مصر العربية حتى تحولت صحف مصرية إلى نسخة مطبوعة من مواقع أقباط المهجر ، واللوبي الأمريكي الإسرائيلي في مصر نشط بما لم ينشط قبل ذلك ليروج عبر أكثر من قناة وصحيفة إلى فرية مفادها أن مصر أقرب إلى إسرائيل منها إلى العالم العربي .

وبدا في ظل هذه الهوجة أن كل شيء مستباح ، حتى في أمن مصر الداخلي وإهدار القانون ، لدرجة أن يصدر بيان رسمي من وزارة الداخلية يدافع ويبرر قيام مجموعات من الشباب "الغامض" بالتظاهر بالقرب من سفارة الجزائر فدمروا أربعين سيارة وعشرات المحلات التجارية ويصف أعمالهم بأنها "احتجاج حضاري" ، وهي حنية رائعة لم أصادفها في مصر طوال عمري.

وتخيلوا لو أن هذه التظاهرة والتكسير والتدمير فعلتها حركة سياسية مثل كفاية أو الإخوان مثلا ، هل كان أحد يشك في تحويلهم إلى محكمة أمن الدولة العليا أو المحاكم العسكرية مباشرة ، كل هذا الحشد الإعلامي والسياسي والتهويل والضجيج زبد ، كله باطل ومحاولة للتلاعب بالعقول واختطاف الوطن في لحظة غفلة ، ولن تمر ، لأن مصر أكبر مما يتخيلون ، ووعي نخبتها الحقيقية أعمق مما يتخيلون .

انتهــــت المباراة ... ولا عزاء ولا بتنجـــان

السلام عليكم

امبارح كنت بتفرج علي ماتش الارجنتين وكولومبيا وقولت امتي فريق مصر يطلع بالوانه الزاهية وبدقن الواد شوقي الجامده دي ويورينا مهاراته في كاس العالم ان شاء الله حتي يطلع من اول ماتش .
وكنت شايف عيال فعلا بملايين بتلعب وقولت بس برده ابو تريكه بالتقوس اللي عنده ده هيجيبلنا جون وللا اتنين وهنظبط التظابيط .

جماهير مصر الكرام تفضلوا بكل حموقية ووطنيه وملوخيه واتصلوا بالفنان الكبير مدحت شلبي وقالوا مصر هتكسب 3 صفر والحمد لله التوقعات صدقت بغض النظر عن النتيجة الفعليه للمباراه .

الجماهير قالت هنكسب 3 صفر قولت جماهير مبتفهمش
ودخل فينا جون والتاني قولت وماله برده .... معلش
لكن يدخل الجون التالت وانا باكل فشار وهطق من الغيظ ؟
لا ده كده يبقي حرام اوي .. دي بشلة وعلمت في الوش

وعجبي

دا مش كلام صلاح جاهين ولا كلام عمده بتاع الخيار ولا كلام احمد اوكا السبب في الجون الاول . ده كلامي انا .. كلام واحد مخنوق ومبـضــ .... ولا بلاش عشان الرقابة
الماتش النهارده بصراحة كان عشرة علي عشرة للي ضغطهم قليل لانه رفعلهم الضغط وكان كويس برده عشان الحووامل بدل ما يطلعوا يمشوا في الشارع 2 كيلو اهو يتفرجو ويصوتوا . واحتمال يسقطوا واجوازهم تفرح فيهم .

بصراحة انا مش عارف اشبه المنتخب ده بايه ؟ مشكلة مرور ولبسناها للقطر قبل كده وقولت معلش سوء تفاهم لكن اللي بيحصل ده حرام . ازاي يضيعوا امال مئات بل الاف من الشباب قاعدين علي قهوة الثرايا في الهرم مستنيين النصر العظيم وافتتاح المباراة بهدف برجل احمد فتحي او حتي سيد معوض اللي بيجري زي البطة .

قريت كلام بجد ضحكني من واحد حبيبي اوي علي الفيسبوك ونصه كالاتي ....

" احد مزايا كوني زملكويا ً ... هو الهدوء والبرود عند الهزيمة .. ولا حاجة خالص طفيت التليفزيون وقمت اتفرج علي مسلسل كوميدي وضحكت طبعا ... بمنتهي البرود برده .. قفلت الكومبيوتر وكلي رضا عن النفس لاننا بصراحة .. مش وش نعمة .. وبعدين ايه يا جماعة ما احنا االسنة الجايه هنتفرج علي كاس العالم علي الارضي ... حلو اوي .. حسبي الله ونعم الوكيل "

دا كلام واحد حبيب قلبي قضي معايا احسن سنين عمري في الاعدادية وكرهته في الكلية لاني عرفت انه زملكاوي . بس اوي مرة يقول كلام يفرج صدري ويريحني من تانيب الضمير اني اشتريت تليفزيون . عشان اتفرج علي فريق عفش زي بتاعنا

قال كاس عالم ال .. جتكم الارف كده وانتوا شبه براد الشاي بتاع بيتنا .
ممكن تكون هزيمة النهارده سوء حظ .. بس تلاته واحد ؟؟؟ وللا ممكن يكون فريق الجزاير فريق جبار والناس فيه خارقة وانا معرفش ؟ ده الجزاير النهارده لو كنت نزلته فريق الصفا كان غلبه 2 صفر اقل تقدير واحترام .

لو فريق مصر النهاده كان بيلعب لوحده في ارض المباراه كان طلع تعادل .

بجد احنا مش وش نعمة .. وبيني وبينكم ولا حتي وش نقمة . احنا مش نافعين في اي حاجة
انا رايي بقي ان فريق مصر يلعب ويشد حيله عشان يلحق كاس عالم 2018 مثلا ً . اهو يكون اللعيبة ماتوا وجابوا لعيبه جداد

او ربنا يكرمني واجيب واسطة وانزل العب بالنظارة بتاعتي .. سعات بجيب اجوان في الشارع عندنا علي فكرة
انا حزين وزعلان علي الفريق . بجد ونفسي اعمله حاجة تشفي صدور قوم مؤمنين .
بجد بجد بجد ... انا حزين علي كل دقيقة قضيتها قدم التليفزيون وكنت بتمني ان النور يقطع ومكملش الماتش

واترك لكم حرية التعبير وابداء الراي . واي حد هيدخل يقولي سوء حظ ولا الجون بتاع العدو كان ضيق شويه صدقوني همسحه من علي الصفحة زي ما ممسحت فريق مصر ومصر كلها من دماغي

سلام دلوقتي بقي عشان اروح اخد بروفين عشان مصدع

كان يوم اسود اليوم اللي شجعت فيه فريق زي فريق بهلول بتاعنا ده
ال كاس عالم ال .. انتوا اخركو تتشطروا علي بترو جيت واسمنت اسيوط .

عــجبت لك يا زمـــن 1

السلام عليكم

احلي سلام لاصدقاء التدوين من اعرفه منكم ومن لا اعرفه

الحقيقة بقالي كام يوم كده بقلب في دفاتري القديمة . وبطلع اشعاري وقولت الزقها هنا يمكن تفضل ذكري بعد كده وللا حاجة
واهو برده بطلعها للناس . اهو واحد عايز يعيط شويه وللا واحد شايف كلمه عاجباه يقول .

بس كله بتمنه طبعا ً ... ما علينا
طبعا انا اسف كل الاسف لانقطاعي الفتره الاخيرة عنكم لاسباب امنيه تخص شركة دي لنك وضميري بيوجعني وعنيا بتحرقني من كل تقشير البصل من امبارح .. اصلي عامل عزومة بمناسبة بناء حيطة جديده في شقة اخويا .
بس فعلا انا حزين علي الاحداث المؤسفة اللي حصلت في الفتره الاخيرة . وتحديدا ً موضوع القطر اللي مشي لوحده .. اشتاتا اشتوت

نخش في الموضوع بقي ونشمر عشان نحكي
بيقولك كان يا مكان اسكندريه فيها ورشة تصليح قطورات ونفخ عجل وكده حيث كان يرقد القطر ( الجاني ) بدون حراك لانه عطلان . وفجاه بعد تصليحه القطر في يوم 17-5 مشي لوحده من منطقة القباري غرب الاسكندريه لحد ما وصل سموحه . لوحده انا بقول اهو

طبعا مادام القطر مشي لوحده يبقي اكيد زعلان وكانت النتيجة مصرع واصابه 12 بني ادم لانه اتشقلب وخبط عربيات وبتاع .
الملفت في الموضوع ان الاعلام كله بيكرر ويقول ان القطر مشي لوحده وخد طريقة طوالي لحد ما وصل المزلقان والمرور تدخل وفكه الخناقة وسيطروا علي الموقف .. ولم يتم تحديد الجناه وسيتم معاقبة المسؤلين والجميع سيأخذ جزاؤه .

بس صحيح هل الخبر ده منطقي او يمس للعقل الظاهر او حتي الباطن بصله
انا بقي هقول للاعلام اللولبي المتخشب بتاعنا ايه اللي حصل بالظبط من وجهه نظري .

هل تعلموا يا اصحابي ان فيه محرقة مخدرات جنب قباري علي طول . يبقي اكيد هذا القطر الاستيطاني عمل دماغ وخد في وشه وطلبت معاه هزار راح ماشي ومكسر كام عربية علي كام عمود لحد ما فاق واتمسك .

مش ده برده سبب اوقع .. اهو علي الاقل فيه سبب لان اصبحت حياتنا في مصر بين مجموعة من علامات التعجب والاستفهام سنظل نتعجب ونستفهم بدون أن نفهم لان دائما الاسباب اما مبهمة او غير مقنعة او غير موجوده اصلا ... بالظبط زي مدونتي كده .

الحقيقة مش عارف مين اللي غلطان . هل المرور اللي غلطان وللا القطر وللا الناس اللي صلحوه واحد اداله جوان شربه وللا احنا اللي غلطانين اننا مروحناش جرينا ورا القطر.. ايه اللي بيحصل ؟ ايه اللي بيحصل يا عالم في البلد . دا احنا بقينا في زمن المعجزات . فعلا دي ايه من ايات الله . قطر ماشي لوحده في ارض المحروسة بنت المحروسة .

طبعا قطر ماشي لوحده .. لاتقولي بالكهرباء ولا بالبنزين .. ولا حتى ريموت كنترول .. لاتقولي ياباني ولا صينيى .. دي ياجماعة احدث تقنية .. نظام الاستشعار عن بعد .. ايوة نظام الاستشعار يامحترم .. بمجرد مايشعر بالضحايا بتاعته يتحرك عشان يدوس عليهم علي طول .. واحب اسمع اغنية الفنان هاني شاكر، باااالدي يا بلدي إن كان ع القلب مفيش غيرك….. وان كان ع الحب مفيش غيرك….ده جناحى مرفرف فى سماكى….. والباقي مش حافظة …بلدي بلدي بلدي .

يا رب ميطلعشي علينا بكره طيارة تضرب العمرانية ويقولوا طيارة طارت لوحديها بعد ما خدت شاور ببنزين بفاريا .

واخيرا احب اوجه سؤال الحلقة لكل المجانين اللي مصدقين القصة .

مين السبب وراء غضب هذا القطر عديد الاجرام ...... ؟؟؟؟

1- عزيز نفخو .. صاحب محل الكاوتش اللي كان بينفخ كاوتش القطر
2- برشامة السواق ... اللي كان سايق القطر اليوم اللي قبليه . لانه متورط في جريمة تحشيش .
3- حسنات التخينه .... اللي شاورت للقطر فطلع يجري وراها عشان يبوسها ... قصدي يدوسها .
4- شنكاح حاسب يا اسطي .. الكومسري لانه ساب القطر ماشي ونط منه ؟

لو عرفت الحل خليه لنفسك وموت بغيظك واللي هيتكلم هياخد علي بقو .

كان معكم ... كعبووووووول من امام السكة الحديد
والي جريمة جديدة حيث ظهور مولان . في احد الجرائد البرجوازية .. اللي عدي عدي

بلا عنــــــوان / خــواطــــــر

ما عاد يا دنياي وقت للهوى

ما عاد نبض الحب.. في وجداني

الحب أن نجد الأمان مع المنى

ألا يضيع العمر في القضبان

ألا تمزقنا الحياة بخوفها

أن يشعر الإنسان.. بالإنسان

أن نجعل الأيام طيفا هادئا

أن نزرع الأحلام كالبستان

ألا يعاني الجوع أبنائي غدا

ألا يضيق المرء..بالحرمان

ما أجبن الإنسان يدفن عمره

ليعيش تحت السوط.. و السجان

فغدا سيذكرنا الزمان بأننا

بعنا الهواء الطلق.. بالدخان

كلماتنا صارت تباع و تشترى

و بأبخس الأسعار.. بالمجان

كلماتنا يوما أضاءت دربنا

فلقد عرفنا الله في القرآن

الفقر حطم في النساء حياءها

صارت تباع بأرخص الأثمان

و شيوخنا بخلوا علينا بالمنى

من يا ترى يحيا.. بغير أماني؟

و حسبت أن العمر بحر هادئ

فرأيت موج البحر كالبركان

و غرقت في ألم الحياة و هدني

عبث السنين.. و حيرة الفنان

قالوا لنا: إن الحياة تجارب

و الويل كل الويل.. للعصيان

تركوا لنا وطنا حزينا ضائعا

تركوا الربيع ممزق الأغصان

كم قلت من يأس سأرحل علني

أجد الظلال على ربى النسيان

حتى يعود الحب يملأ مهجتي

و يشع نورا في سماء كياني

لكنني أدركت أن بدايتي و نهايتي

حتما ً ستكون في اوطاني

و سأسأل الأيام علّ مدينتي

يوما تعرف قيمة الإنسان

فمتى ظلام الليل يهجر عشنا؟

و متى الزهور تعود للأغصان؟

و متى أعود لكي أراك مدينتي

بغير اليأس.. و الأحزان؟

أترى سنرجع ذات يوم بيتنا

و نراه كالأمل الوديع.. الحاني؟

أترى سترحمني مدينتنا التي

قد صرت أجهل عندها.. عنواني؟

إني وليدك يا مدينتي فهل

صار الجحود.. طبيعة الأوطان؟

هل صار قتل الابن فيك محللا

أم صار حكم الأرض للشيطان؟

إني تجاوزت الحديث و إنما

حقي عليك.. سماحة الغفران

فإذا غضبت فأنتى أمي فارحمي

و إذا عتبتك فذاك من أحزاني


مخنوق ( 13-1-2008 )

زمـــن العــجائب / خواطــــــــــــــر

بعنوان (( زمن العجائب ))

نظرتي الي الحياه اصبحت عتماء
مثل سجن ظلماته من كل الجوانب

احكامى خاطئة والدنيا سواء
والناس لا فرق بين مغلوب وغالب

صارت عيني غير قادرة
علي التمييز ما بين القوالب

قطرات الندي تتراقص بين الورود
وفريسة تتوجع بين احضان المخالب

ضحات تلهو علي شفاه طفل
وعيون تدمع يعلوها الحواجب

اتخبط في داخلي نهارا ومساءا
واقرا في كتب العلماء والمذاهب

علني ارتاح من هم يؤرقني
واجابه تبرئني من كل المصائب

واشتري كتبا اقلب صفحاتها
واملا بها المكاتب والحقائب

اجول بين الازمان بخاطري
باحثا عن حقيقة ما بين المكاذب

فتيقنت من بين السطور بانني
اعيش حقا في زمن العجائب

مخنوق كيك ( 8-5-2009 )

من أعمــاق التــنين . أعــــود اليكم من جديد / الجزء الاول

السلام عليكم .

ازيكم يا بشر . وحشتوني بجد ووحشني تعليقاتكم ووحشني الحواوشي .

معلش كنت مختفي الفتره اللي فاتت دي لاني كنت بنشئ مصنع رقم واحد في تصنيع احم احم البلاط اتوماتيكيا والسيراميك .
وكنت مطحون جدا في تظبيط الخلطة وتوجيه العمال لكي نحصل علي منتجات طيبة نبني بيها بيتنا .

الحاجة الجميلة في الموضوع اني قضيت الفتره اللي فاتت دي كلها في الجيش !
المصنع يا سادة . كان بيركب في الجيش . يعني انا اهرب من الجيش واخد تاجيل ومصر تديني استمارة سته وفي الاخر اروح تبع الشغل ؟ !!! دي مهزلة مينسكتش عليها ابدا ً .

المهم رحت هناك وشفت الحياه العسكرية وشفت الاكل الكتييييييييييييييير اللي في الجيش -اللهم لا حسد- لحسن انا لو حسدت احتمال الاطباق كمان تختفي . لانها اصلا بتيجي فاضيه . دا فرضا اذا كان فيه اطباق اساسا ً .
لو سمحت محدش يفهمني غلط . الحياه العسكرية كلها التزام . اينعم ممكن يكون مفيش مية ولا اكل بس فيه التتزام وجلد وصبر .

انا مش فاهم بس مين اللي دعا عليا اني ادخل الجيش . ربنا يسامح اللي كان السبب
اثناء تركيب المصنع كان عندنا اتنين خبراء من ايطاليا واحد اسمه ماريو . ودا متجوز ومراته عسولة خالص والتاني اسمه جان بييرو ودا واد صايع كده وعنده 30 سنه بس مثال للانحراف اخر حاجة . يعني زيي كده

بصراحة المصنع ده اتعلمت منه حاجات كتير اوي . عرفت اد ايه اننا متخلفين ميكانيكيا وعلميا ورياضيا وامكانياتيا . كل حاجة كل حاجة
تخيلوا مفيش عده عشان نظبط بيها المكنة ؟؟؟؟؟؟؟؟؟؟؟؟ الواحد بجد كان حاسس انه عايش في ظلمات البحر . او فوق فوهه بركان

كان نفسي اصرخ ونفسي اخبط ونفسي اضرب . بس للاسف الحبس العسكري كان جنبي بحوالي خمس دقايق فكنت شايل في قلبي وبشرب شاي واكل بسكويت .
الخواجة ماريو اتعلم عربي عشان يساعد العساكر في الشغل . كان عمال يقولي انتو مش بتشتغلوا خالص . خمس دقايق نشرب شاي وخمس دقايق نروح نصلي وخمس دقايق نتغدي وخمس دقايق ندخل الحمام .. وطبعا مادام طلعنا من الحمام يبقي نبتدي من الاول تاني .

ناكل ونشرب ونصلي ونستحمي . وهكذا دواليك . الشغل كان بيبتدي الساعة 8 صباحا والمفروض يخلص 5 مساءا . لكن ده طبعا ً نظريا فقط
لكن لو جينا نحسبها عمليا ً هنلاقي اننا بنشتغل من الساعة 1 ونص لاتنين ونص . لان مفيش اكل ولا صلاه ولا شاي لان الكانتين قافل في الفتره دي .
قعدنا علي الحال ده شهر ونص . وانا برجع البيت هلكان وطالع عيني بس اعمل اي كله في خدمة البلد واني ابلط البلد باحسن بلاط فيكي يا امبابه .
بس الحمد لله خلصنا التركيب والتشغيل والعساكر الحمد لله خلصت اكل وجت تشتغل بقي . وطلعنا البلاط والحمد لله .

طلع قائد الوحده قال لا . البلاط ده وحش انا عايز بلاط احلي من ده .
قولناله يا عم الحاج المكنة دي بتطلع البلاط ده . قال لا انا عايز البلاط ده ... واخونا ماريو كان جايب معاه بلاطة من بتوع ايطاليا . بلاطة كده اللهم صلي علي النبي احسن من السيراميك بتاعنا . بجد والله

اللواء وقف وقال مليش دعوة انا عايز زي بلاطة ماريو . قولناله مينفعش دي مكنه ودي مكنه والراجل ورهالك بس عشان يقولك انه رقم واحد في العالم في تصنيع البلاط . لكن مش معني كده ان الفرخة هتبيض بيضة نعامة .

" لكن مش معني كده ان الفرخة هتبيض بيضه نعامة " الضابط اللي قال الجملة دي في الحبس دلوقتي علي فكرة . طبعا لانه شتم الفرخة .
المهم يا عم يهديك يرضيك قال مليش دعوة خلاص نجيب الماكنة التانيه اللي بتطلع البلاط ده . طبعا انا بسمع الكلام ده ولاول مرة احس واتاكد من اعماقي وايقن بجميع جوارحي اننا اكيد اكيد اكيد في مصر .

ماريو اتجنن وقعد يشتم بالانجليزي والايطالي ووانا طبعا فاهم بيقول ايه لاني طالع معاه مترجم ومهندس في نفس الوقت . والقوات المسلحة لا تعرف الفرق بين حرف ال A و كلمة حاضر .
وانا اهدي فيه وهو يشتم . اقوله يا ماريو الحبس قريب . يقولي انا عايز ارجع ايطاليا
اكلم اللواء واقوله يا فندم مش المكنة دي اللي بتطلع البلاط ده . قالي جملة غريبة اوي " قالي انت صح واحنا غلط . بس احنا بقي عايزينك تعملنا الغط "

بصراحة انا عايز اروح اتحبس مع الضابط . ومسمعش كلام التعجيز ده . وقعدت اشتم وماريو يهديني وجانبيررو قاعد علي جنب بيحرق السجارة بدل ما يولع في نفسه من اللي بيسمعه ,

فعلا يا جماعة احنا في مصر . احنا اتكتب علينا خلاص يا رجاله اننا هنعيش في مصر .
بجد مش قادر اكتب اكتر من كده وبكره هبقي اكملكوا الحكايه ونشوف مع بعض ازاي وصلنا لحل يرضي جميع الاطراف .

بـــدون عنـــوان

السلام عليكم

انني اعتزل التدوين في هذه الفتره ... اسألكم الدعاء لكل اخواننا واهلنا في غزه

الاهي

رضاك خير من الدنيا وما فيها
يا مالك النفس قاصيها ودانيها
فليس للنفس امال تحققها
سوي رضاك . فذا اقصي امانيها

فنظره منك يا سؤلي ويا املي
خير الى ُ من الدنيا وما فيها

الاهي

ما مسني قـدر بكره او رضا
الا اهتديت به اليك طريقا
امض القضاء علي الرضي مني به
اني عرفتك في البلاء رفيقا

مــخنوق كيك .. واذاعة ( أم نعـــيمة ) حــصريا للـمجانين فقط

وحشتوني يا حبايب

معلش كنت غايب عنكم الفتره اللي فاتت

قاعد مخنوق كالعادة قولت انزل اشتري شورت ولا تي شيرت ب 300 جنيه من توكيل " المحتاس " اللي تحت كوبري 26 يوليو

نزلت اشتريت قميص علي تي شيرت بولو علي بنطلون .. اينعم طلع طويل شويه وديته لعم دكران بتاع القمصان عشان يقصره ويتنيه تانيه سحرية .

وقاعد كده مخنوق قولت افكر في حال الدنيا بعد سنتين تلاته ايه اللي هيحصل .
وطبعا ً بعد تفكير عميق سحيق لقيت دماغي بتوديني لاذاعة قوية جدا ً .

اذاعة مخنوق كيك 114 فاصلة 15 .. مجانين بلا قيود ( تاليف وحوار وسيناريو وبطولة واخراج وانتاج ) مخنوق كيك .
الساعة الثامنة والربع - عام 2030 ميلاديا ً .

1- تعرض الامن المركزي لبعض الاشتباكات والجراح نتيجة مظاهرة في وسط البلد اعتراضا علي اختفاء رغيف الفينو .
وصل عدد الجرحي في ميدان طلعت حرب لخمسين شخصا ً . اثر تعدي الامن المركزي عليهم بالقنابل الاسنفجية والتي تسبب الطرش والعمي والحمي بغرض احتواء الميدان . بعد تظاهر عدد 2000 شخص طلبا لرغيف الفينو بعد اختفاؤه من الافران والسوبر ماركتيات

2- قرار جمهوري برفع مرتبات جميع الموظفين من جميع الفئات .
قرر رئيس البلدة رفع رواتب الموظفين من الدرجة الاولي للعاشرة وحتي الناس اللي علي المعاش . لكي تصل مرتباتهم الي 1000 جنيه لكي يستطيعوا العيش في خضم ارتفاع الاسعار العالمية وضرب البورصة وارتفاع اسعار الاخشاب

3- اضراب عن العمل في كل من الجهات الزراعية والصناعية والطبية نتيجة فرض ضريبة علي الحياه تصل الي 1000 جنيه
بعد فرض الضرائب التجاريه علي المواطنين والتهرب منها قرر مجلس المدينة فرض ضريبة علي كل المواطنين بهدف المساواه واستحاله عدم التهرب . لانها سوف تفرض علي الحياه . فكل دابة تمشي علي الارض علي اثنين او اربع سوف تدفع ضريبة . لذلك سوف يتم التخلص من المتهربين وذوي الاحتياجات الخاصة . الي الابد

4- الغاء الكوبري الدائري خط شبرا و هدم المحور . بعد وصول عدد السكان ل 30 مليون شخص
بعد حدوث ركود في وسائل المواصلات وقلة حركة المرور في البلدة . قرر المسؤلين الغاء الدائري والمحور لكي يستطيعوا السيطرة علي الاحياء بقدر المستطاع باقل التكاليف وفي لقاء مع مسئول المواصلات قال " نحن نعدكم ان نعيد اليكم الدائري والمحور بعد الانتهاء من الاجراءات االامنيه وعد المواطنين واحد واحد "

5- تهريب الدقيق من المخازن ( سريا ً ) علي ظهر 46 باخرة متجهه الي كندا .. وللاسف لم يصل منها ولا واحده .
مع تكرار حوادث الباخرات . لم يتوقع اكثر المتشائمين غرق 46 باخرة في يوم واحد متجهة الي كندا تحمل قوتا وعتادا . وبعض النقاد الصحفيين قال ان هذه الحوادث بسبب دعاء الشعب المصري الذي لا يجد الدقيق .. لذلك سوف يمثل كل الشعب امام القضاء في جلسة مغلقة ويصدر الحكم في خلال دقائق قبل بدا الجلسة .

6- حسين الجاسمي يغني لمصر اغنيه جديده باسم " وبحبك خنقتيني " وفي مطلعها يقول

بحبك خنقتيني .. بحبك وانتي نور عيني
ده وانتي مطلعه عيني .. بحبك موت

مليت اد ايه مليت... ملاقيت فيكي نقطة زيت
وبقولك انا خـسيت ..... من اكل البيت
وكأن الرز في بعدك غالي .. ما بيرخصش
وكأن القمح في ارضنــــا... ما بيطلعش

وعلي صعيد دولي اخر


1- تهديدات جديده من اوباما للرئيس المريخي " كيكاوا ويوي " لاشتباه وجود اسلحة نووية في كوكب المريخ
فتح اوباما الملف المريخي من جديد في البيت الاخضر بعد اعتراض الرئيس ( ويوي ) علي التفتيش . معللا بذلك ان كوكبه نظيف ولا يحمل اي اسلحة نووية ولا حتي شمسية

2- غلق المعابر والمخارج والمداخل المؤدية لاي حته .. لحين انتهاء التحقيقات الامريكية من واقعة اغتصاب فتاه كازينو الليل .
قرر مجلس الامم حبس المواطنين داخل بيوتهم لحين التحقيق والتحقق من واقعة اغتصاب فتاه ( ش ع 25 سنه ) علي كوبري قصر النيل . متخذا استنجادات الاسرائيلين المقيمين في الشيراتون تبريرا لذلك . وان الكوبري لم يعد امنا بعد الان لسير الاجانب والمحتلين .

3- ابو الغيط يصرح لجريدة " تحشيش ياما " انه سوف يتم عقد مجلس امن في خلال 2756 ساعة لتناول الاوضاع في شبرا .
كانت المفاجاة مدهشة لاهالي شبرا حين صدور قرار عقد جلسة بهذه السرعة مستنجدين بالقوي العظمي بعد دخول اسرائيل سيناء والعريش والغردقة وروكسي ورمسيس ومحطة مترو روض الفرج

4- احمد محمد ابو تريكه اللاعب المصري يتم شطبه من قائمة الفيفا لارتداءه فانيله " تضامنا مع شبرا " .
تم شطب اللاعب المصري احمد محمد ابو تريكة نجل محمد ابو تريكة صاحب الاخلاق والقيم من قائمة الفيفا وقائمة لاعب القرن عقب انتهاء مباراة فريقي ( الاهلي و حديد عز ) لانه كان يرتدي فانلة داخليه تحمل معنا ً سياسيا ً وواضحا ً وربما تحريضا ً وهذا ما اقره الاتحاد . وانه سوف يتم تغريم اللاعب غرامة قد تصل الي 20 طن حديد . علي السعر القديم

5- ارتفاع سعر اللاعب المنغولي " بنطالوني فانيلي " الي 500 مليار دولار . ليصل بذلك الي الشماعة الاولي ضمن المصنفين دوليا ً .
في تصريح فريد من نوعه . ارتفاع سعر اللاعب بنطالوني فانيلي الي 500 مليار دولار . اثر احرازه 5 اهداف نظيفه لصالح فريقه ( بلوفر بول ) في مرمي خصمة العنيد ( ويجان استيك ) الذي احتل المركز السابع في الدوري الانجليزي . وبذلك تغلب علي اللاعب المصري عمرو زكي الذي احرز 7 اهداف في الدوري .

6- وفاه جميع ابطال مسلسل " نور " " وسنوات الضياع ".. والجماهير تطالب باستمراره اذاعيا ً .
اثنااء عوده ابطال المسلسل نور وسنوات الضياع من مهرجان ( الهيافة كيافه ) سقطت الطائرة المقله لهم في المحيط الهندي . وقامت الحيتان بالتجمع حول مهند ونور لاخذ سور معهم وبعد ذلك لم يتركو منهم غير العمود الفقري وهو يوجود الان في متحف سوليد برج بلندن . سعر التذكرة خمسين دولارا للساعة !
وقد هاجت الجماهير علي الامن القومي الوطني . لانهم - حسب قولهم - كانو كنزا وطنيا ً ويستحق الحمايه والتقدير . وطالبت الجماهير النسائية باستمرار المسلسل اذاعيا علي نجوم اف ام لكي يظل نور ومهند في اذهان المصريين . وعشان يعرفوا كمان نور لما هتولد هتسمي البامبينو ايه !
وقد تم ترشيح كريمة مختار لهذا الدور بعد نجاحها في مسلسل " حماده عزو " وحمدي غيث بعد نجاحه في ذئاب الجبل .

6- الصبوحة تبحث عن ابن الحلال االمناسب . بعد فشل 157 محاولة زواج . والحسابة بتحسب
نختم اخبارنا بخبر حمضان وليس له اي قيمة . وهو بحث الفنانه العظمية الصبوحة عن شاب ابن حلال لكي تنعم معه الايام المتبقية من عمرها الذي انقضي من وجهه نظري منذ عقود .

كان معكم . مخنوق كيك من اذاعة ام نعيمة الدور الارضي . عمارة النجاريين في السيدة

ليس سوى قــــلم

جس الطبيب خافقى
وقال لي : هل هنا الألم ؟
قلت له : نعم

فشق بالشرط جيب معطفى . وأخرج القلم
هز الطبيب رأسه .... ومال وأبتسم
وقال لي : ليس هذا سوى قلم

فقلت : لا يا سيدى
هذا يد وفم ... رصاصة ودم
و تهمةٌ سافرةٌ .. تمشي بلا قدم !

أحمد مطر